ƁƏ TƏƁOROO 19
19
1Pǝram yea pa syak ne wonsuu kal tǝgwĩi mai moo syee ne gwah ber ɓe. 2Dǝɓ mo ka ne fatan a ɓe, ɓǝ ah ka pǝ'nyahr a, dǝɓ mai ɓal ah moo hǝǝ syee gwari gwari a zyak fahlii. 3Za ki a ɓeɓra suu ɓǝǝ ne fan joŋ tǝgwĩi suu ɓǝǝra, so a rǝkra ɓǝ ah tǝ Dǝɓlii.
4Za joŋ a lwaara bai mafuu ah cẽecẽe, amma mǝ pa syak koo mai mo no ne ki pǝtãa laŋ, a woŋra ki ne ki. 5Mo gwah ber pǝ cok kiita ɓe, kiita ga gbǝ mo, mo ka ǝ̃ǝ ya.#CuuƁ 19:18-19; ƁǝT 21:28 6Za pǝlli a kyeɓra ka za mayǝk ah mo ɓaŋra nahnǝn tǝ ɓǝǝra, koo zune daŋ a 'yah ka joŋ bai ne dǝɓ ma nyi fanne.
7Wee pah pa syak daŋ a syẽara ko syẽare, a joŋ ɗii ka bai ah mo woŋra ki ne ki ka ne? Koo mo tǝ kyeɓ ka zye yea ne bai pǝlli laŋ, ka lwaa ya. 8Dǝɓ mo kyeɓ ka fee fatan ɓe, ka tǝ 'yah suu ahe. Dǝɓ mo byak fatan ah mo tǝ ɓo pǝsãh ɓe, a ga yea ne pejii.
9Dǝɓ mai mo gwah ber kol pǝ cok kiita ka ga ǝ̃ǝ ya, a ga ŋgoŋra kiita wul tǝl ahe. 10Tǝgwĩi ka gak kaara pǝ cok mabǝ̃ǝ ah ya, byak ka gak kaara swah tǝ za mayǝk ah ya ta. 11Dǝɓ ma ne tǝtǝl ka ɓaŋ kpãh gwari ya, dǝɓ mo joŋ ɓǝɓe' wo ɓo ɓe, mo yaŋ ɓǝ ahe.
12Kpãh goŋ a tǝgbana ɓol moo ɓyaŋ ɓǝ, amma ɓǝ 'nyah ah a tǝgbana bam moo tanne. 13We ma tǝgwĩi ah ɓeɓ ye wo pamme, mawin mai mo yea ma ne kyãh ɓǝ nyee mgbǝrẽe mgbǝrẽe a tǝgbana bam pyak mai moo zyer zah zãa yaŋ. 14Dǝɓ gak soɓ yaŋ tǝkine lak nyi wel ah renne, amma Dǝɓlii ye pa ma gak nyi mawin masãh ah nyi dǝɓɓi.
15Mo 'yah yea vǝǝkoi ga liilii ɓe, mo nǝnǝm o, koŋ ga cuu fan nyi mo ba. 16Mo gbǝ ɓǝ lai Masǝŋ mbaŋ, mo ga nǝn wo sǝrri. Mo zyii kan syee ah ya ɓe, mo ga wuu. 17Ne cok mo nyi fan nyi pa syak ɓe, ka a tǝgbana mo nyi val ɓo nyi Dǝɓlii, mor Dǝɓlii ga jin soo mo. 18Mo lai wee ɓo ka ara pǝnyee nǝn laa lai ba, mo joŋ nai ya ɓe, ka mo soɓ ra ɓaŋ fahlii muŋ ɓo. 19Dǝɓ moo ɓaŋ kpãh gwari gwari mo dan pǝ cok gaɓ ne ɓe, mo soɓ ko re reba ahe, mor mo kal wǝǝ ko gin pǝ cok ah ɓe, ka mo so ga wǝǝ ko pǝ gaɓ ah comki kpǝ faɗa.
20Dǝɓ mo tǝ gbah jol ɓo ɓe, mo laa, mo yea ne 'yah fee fanne, comki ɓe, mo ga ciŋ pa fatanne. 21Zahzyil dǝfuu gak foo ɓǝ fan camcam ka joŋni, amma Dǝɓlii ye pa ma ga joŋ fan ah ra baa ga cok ahe. 22Ɓǝ dǝɓ mai moo kyeɓ fan mor suu ah to a pǝswãare, pǝram yea pa syak gin tǝ pa berre.
23Mo ɗuu Dǝɓlii, mo ga nǝn wo sǝrri. Mo tǝ joŋ nai ɓe, mo ga kaa jam, gaɓ ka lwaa mo ya. 24Za ki ara pǝ vǝǝkoi ne bǝǝ wol maa ga zah ka syak ɓǝǝra. 25Mo loɓ dǝɓ ma syẽa suu, ka za mai mo tǝra fan sãh ya daŋ mo feera fan gin gŋ. Ne cok dǝɓ mo lai dǝɓ ma ne tǝtǝl ɓe, a ga nyi tǝtǝl fuu ga nyi pelle. 26Dǝɓ mai moo joŋ ɓǝɓe' wo pamme, wala moo nĩi mam gin yaŋ ah ɓooni, ka joŋ fan maɓe' ah ne ma ren swãa ah ɓo.
27We ɓe, ne cok mo kal soɓ ɓǝ fee fan ɓe, koo mai mo tǝ ɓo kǝpel laŋ, mo ga yaŋ tǝɗe'. 28Za syedowal matǝ vǝrvǝr ah ka kan syee ɓǝ goŋga ya. Za faɓe' a laara pǝ'nyah ne ɓǝɓe'. 29Za ma tǝgwĩi ma tǝtǝǝ a ga lwaara kiita.
Bible Moundang © Alliance Biblique du Tchad, 1996.