KEE ZANA 21
21
Kaara kacella tǝ Kanaanien
1Ne cok goŋ Kanaanien ma Arad mai mo kaa ɓo pǝ sǝr Kanaan ma fah morkǝsǝŋ ah mo laa za Israel tǝ ginra ɓaŋra fahlii ma Atarim ɓo, pǝ̃ǝ ge ruu sal ne ra, gbah za ki kǝsyil ɓǝǝ ta.#KeeZ 33:40 2Za Israel haara zah pel Dǝɓlii faa: Mo soɓ ru ɗaŋ za mai ɓe, ru ga nyi yaŋ ɓǝǝ maluu nyi mo, so ru ga vǝr ra belbelle#21:2 Mo ẽe Lew 27:28,29 tǝkine ɓǝ mai mo ŋwǝǝ ɓo mor ahe.. 3Dǝɓlii laa ɓǝ faa ɓǝǝ gbah jol ɓǝǝra, soɓ ra re Kanaanien, so za Israel ikra ra belbelle, ɓeɓra yaŋ ɓǝǝ maluu daŋ ta, so ɗiira cok ah ne Horma.
Coora soo ne vãm syẽ
4Za Israel urra gin kah waa Hor, ɓaŋra fahlii ma zoo ga kah mabii Syẽ mor ka kiŋ kah sǝr Edom. Amma ne cok mo tǝ gara, gak ka rõmra yao,#CuuƁ 2:1 5faara ɓǝɓe' tǝ Masǝŋ ne Mosus daŋ. Kyãhra ɓǝ nyee faara: Mor fẽe we woo ru pǝ̃ǝ gin sǝr Egiɓ ne ka gin wuk kǝsyicok nyee pǝ cok mai farel ne bii daŋ mo ka gŋ ya ne? Farel maɓea mai kǝ̃ǝ ru ɓe.#1 Kor 10:9 6So Dǝɓlii pea sooyii ge kǝsyil ɓǝǝra, soo ah lwǝǝ za Israel pǝlli, za pǝlli laŋ wukra. 7Za gera wo Mosus faara nyi ko: Aru joŋ faɓe' ne mai ru faa ɓǝɓe' tǝ Dǝɓlii tǝkine mo daŋ. Oseni, mo juupel wo Dǝɓlii ka mo wooko soo mai kǝsyil ɓuu ge lalle. So Mosus juupel mor zana. 8Dǝɓlii so faa nyi Mosus mo cooko soo ne vãm syẽ, ka mo rao ge tǝ kpuu sǝŋ, koo zune daŋ soo mo loŋ ko, mo ɓaŋ nahnǝn ẽe soo vãm ah ɓe, a ga laɓɓe. 9Mosus so coo soo ne vãm syẽ, ɓaŋ rao ge tǝ kpuu sǝŋ. Koo zune soo mo loŋ ko, mo ɓaŋ nahnǝn ẽe soo vãm ge sǝŋ ɓe, a laɓɓe.#2 ZaG 18:4; Yoh 3:14
Za Israel gera sǝr Moab
10Za Israel urra gin gŋ, ge ɗǝrra Obot. 11Fahfal mo zolra gin Obot, ge ɗǝrra tǝgboŋ Abarim kǝsyicok tǝ sǝr Moab nǝfah kǝmorcomzah'nanne. 12Urra gin gŋ gera pǝ cok tǝforoŋ Zeret. 13Urra gin Zeret, ge ɗǝrra kah el Arnon nǝfah kǝsǝŋ, kǝsyicok mai mo ur ɓo ka ga pǝ sǝr Amorien. (El Arnon, Amorien ne Moabien gbǝra zahsyee sǝr ɓo ne ko.) 14Mor ah ɗerewol Ɓǝ Ruu Sal Dǝɓlii faa ɓǝ yaŋ Waheɓ ma kah Sufa, ne cok tǝforoŋ kah el Arnon, 15ne cok tǝforoŋ mai mo ur ɓo ka ga fah yaŋ Ar nǝfah kǝ zahsyee sǝr Moab.
16Urra gin gŋ, kalra ge pǝ cok ma ɗii ne Lak bii, pǝ cok mai Dǝɓlii mo faa nyi Mosus gŋ: Mo tai za ka me nyi bii nyi ra zwahe. 17Ne cok ah za Israel ɗǝǝra lǝŋ naiko:
Amo lak bii, mo wuu bii ge lalle,
Ru ga nyiŋ bii ah ne ɗǝǝ lǝŋni.
