KEE ZANA 20
20
Za Israel kaara Kades
(Pǝ̃ǝ 17:1-7)
1Ne fĩi patǝ vaŋno ahe, za Israel ne pãa ɓǝǝ daŋ ge daira kǝsyicok Zin, ge ɗǝrra Kades. So Miriam wǝ gŋ, ciira ko.
2Bii kǝka cok ah ka za mo zwahra ya, so taira ge ryaŋ Mosus ne Aron. 3Kyãhra ɓǝ nyee faa: Pǝram kǝnah ru wuk ɓo ne cok mai wee pa ɓuu mo wukra pel Dǝɓlii kŋ sǝ. 4Mor fẽe we woo ru ge kǝsyicok mai ne ka ru wuk gŋ ne faɓal ɓuu daŋ ne? 5Mor fẽe we woo ru pǝ̃ǝ gin sǝr Egiɓ ne ka gin pǝ cok maɓe' mai fan ki mo ka joŋ gŋ ya ne ne? Sor kǝka gŋ ya, kpuu wuu kǝka, kpuu vin kǝka, kpuu grenadin kǝka, koo bii zwan laŋ kǝka gŋ ya. 6Mosus ne Aron zolra gin wo za kal ge uura zahfah tal mbǝro ma taini. Keara ge sǝŋ gŋ ɗǝmra zahpel ge tǝ sǝrri, so yǝk Dǝɓlii sǝǝ ge wo ɓǝǝra.
7Dǝɓlii faa nyi Mosus: 8Mo ge ɓaŋ kǝndaŋ mai mo pel sunduku gbanzahe, so ka amo ne Aron, we tai za pãa daŋ, we uu pel ɓǝǝra, ka mo faa ɓǝ nyi pǝɗakka mai mo gŋ, a ga soɓ bii ɓal ge lalle, ka we bea bii ah nyi za ne faɓal ɓǝǝ daŋ zwahe. 9Mosus kal ge ɓaŋ kǝndaŋ tǝgbana mai Dǝɓlii mo faa nyi ko.
10Mosus ne Aron taira za pel pǝɗakka ahe, so Mosus faa nyi ra: Awe za ŋwookyaŋ we laa, aru gak joŋ ka bii mo ɓal wo pǝɗakka ge lal ka we zwah ne? 11So Mosus ɓaŋ kǝndaŋ ge sǝŋ, kǝ̃ǝ pǝɗakka ne zahlǝŋ gwa, so bii ɓal gin wo pǝɗakka ge lal pǝlli, dǝfuu tǝkine faɓal daŋ zwahra.
12Amma Dǝɓlii ŋgoŋ kiita tǝ Mosus ne Aron, faa: Mor we nyiŋ me ya, we cuu yǝk ɓe me ne nyi za Israel a, mor ahe, we ka zaŋ zai ga pǝ sǝr mai me faa ɓǝ ah ɓo ka nyi nyi ra ne ya.
13Fan ah joŋ Meriba, pǝ cok mai za Israel mo kyãhra ɓǝ nyee wo Dǝɓlii gŋ, cok ah Dǝɓlii cuu daŋdaŋ ah mo ne ko nyi ra gŋ.
Goŋ Edom zyii soɓ za Israel pǝ̃ǝ pǝ sǝr ah ya
14Mosus pee za daga Kades kal ge wo goŋ Edom, faara nyi ko: Wee pa ɓo ban Israel faara, amo tǝ ɓǝ bone mai daŋ ru laa ɓe. 15Pa ɓuu lii ra kalra ge sǝr Egiɓ, so ru kaa gŋ syii pǝpãare, za sǝr Egiɓ cuura syak nyi pa ɓuu lii ra ne ru daŋ. 16So ru yeyee wo Dǝɓlii ka mo gbahko jol ɓuuru, so Dǝɓlii laa yee ɓuuru, pee angelos ah zaŋ ru gin sǝr Egiɓ pǝ̃ǝ ne ko. Zǝzǝ̃ǝko aru no Kades, yaŋ mai mo kaa ɓo zahsyee sǝr ɓo. 17Oseni mo soɓ ru pǝ̃ǝ pǝ sǝr ɓo sa. Aru ne faɓal ɓuu daŋ ru ka cak gin tǝ fahlii wala ka ga pǝ 'wah kpuu vin ɓii ya, ru ka zwah ɓii pǝ lak bii ɓii laŋ ya ta. Ru ga syee tǝ fahlii to to, ŋhaa ru pǝ̃ǝ zahsyee sǝr ɓo ne sõo.
18Amma goŋ Edom zyii faa: We ka gin pǝ̃ǝ pǝ sǝr ɓe ya, we kal ge ɓe, me ga ruu sal ne we.
19Za Israel faara: Ru ga zoo tǝ fahlii to to, koo aru, wala mo faɓal ɓuu yo mo kal zwǝ bii ɓii ɓe, ru ga sosoo fan mai ru 'yahe, ru 'yah ka pǝ̃ǝ gŋ ne ɓal kpaŋ kal to.
20Edomien so zyiira faa: Ru zyii ya. So pǝ̃ǝra ne fan sal ɓǝǝ daŋ ka ga ruu sal ne za Israel. 21Edomien zyiira ka soɓ za Israel pǝ̃ǝ pǝ sǝr ɓǝǝ ya. Za Israel so ɓaŋra fahlii maki ahe.
Wul Aron
22Za Israel ne pãa ɓǝǝ daŋ urra gin Kades, ge daira kah waa Hor, 23zahsyee sǝr Edom. Dǝɓlii faa ɓǝ gŋ nyi Mosus ne Aron. 24Faa: Aron ka ga dan pǝ sǝr mai me faa ɓǝ ah ɓo ka nyi nyi za Israel a, a ga wuu, mor we zyii syee mor ɓǝ faa ɓe Meriba ya. 25Mosus, mo zaŋ Aron ne wel ah Eleasar mo yee ge tǝ waa Hor ne ra, 26ka mo wǝǝ mbǝro pa joŋzahsyiŋ gin wo Aron, ka mo ɓaa nyi Eleasar, mor Aron tǝ ga wǝ gŋ. 27Mosus joŋ tǝgbana mai Dǝɓlii mo faa nyi ko, yeera kal ge tǝ waa Hor ne nahnǝn za pãa daŋ. 28Mosus wǝǝ mbǝro pa joŋzahsyiŋ gin wo Aron, ɓaa nyi Eleasar, so Aron wǝ tǝ waa ŋhaako. Mosus ne Eleasar ɗǝrra ge sǝŋ.#Pǝ̃ǝ 29:29; KeeZ 33:38; CuuƁ 10:6 29Za pãa daŋ mo laara Aron wǝ ɓe, za Israel daŋ yera yee wul ah zah'nan jemma sai.
Bible Moundang © Alliance Biblique du Tchad, 1996.