KEE ZANA 1
1
Kee za Israel
1Ne syii patǝ gwa ah fahfal za Israel mo pǝ̃ǝra gin sǝr Egiɓ, ne zah'nan vaŋno pǝzyil fĩi gwa ahe, Dǝɓlii faa ɓǝ nyi Mosus pǝ tal mbǝro ma tai kǝsyicok Sinai, faa:#KeeZ 26:1-51 2Amo ne Aron we ŋwǝǝ pãa za Israel ne morsǝ̃ǝ ɓǝǝ tǝkine za yaŋ ɓǝǝra, we ŋwǝǝ tǝɗii 3za wǝǝ daŋ mai mo joŋ syii ɓo jemma gwa koo ma kal ahe, za mai moo gak ruura salle. 4We fii dǝɓlii vaŋno daga kǝsyil zahban daŋ ka mo gbah jol ɓiiri.
5Za mai mo syenra ra mor yeɓ ah a naiko: Ma kǝsyil ban Ruben ye Elisur we Sedur. 6Ma kǝsyil ban Simon ye Selumiel we Suriskadai. 7Ma kǝsyil ban Yuda ye Naason we Amminadaɓ. 8Ma kǝsyil ban Isakar ye Netanel we Zuar. 9Ma kǝsyil ban Zebulon ye Eliaɓ we Helon. 10Ma kǝsyil ban Efraim we Yuseɓ ye Elisama we Ammihud. Ma kǝsyil ban Manasse ye Gamaliel we Pedasur. 11Ma kǝsyil ban Benyaamin ye Abidan we Gidioni. 12Ma kǝsyil ban Dan ye Ahizer we Amiskadai. 13Ma kǝsyil ban Asǝr ye Pagiel we Okran. 14Ma kǝsyil ban Gad ye Eliasaf we Dǝwel. 15Ma kǝsyil ban Naftali ye Ahira we Enan. 16Za marai daŋ ara ye zaluu ma kǝsyil ban za ɓǝǝra, mai mo syenra ra gin kǝsyil za pãa ka joŋ yeɓ nyẽeko.
17Mosus ne Aron woora za matǝ jemma tǝtǝl gwa ko, 18so taira za pãa daŋ ne zah'nan vaŋno pǝzyil fĩi patǝ gwa ahe. Ŋwǝǝra tǝɗii za daŋ ne morsǝ̃ǝ ɓǝǝ tǝkine za yaŋ ɓǝǝra, tǝɗii za mai mo joŋra syii ɓo jemma gwa, koo ma kal ahe, ŋwǝǝra ra, so keera pãa ɓǝǝ 19tǝgbana mai Dǝɓlii mo faa ɓo. Mosus ŋwǝǝ za kǝsyicok Sinai. 20-46Za mai mo joŋra syii ɓo jemma gwa, koo ma kal ah mai moo gak ruura sal daŋ ŋwǝǝra tǝɗii ɓǝǝ ne morsǝ̃ǝ ɓǝǝ tǝkine za yaŋ ɓǝǝra. Tǝŋra gin tǝ ban Ruben we Yakuɓ malii. Pãa ɓǝǝ lǝǝ ge ɓo mor ki naiko: Ban Ruben - 46.600. Ban Simon - 59.300. Ban Gad - 45.650. Ban Yuda - 74.600. Ban Isakar - 54.400. Ban Zebulon - 57.400. Ban Efraim - 40.500. Ban Manasse - 32.200. Ban Benyaamin - 35.400. Ban Dan - 62.700. Ban Asǝr - 41.500. Ban Naftali - 53.400. Tai daŋ - 603.550.
47Amma ŋwǝǝra pãa Lewitien ge tǝkine ban marai ya. 48Mor Dǝɓlii faa nyi Mosus: 49Ne cok we tǝ kee za Israel ɓe, we kee ban Lewi ge tǝkine ra ka. 50Amma we soɓ ɓǝ tal mbǝro ma tai ne ɓǝ fan joŋ yeɓ ma ɓǝr ah daŋ nyi ra, ka mo byakra tal mbǝro ne fan yeɓ ah ra, ka mo joŋra yeɓ ɓǝr ahe, mo gbahra jul ɓǝǝ kah ahe. 51Ne cok we zol tǝ ga ɓe, ka Lewitien mo nǝǝra tal mbǝro, ka we so ge ɗǝr ɓe, mo peara faɗa. Koo zune mo ge kah tal mbǝro gwari ɓe, ka mo ira ko pǝ wulli. 52Tǝcoŋ za Israel daŋ mo gbahra jul ɓǝǝ camcam, zune daŋ mo yea ne kul za mǝ ah ne tutowal ahe. 53Amma Lewitien mo gbahra jul ɓǝǝ kah tal mbǝro mor ka mo byakra, ka koo dǝɓ vaŋno mo syee ge kah ah gwari ka kǝǝ me ɓaŋ kpãh tǝ za Israel ka. 54So za Israel joŋra fan mai daŋ Dǝɓlii mo faa ɓǝ ah nyi Mosus.
Bible Moundang © Alliance Biblique du Tchad, 1996.