KEE ZANA 14
14
Za kyãhra ɓǝ nyeere
1Za Israel nǝnra suŋ ah cii ne yee. 2Za daŋ kyãhra ɓǝ nyee wo Mosus ne Aron, faara: Pǝram kǝnah ru wuk ɓo sǝr Egiɓ, wala kǝsyicok nyeeko. 3Mor fẽe Dǝɓlii woo ru ka ga pǝ sǝr mai ne ka zan ah mo ge ikra ru ne kafahe, ka mo so gbahra byak ne ŋwǝǝ ɓuu ne wee ɓuu ne? Mai pǝram pii soo ga sǝr Egiɓ ya ne? 4Faara nyi ki: Na nǝǝ dǝɓlii maki ahe, ka na pii soo ge sǝr Egiɓ.
5So Mosus ne Aron keara ge sǝŋ ɗǝmra zahpel ge tǝ sǝr pel za pãa daŋ. 6Joswa we Nun, ne Kaleɓ we Jefunne, za gwa kǝsyil za ma ga foora sǝr kŋ, ŋgǝ̃ǝra mbǝro wo suu ɓǝǝ ge lalle, jol mai zahzyil mo nǝǝ ra, 7faara nyi zana: Sǝr mai ru ge foo, sǝr ah pǝsãh no cam. 8Dǝɓlii mo zyii ɓǝ man mo ge gŋ ne na ɓe, a ga nyi sǝr masãh ah ma joŋ fan lii nyi na. 9Na ŋwookyaŋ ne Dǝɓlii ka, na ɗuu gal za mai mo kaara ɓo gŋ ka ta. Na ka ga nĩi ra pǝgaɓ ya. Dǝɓlii no ne na, muŋ masǝŋ ki ra mai moo lǝŋ a byak ra daŋ ɓe, na ɗuu gal ka.#Yahu 3:16 10Za pãa daŋ kyeɓra ka ɓaa ra ne tǝsal pǝ wulli, amma ne pel gwari sǝ, za Israel kwora yǝk Dǝɓlii ge sǝǝ tǝtǝl tal mbǝro ma taini.
Mosus juupel mor zana
11Dǝɓlii faa nyi Mosus: Za mai ga soɓra me nai ga lii ne? Ka ga zyii nyiŋra me ya nai ga lii ne? Mor ame joŋ dǝǝbǝǝri camcam ne nahnǝn ɓǝǝra. 12Me ga pee syem maɓe' ah ge tǝ ɓǝǝ ka vǝr ra. Amma ma ɓo me ga tǝŋ za mafuu ah ne mo, a ga yea pǝpãare, a ga yeara laŋ pǝswah kal ra.
13Amma Mosus faa nyi Dǝɓlii: Amo zaŋ za mai pǝ̃ǝ gin sǝr Egiɓ ne ko ne swah ɓo. Ne cok za sǝr Egiɓ mo laara ɓǝ fan mai mo joŋ wo za ɓo ɓe,#Pǝ̃ǝ 32:11-14 14a ga faara ɓǝ ah nyi za mai mo kaara ɓo pǝ sǝr maiko. So zan ah laŋ laara ɓe, amo Dǝɓlii mo no ne ru, ne mai moo gin cuu suu ɓo nyi ru, swãh bam ɓo moo gin uu tǝ ɓuuru, so ne mai moo kal pel ɓuu ne waddǝǝ swãh bam ne comme, ne waddǝǝ wii ne suŋni. 15Mo kal ik za ɓo ra pǝ wul zǝzǝ̃ǝ mai ɓe, za camcam mo laara ɓǝ fan mai mo joŋ ɓo ɓe, a ga faara, 16amo ik za ɓo pǝ wul kǝsyicokki, mor mo gak ka zaŋ ra ga pǝ sǝr mai mo faa ɓǝ ah ɓo ka nyi nyi ra ne yao. 17Zǝzǝ̃ǝko Dǝɓlii, me pǝǝ mo, mo cuu swah ɓo nyi ru, mo joŋ ɓǝ mai mo faa ɓǝ ah ɓo, mor mo faa: 18Ame Dǝɓlii me ka ɓaŋ kpãh gwari ya, ame kwan syak pǝlli, me rõm faɓe' za ma ŋwoora kyaŋ. Amma me ka pee bai ŋgoŋ kiita faɓe' za wee tǝ wee ɓǝr ɓǝǝ ne wee ɓǝr wee ɓǝǝ ma fahfal ɓǝǝ ra ya.#Pǝ̃ǝ 20:5-6; 34:6-7; CuuƁ 5:9-10; 7:9-10 19Me pǝǝ mo, mo rõm faɓe' zai ko, tǝgbana 'yah lii ɓo mo ne ko, mo tǝ rõm ra daga ne cok mo urra gin sǝr Egiɓ ŋhaa tǝ'nahko.
