KEE ZANA 13
13
Mosus pee za foo sǝrri
(CuuƁ 1:19-33)
1Dǝɓlii faa nyi Mosus: 2Mo nǝǝ zaluu kǝsyil zahban jemma tǝtǝl gwa vaŋno vaŋno daŋ, mo pee ra ka mo ge foora sǝr Kanaan mai me nyi ɓo nyi za Israel. 3Mosus laa zah Dǝɓlii, pee ra gin kǝsyicok Paran kalle. Ɗii zaluu ah a naiko: 4Ma morsǝ̃ǝ ban Ruben ye Sammua we Zakkur. 5Ma morsǝ̃ǝ ban Simon ye Safat we Hori. 6Ma morsǝ̃ǝ ban Yuda ye Kaleɓ we Jefunne. 7Ma morsǝ̃ǝ ban Isakar ye Igal we Yuseɓ. 8Ma morsǝ̃ǝ ban Efraim ye Ose we Nun. 9Ma morsǝ̃ǝ ban Benyaamin ye Palti we Rafuu. 10Ma morsǝ̃ǝ ban Zebulon ye Gaddiel we Sodi. 11Ma morsǝ̃ǝ ban Manasse ye Gaddi we Susi. 12Ma morsǝ̃ǝ ban Dan ye Ammiel we Gemalli. 13Ma morsǝ̃ǝ ban Asǝr ye Setur we Mikal. 14Ma morsǝ̃ǝ ban Naftali ye Naabi we Vofsi. 15Ma morsǝ̃ǝ ban Gad ye Guel we Maki.
16Za marai ara ye za mai Mosus mo pee ra ka ga foo sǝrri. Mosus fer ɗii Ose we Nun ɗii ne Joswa.
17Ne cok Mosus mo pee ra ka ga foo sǝr Kanaan, faa nyi ra: We syee fahlii ma fah kǝsǝŋ, ka we dan pǝ sǝr ah ma fah morkǝsǝŋ, so ka we ge yee tǝ waare. 18Ka we ẽe sǝr ah ɗah a ɗǝne? So ka we ẽe pãa dǝfuu mai mo kaara ɓo gŋ, ka we ẽe ra, ara pǝswah ne? Wala ara ka pǝswah ya ne? 19Ka we so ẽe sǝr ah ɗah a pǝsãh ne? Wala ka pǝsãh ya ne? Zan ah kaara ɓo pǝ yaŋ manyee ah ra ma pǝ cok tǝgbai ah ra ne? Wala kaara ɓo pǝ yaŋ maluu ma ne ɓaale ah ra ne? 20We so ẽe sǝr ah ta, sǝr ah a joŋ fan no ne? Wala kpuu sǝr ah pǝlli ne? Wala ka pǝlli ya ne? We ɓaŋ lee syẽm kpuu mai mo lee ɓo pǝ sǝr ah ge ne ko. (Ne cok ah ka cok ŋhǝǝ lee kpuu vin ma lee kǝpel o.)
21Zan ah kalra, ɓaŋra fahlii ma fah kǝsǝŋ, tǝŋ foora sǝr ah daga kǝsyicok Zin ŋhaa ge dai Rehoɓ tǝ fahlii ma ga Hamat. 22Kǝpel ah danra pǝ sǝr ah nǝfah morkǝsǝŋ ahe, ge daira Hebron. Pǝ cok mai ban Ahiman, ne Sesai, ne Talmai, morsǝ̃ǝ za mawah ma ɗii ne Anakien mo kaara ɓo gŋ. (Yaŋ Hebron kaa kǝpel nyi yaŋ Zoan sǝr Egiɓ syii rǝŋ.) 23Ge daira pǝ cok tǝforoŋ Eskol, ŋgoŋra juu lee kpuu vin ma'man ah gŋ, za gwa ɓaŋra gak tǝ kǝndaŋ syee ne ko, so woora lee kpuu grenadin ne lee wuu gŋ ta. 24Ɗiira cok ah ne cok tǝforoŋ Eskol, mor ɓǝ juu lee kpuu vin mai za Israel mo ŋgoŋra gŋ.
25Ne cok mo foora sǝr ah dai zah'nan jemma nai o, so pii soora. 26Gera wo Mosus ne Aron tǝkine za Israel mapãa ah daŋ Kades, kǝsyicok Paran, keera ɓǝ fan mai mo kwora nyi ra, so cuura lee syẽm kpuu mai mo ɓaŋra pǝ sǝr Kanaan ge ne nyi ra ta. 27Faara nyi Mosus: Aru ge foo sǝr mai mo pee ru ge gŋ ka foo ɓe, sǝr ah a pǝsãh no cam, sǝr ma joŋ fan o, aru ɓaŋ lee syẽm kpuu sǝr ah ge ɓo ne nyẽeno. 28Amma za mai mo kaara ɓo pǝ sǝr ah ara pǝswahe, yaŋ ɓǝǝ yaŋ maluu ah ra yo, so a ne ɓaale daŋ. Aru kwo morsǝ̃ǝ za mawah ah ra gŋ ta. 29Amalekien kaara ɓo pǝ sǝr ah nǝfah morkǝsǝŋ ahe. Hetien, Jebusien, ne Amorien kaara ɓo tǝ waare. Kanaanien laŋ kaara ma ɓǝǝ ɓo kah mabii Mediterrania, nǝkah el Yordan.
30Za tǝŋ kyãhra ɓǝ nyee wo Mosus, so Kaleɓ i ɓǝ ah ge nyi ra zah faa: Na ge re sǝr ahe, mor ana pǝswahe, na gak kaa swah tǝ ɓǝǝra. 31Amma za mai mo gera ne Kaleɓ faara: Ka, na ka gak ruu sal ne za mai mo pǝ sǝr ah ya, ara pǝswah kal na ɓe. 32Keera ɓǝ masãh ah nyi za Israel tǝtǝl sǝr mai mo ge foora ya. Faara: Sǝr ah ka gak joŋ fakpãhpǝǝ kii nǝn wol za mai mo kaara ɓo gŋ ya. Za mai ru kwo ra gŋ daŋ ara pǝwah no cam. 33Aru kwo za mawah lii ah ra ma morsǝ̃ǝ Anak gŋ ta. Aru kwan suu ɓuu wo ɓǝǝ na tǝzyeere, ara laŋ a kwanra ru nai ta.#Tǝŋ 6:4
Bible Moundang © Alliance Biblique du Tchad, 1996.