KEE ZANA 27
27
Wee Selofad maŋwǝǝre
1Selofad we Hefer, we Giliat, we Makir we Manasse, we Yuseɓ, a no ne wee maŋwǝǝre, a ɗiira naiko: Maka, Noa, Hogla, Milka, ne Tersa. 2Urra kal ge uu pel Mosus ne pa joŋzahsyiŋ Eleasar, ne pel zaluu Israel ne za pãa daŋ zahfah tal mbǝro ma taini, faara: 3Pa ɓuu wǝ kǝsyicokki, soɓ wee wǝǝr a. Ako ka kǝsyil za mai mo ne Kora mo ŋwoora kyaŋ ne Dǝɓlii ya, amma wǝ mor faɓe' ma ka syak ahe. 4Pa ɓuu soɓ wee wǝǝ fahfal ah ya, mor fẽe tǝɗii pa ɓuu ga muŋ gin kǝsyil wee pah ah ra ne? We nyi sǝr ma syak ɓuu nyi ru kǝsyil wee pah ah ta.
5Mosus ɓaŋ ɓǝ ɓǝǝ ge pel Dǝɓlii ne ko. 6So Dǝɓlii faa nyi Mosus: 7Fan mai wee Selofad maŋwǝǝ mo fiira ɓo a pǝsãhe, sai mo bǝǝ sǝr nyi ra kǝsyil wee pah pa ɓǝǝra, ka mo rera fan mai kǝnah pa ɓǝǝ ye mo tǝ ga re.#KeeZ 36:2 8Mo faa nyi za Israel sye: Dǝɓ mo wǝ mo soɓ we wor a ɓe, ka mǝlaŋ ah mawin ye mo re yaŋ ahe. 9Mo ka ne mǝlaŋ win a ta ɓe, ka wee pah ah ra ye mo rera yaŋ ahe. 10Wee pa ka syak ah ra mo kǝka ɓe, ka zum ah matǝ gwari ah ra ye mo rera yaŋ ahe. 11Za Israel mo syeera mor ɓǝ lai maiko, tǝgbana ame Dǝɓlii me faa ɓǝ ah ɓo nyi mo.
Nǝǝra Joswa kan dǝɓlii ne pǝ cok Mosus
(CuuƁ 31:1-8)
12Dǝɓlii faa nyi Mosus: Mo yee ge tǝ waa Abarim ka mo ẽe sǝr mai me nyi ɓo nyi za Israel ge.#CuuƁ 3:23-27; 32:48-52 13Fahfal mo kwo sǝr ah ge ɓe, mo ga wǝ na naa ma ɓo Aron ta. 14Mor awe gwa daŋ we ŋwookyaŋ ne ɓǝ faa ɓe me faa ɓe kǝsyicok Zin. Ne cok za pãa daŋ mo kyãhra ɓǝ nyee ka ɓe Meriba, awe zyii ka cuu yǝk ɓe me ne nyi ra ya. (Meriba ako ye bii mai mo kah Kades kǝsyicok Zin.)
15Mosus juupel faa: 16Masǝŋ Dǝɓlii, amo ye pa ma nyi cee nyi fan daŋ, me pǝǝ mo, mo nǝǝ dǝɓ mai moo gak zaŋ za ɓo ka kal pel ɓǝǝra. 17Ka mo kalko pel ɓǝǝra, mo so pǝ̃ǝko sal ne ra, mor ka za ɓo mo myahra tǝgbana pǝsǝ̃ǝ mai mo ka ne pakǝpii ya ka.#1 ZaG 22:17; Eze 34:5; Mt 9:36; Mk 6:34 18Dǝɓlii faa nyi Mosus: Mo ɗii Joswa we Nun, ako ye dǝɓ mai moo gak joŋ yeɓ ahe, ka mo kan jol ɓo tǝtǝl ahe.#Pǝ̃ǝ 24:13 19Ka mo so zaŋ ko ge uu pel pa joŋzahsyiŋ Eleasar ne pel za pãa daŋ, ka mo faa pel ɓǝǝ ako ye pa ma ɓaŋ yeɓ pǝ cok ɓo. 20Mo nyi swah ɓo maki ah nyi ko, ka za Israel daŋ mo laara zah ahe. 21Sai mo laako zah pa joŋzahsyiŋ Eleasar, ako ye pa ma fii 'yah ɓe nyi ko ne Urim ne Tummin#27:21 Mo ẽe Pǝ̃ǝ Za Israel 28:30.. Ne fahlii mai Eleasar ga zaŋ Joswa ne za Israel mapãa ah daŋ pǝ yeɓ ɓǝǝ syee ne pǝsãhe.#Pǝ̃ǝ 28:30; 1 Sa 14:41; 28:6 22Mosus joŋ tǝgbana mai Dǝɓlii mo faa nyi ko, zaŋ Joswa ge uu pel pa joŋzahsyiŋ Eleasar ne za pãa daŋ. 23Kan jol ah ge tǝtǝl Joswa, so soɓ yeɓ ah daŋ ge jol ahe.#CuuƁ 31:23
Bible Moundang © Alliance Biblique du Tchad, 1996.