20Dǝɓlii zyii faa: Me ga rõm faɓe' ɓǝǝ tǝgbana mo fii me ɓo tǝ ɓǝ ahe. 21Amma me faa, tǝgbana me no ne cee, so tǝgbana mai yǝk ɓe mo tǝ sǝr daŋ,#Yahu 3:18 22za mai ka ga danra sǝr Kanaan a. Kwora yǝk ɓe ne dǝǝbǝǝri mai me joŋ sǝr Egiɓ ne kǝsyicokki, amma liira me ɓo zahlǝŋ pǝpãa ɓe, zyii ka laara zah ɓe ya. 23Ka ga danra pǝ sǝr mai me faa ɓǝ ah ɓo nyi pa ɓǝǝ lii ra ka nyi nyi ra ya. Koo dǝɓ vaŋno kǝsyil za mai mo syẽa me ka ga dan gŋ ya. 24Amma dǝɓ yeɓ ɓe Kaleɓ a ne tǝ'yak ki cam, gbǝ yǝk ɓǝ ɓe ɓo, me ga zaŋ ko ga pǝ sǝr mai mo ge fooko ne ko. Ako ne morsǝ̃ǝ ah a ga rera sǝr ahe.#Jos 14:9-12 25Amalekien ne Kanaanien kaara ɓo pǝ cok ma tǝforoŋ ah ra zǝzǝ̃ǝko. Tǝ'nan we jin ge fahfalle, we pii soo ge kǝsyicok ka ga nǝfah kǝ zah mabii Syẽ.
Dǝɓlii ŋgoŋ kiita tǝ za Israel
26Dǝɓlii faa nyi Mosus ne Aron: 27Za maɓea mai ga ŋwoora kyaŋ ne me nai ga lii ne? Me laa ɓǝ nyee mai moo kyãhra tǝ ɓe ɓe. 28Mo faa nyi ra: Dǝɓlii faa sye: Tǝgbana me no ne cee, me haa zah ɓo, me ga joŋ wo ɓii tǝgbana mai we fii ɓo, ame Dǝɓlii me faa naiko. 29We ga wukki, wul ɓii ga myah kǝsyicok mai haihai, mor awe kyãh ɓǝ nyee wo ɓe, koo dǝɓ vaŋno kǝsyil ɓii mai mo joŋ syii ɓo jemma gwa ka ga dan sǝr ah ya.#Yahu 3:17 30Me faa kǝnah ɓo ka we ge kaa pǝ sǝr ahe, amma zǝzǝ̃ǝ mai koo dǝɓ vaŋno kǝsyil ɓii ka ga gŋ yao, sai Kaleɓ ne Joswa to. 31Awe faa a ga gbahra wee ɓiiri, amma me ga zaŋ ra ga pǝ sǝr mai we zyii 'yah ya ne ko, a ga kaara gŋ. 32Ma ɓii we ga wuk kǝsyicok nyeeko. 33Wee ɓii ga piira fan kǝsyicok syii jemma nai, mor we ge foo sǝr zah'nan jemma nai, a ga laara bone mor bai nyiŋ ɓii we nyiŋ me ya, ŋhaa sai ka we wuk kǝsyicok nyee vǝr tǝɗe' ɓe.#Yeɓ 7:36 34We ga re reba faɓe' ɓii syii jemma nai, mor we ge foo sǝr zah'nan jemma nai, syii vaŋno a zahwaa zah'nan vaŋno ta. So we ga tǝ, me laa ɓo ka pǝ'nyah ne we ya. 35Ame Dǝɓlii me faa ɓo, me ga joŋ wo za maɓe' mai mo taira zah ɓo wo ki ka ɓe naiko. Zune kǝsyil ɓii daŋ a ga wǝ kǝsyicok nyeeko. Ame Dǝɓlii me faa naiko.
36-37Za mai Mosus mo pee ra ge foo sǝrri, pii soora, ge keera ɓǝ maɓea ah ciicii, kǝǝra zahzyil za ur ɓǝ tǝ Dǝɓlii, mor ah Dǝɓlii ŋgoŋ kiita tǝ ɓǝǝ wukra. 38Kǝsyil za ma foo sǝr jemma tǝtǝl gwa, sai Joswa ne Kaleɓ ye coŋra sǝŋ to.
Tǝŋra ka ren sǝr ah ma kǝpel ahe
(CuuƁ 1:41-46)
39Ne cok Mosus mo kee ɓǝ mai Dǝɓlii mo faa daŋ nyi za Israel, yera yee pǝlli.#CuuƁ 1:41-46 40Tǝ'nan ah pǝ̃ǝra ne zah'nan pim ka ga ren sǝr ma tǝwaa ahe. Faara: Zǝzǝ̃ǝko ru zyeɓ suu ɓuu ka ga pǝ cok mai Dǝɓlii mo faa ɓǝ ah nyi ru kŋ ɓe. Goŋga yo, ru joŋ faɓe' ɓe.
41Amma Mosus faa: We ka laa zah Dǝɓlii ya mor fẽene? We ka ga yea ne pejii gŋ ya. 42We ge ka, mor Dǝɓlii ka ga yea ne we ya, za syiŋ ɓii ga nĩira we. 43Ne cok we ge zyaŋ ne Amalekien ne Kanaanien ɓe, a ga ikra we zah sal pǝ wulli, Dǝɓlii ka ga yea ne we ya, mor we zyii ka syee mor ah ya.
44Ne daŋ laŋ zyii laara ɓǝ ah ya, yeera kal ge pǝ sǝr ah ma tǝwaare. Amma sunduku gbanzah Dǝɓlii ne Mosus pǝ̃ǝ zahjul ɓǝǝ ge lal a. 45So Amalekien ne Kanaanien mai mo kaara ɓo gŋ ruura sal ne ra, kaara swah tǝ ɓǝǝra, ŋhaa nĩira ra ge dai Horma gbǝm.
Bible Moundang © Alliance Biblique du Tchad, 1996.