18Lak bii ah ra,
Zaluu ne za mayǝk ah ra ma pel za ye ciira
Ne kǝndaŋ goŋ tǝkine kǝndaŋ ɓǝǝra.
Urra gin kǝsyicok kalra ge Mattana. 19So urra gin gŋ kalra ge Nahaliel, urra Nahaliel kal ge Bamot. 20So urra gin Bamot gera pǝ cok tǝforoŋ pǝ sǝr Moab kah waa Pisga ma fah kǝsyicokki.
Za Israel kaara kacella tǝ goŋ Sihon ne goŋ Og
(CuuƁ 2:26–3:11)
21Za Israel peera za ge wo Sihon goŋ Amorien faara: 22Mo soɓ ru pǝ̃ǝ pǝ sǝr ɓo ɗao, aru ne faɓal ɓuu daŋ ru ka ga pǝ 'wah sor wala 'wah kpuu vin ɓii ya, ru ka zwah bii pǝ lak bii ɓii ya ta, ru ga syee tǝ fahlii to to ŋhaa ru pǝ̃ǝ pǝ sǝr ɓo ne sõo. 23Amma Sihon zyii ka soɓ za Israel pǝ̃ǝ sǝr ah ya, tai za sal ah daŋ kal ge kǝsyicok Jahaza ne ko, ge ruu sal gŋ ne za Israel. 24Amma za Israel ikra za kǝsyil ɓǝǝ pǝlli, so bǝǝra sǝr jol ɓǝǝ daga kah el Arnon nǝfah kǝsǝŋ ge dai Jabbok, ŋhaa so ge dai Jaizer tǝ zahsyee sǝr Ammonien. 25Za Israel rera yaŋ Amorien maluu ra daŋ, rera yaŋ Hesbon ne yaŋ manyee ma kah ah ra daŋ ta, so kaara gŋ. 26Hesbon yaŋ goŋ Amorien malii yo, goŋ Sihon kaa ɓo gŋ. Sihon ruu sal ne goŋ Moabien, re sǝr ah ŋhaa ge dai kah el Arnon. 27Mor ah za ma ɗǝǝra lǝŋ a ɗǝǝra faa:
We ge Hesbon yaŋ goŋ Sihon,
Yaŋ ah vuu ɓo, a pǝswah faɗa.
28Za sal Sihon urra ɓo gin yaŋ Hesbon,
A syenra na wii,
Ɓeɓra yaŋ Ar pǝ sǝr Moab,
Ne masǝŋ ki ra pǝ cok ma tǝgee sǝŋ ah ra kah el Arnon.#Jer 48:45-46
29Ɓǝ gaɓ tǝtǝl ɓii za sǝr Moab,
Awe za ma juupel wo Kemos, we ɓeɓ ɓe,
Masǝŋ ɓii soɓ za ɓii ɗuura ɓe,
Ŋwǝǝ ɓii ciŋra byak Sihon goŋ Amorien ɓe.
30Amma zǝzǝ̃ǝko morsǝ̃ǝ ɓǝǝ vǝr ɓe.
Ru ik ra daga Hesbon ŋhaa ge dai Dibon,
Daga Nasim ŋhaa ge dai Nofa kah Medeba.
31So za Israel kaara pǝ sǝr Amorien. 32Mosus pee za ka mo ge foora yaŋ Jaizer, ka ga ruu sal ne zan ahe. Za Israel rera yaŋ ah tǝkine yaŋ manyee ma kah ah ra daŋ, nĩira Amorien mai mo kaara ɓo gŋ belbelle.
33Za Israel so piira soo, ɓaŋra fahlii ma ga sǝr Basan, Og goŋ Basan pǝ̃ǝ ne za sal ah daŋ mor ka ga ruu sal ne ra Edrai. 34Dǝɓlii faa nyi Mosus: Mo ɗuu gal ah ka, me ga soɓ ko ga mor jol ɓo ne zan ah tǝkine sǝr ah daŋ. Mo joŋ ne ki tǝgbana mai mo joŋ ne Sihon goŋ Amorien ma yaŋ Hesbon ta. 35Za Israel ik Og ne wee ah tǝkine zan ah daŋ, soɓra koo dǝɓ vaŋno laŋ ǝ̃ǝ ya, so ɓaŋra sǝr ahe.
Bible Moundang © Alliance Biblique du Tchad, 1996.