ƁƏ TƏƁOROO 18
18
1Dǝɓ mai mo ka zyii tai ɓǝ ah ne za ki ya, a laa pǝ'nyah ne ɓǝ mǝ ah to, ɓǝ mai za ki mo kwo ɓo a pǝsãh laŋ ka zyii nyiŋ ɓǝ ah ya. 2Tǝgwĩi mo tǝ fanne, koo mo tǝ ya daŋ, ka ɓaŋ syiŋ ɓǝ ah ya, fan mai moo 'yahko joŋ ahe, sai a 'yah cuu tǝgwĩi suu ah gin lal to. 3Faɓe' tǝkine ɓǝ ren swãa a syeera mor ki. Mo kal soɓ yǝk ɓo ɓoo ɓe, mo ga lwaa swãa gin uu pǝ cok ahe.
4Ɓǝ faa zah dǝfuu a gak yea tǝgbana bii ma pǝ lakre, a yea pǝwok tǝgbana ma mor paŋbii matǝ ɓoroo. 5Ka pǝsãh mor ka sãa dǝɓ ma joŋ faɓe' ka so ɓeɓ ɓǝ kiita dǝɓ ma bai joŋ faɓe' ne ya.#Lew 19:15; CuuƁ 1:17; ƁǝT 24:23
6Comki tǝgwĩi maki ah mo tǝŋ kyeɓ bal ɓe, ka tǝ 'yah inni. 7Ne cok tǝgwĩi mo tǝ faa ɓǝ ɓe, ka tǝ ɓeɓ suu ah ne ko, mor a gban suu ah ne ɓǝ faa zah ahe. 8Ɓǝ faa ma cen tǝŋgee dǝɓ ne a tǝgbana farel ma'nyah ah mai dǝɓ moo laa sǝ̃ǝ ah ga ɓǝr pǝ'nyahre. 9Dǝɓ vǝǝkoi a pǝɓe' tǝgbana dǝɓ ma ɓeɓ fan ta.
10Dǝɓlii a tǝgbana yaŋ maswah ah mai dǝɓ matǝ njaŋ moo gak ɗuu ga muŋ suu ah gŋ. 11Za ma ne joŋ a lǝŋra joŋ ɓǝǝ a gak byak ra tǝgbana ɓaale maswah ah mai moo vuu ryaŋ yaŋ malii ma ne. 12Dǝɓ ka gak yea pǝyǝk ya, sai ka dǝɓ ah wonsuu ah kǝpel ɓe, dǝɓ ma yii suu ahe, ka ɓaŋ fahlii muŋ ɓo. 13Mo syii sok laa mor ɓǝ ɗǝ ka mo zyii ba. Mo joŋ nai ya ɓe, za ga tǝra tǝgwĩi ɓo, swãa ga re mo.
14Ne cok dǝɓ mo ne syem mo so gbǝ zahzyil mbaŋ ɓe, ɓǝ ah gak gban ko kaani, amma mo gbǝ zahzyil yao ɓe, ka byak fan ah vǝr ɓe ta. 15Cẽecẽe za ma ne tǝtǝl a yeara ma ne koŋ ka fee fanne. 16Mo 'yah ka lwaa dǝɓ mayǝk ah ɓe, mo nyi fan nyi ko, lwaa ah ka ga yea pǝgaɓ ya.
17Za a kwanra ɓǝ dǝɓ mai mo tǝŋ faa ɓǝ pǝ cok kiita zahnahpel na goŋga, amma sai ka dǝɓ ki fii ko ne lii ɓǝ ah ɓe. 18Ne cok za maswah ah gwa mo ge cera ki pel kiita ɓe, sai haa fan yee woŋ tǝgǝǝ ɓǝǝ to.
19Mo gbah jol naa pa ɓo, a ga byak mo tǝgbana ɓaale maswah ah moo vuu ryaŋ yaŋ malii ma ne. Amma mo tǝ joŋ bal ne ki ɓe, a ga coo zahfah ah ka ɓo. 20Ɓǝ mai mo faa ɓo ne zah ɓo daŋ mo ga re reba ahe. 21Ɓǝ mai mo faa ne zah ɓo a ga joŋ mo nǝn wo sǝrri koo a ga muŋ mo ta, mo ga re reba ɓǝ faa ɓo.
22Mo lwaa mawin ɓe, ka mo lwaa fan sãh ɓe ta, ɓǝ ah cuu Dǝɓlii joŋ ɓǝ sãh ɓo wo ɓo. 23Ne cok pa syak mo tǝ faa ɓǝ ɓe, a ɓoo zah ga sǝŋ ne ko. Amma pa joŋ mo tǝ zyii mǝ ah faa ɓe, a faa ne swahe. 24Bai manyeeki ah a leera dǝɓ leere, amma bai manyeeki ah kalra zum ɓe.
Bible Moundang © Alliance Biblique du Tchad, 1996.