LEWITIEN 9
9
Aron tǝŋ joŋ syiŋrĩ
1Fahfal zah'nan ma kan ɓǝǝ tǝ yeɓ zahsyiŋ ah mo baa o, Mosus ɗii Aron ne wee ahe, ne zaluu za Israel daŋ. 2Faa nyi Aron: Mo ɓaŋ ŋgǝǝri ma mor joŋ syiŋ ma ɓaŋ faɓe' ga lalle, ne kǝbǝr ma mor joŋ syiŋ suŋwii, mai suu ɓǝǝ mo ka pǝɓea ya, ka mo joŋ syiŋ wo Dǝɓlii ne ko. 3So mo faa nyi za Israel, ka mo gbǝra kǝdai mor joŋ syiŋ ma ɓaŋ faɓe' ga lal ge ne ta, ne we dǝǝ mai mo joŋ syii ɓo vaŋno, ne we pǝsãhm mai mo joŋ syii ɓo vaŋno, mai suu ɓǝǝ mo ka pǝɓea ya, ka joŋ syiŋ suŋwii ne ko, 4ne ŋgǝǝri ne kǝbǝr ma mor joŋ syiŋ ma nyi jam. Ka mo joŋra syiŋ ne wo Dǝɓlii, tǝkine fan nyi ma farel mai mo suu ɓo ne nǝmmi. Mo joŋra naiko, mor Dǝɓlii tǝ ga cuu suu ah nyi ra tǝ'nahko.
5Woora fan mai Mosus mo faa ɓǝ ah nyi ra daŋ ge zahfah tal mbǝro ma tai ne ko, za pãa daŋ taira ɓo gŋ ka juupel wo Dǝɓlii. 6Mosus faa nyi ra: Dǝɓlii faa ɓo nyi we ka joŋ fan mai daŋ, mor ka mo cuuko yǝk ah gee we lalle. 7So faa nyi Aron: Mo ge wo cok joŋ syiŋrĩ, mo joŋ syiŋ ma ɓaŋ faɓe' ga lalle, ne syiŋ suŋwii, mor ka ɓaŋ faɓe' ɓo ga lal ne mǝ za pãa daŋ. Mo joŋ syiŋ ah mor ka ɓaŋ faɓe' za ga lalle, tǝgbana mai Dǝɓlii mo faa ɓo.#Yahu 7:27
8Aron kal ge wo cok joŋ syiŋrĩ, ge ŋgoŋ ŋgǝǝri, mor ka joŋ syiŋ ma ɓaŋ faɓe' ah ga lalle. 9Wee ah ɓaŋra syim ŋgǝǝri ah gee ko ne ko, so maa tǝwee jol ah ge pǝ syim ahe, saŋ tah ge wo ciŋ mai mo tǝ cok joŋ syiŋrĩ. So sǝǝ tǝcoŋ syim ah ge tǝ sǝr kah cok joŋ syiŋrĩ. 10So ɓaŋ nǝm ahe, nyeere, ne raita zyiiri, syak tǝ wii tǝ cok joŋ syiŋrĩ, tǝgbana mai Dǝɓlii mo faa ɓǝ ah nyi Mosus. 11Amma ge syak nǝǝ, ne wak ah daŋ ne wii fahfal jul lalle.
12So Aron ŋgoŋ faɓal ma joŋ syiŋ suŋwii ne mor suu ahe, wee ah ɓaŋra syim ah gee ko ne ko, so mee syim ah ge tǝ cok joŋ syiŋ wo nyah ah nai daŋ. 13So nyira tǝtǝl faɓal ah ne nǝǝ ah manyeeki ah nyi ko, syak tǝ wii tǝ cok joŋ syiŋrĩ. 14Aron so vãh ɓǝr ah ne ɓal ah ra, so syak tǝ wii tǝ cok joŋ syiŋ tǝtǝl tǝcoŋ fan ma joŋ syiŋ suŋwii.
15Fahfal ah so ge ne fan nyi mai za mo nyira ɓo, so ɓaŋ kǝdai ma joŋ syiŋ ma mor ɓaŋ faɓe' za ga lalle, ŋgoŋ joŋ syiŋ ne tǝgbana mai mo joŋ syiŋ ma mor ɓaŋ faɓe' suu ah ga lal ta. 16So ge ne faɓal ma mor joŋ syiŋ suŋwii ta, so joŋ syiŋ ne tǝgbana ɓǝ lai ah mo cuu ɓo. 17So ge ne fan nyi ma farelle, fõo sum baa jolle, syak tǝ wii tǝ cok joŋ syiŋrĩ. (Mai so ɓoo ge ɓo tǝtǝl syiŋ suŋwii mai moo joŋra zah'nan Masǝŋ daŋ.) 18Aron so ŋgoŋ ŋgǝǝri, ne kǝbǝrri, tǝgbana fan joŋ syiŋ ma nyi jam. Wee ah ɓaŋra syim ah gee ko ne ko, so mee syim ah ge tǝ cok joŋ syiŋ wo nyah ah nai daŋ.#Lew 3:1-11 19So ɓaŋ nǝm ŋgǝǝri, ne mǝ kǝbǝrri, 20kan ge tǝ pel ŋgǝǝri, ne tǝ pel kǝbǝr ah sǝŋ, so ɓaŋ kan ge tǝ cok joŋ syiŋ ne ko, so syak nǝm ah daŋ tǝ wii tǝ cok joŋ syiŋrĩ. 21So woo pel nǝǝ ah ra, ne ɓal kǝfal ma jokǝsãh ah ge sǝŋ pel Dǝɓlii tǝgbana fan nyi ma mor za joŋzahsyiŋrĩ, na mai Mosus mo faa.
22Ne cok Aron mo vǝr joŋ syiŋrĩ, so woo jol ah gbah ge sǝŋ tǝtǝl zana, ẽe ra, so ɗǝr ge sǝŋ.#KeeZ 6:22-26 23Mosus ne Aron danra ge pǝ tal mbǝro ma taini. Ne cok mo pǝ̃ǝra ge lalle, so ẽera zana, Dǝɓlii cuu yǝk ah ge lal nyi za daŋ. 24Ne pel gwari sǝ, Dǝɓlii pee wii gin sǝŋ ge, ge sye fan joŋ syiŋ ne nǝm nǝǝ ah mo tǝ cok joŋ syiŋrĩ. Ne cok za daŋ mo kwora naiko, ŋwaara ɓǝ ne laa pǝ'nyahre, so ɗǝmra zahpel ge sǝŋ.
Bible Moundang © Alliance Biblique du Tchad, 1996.