LEWITIEN 8
8
Rǝkra Aron ne wee ah tǝ yeɓɓe
(Pǝ̃ǝ 29:1-37)
1Dǝɓlii faa nyi Mosus: 2Mo zaŋ Aron ne wee ah ge zahfah tal mbǝro ma tai ne ko, ka mo woo mbǝro za joŋzahsyiŋ ge ne ta, tǝkine nǝm ma syee ga tǝtǝl daŋ, so ne ŋgǝǝri ma joŋ syiŋ ma ɓaŋ faɓe' ga lalle, ne kǝbǝr gŋ gwa, ne paŋgasso mai mo joŋ ɓo ka ne fan mbǝ̃ǝ ya col vaŋno. 3So ka mo tai za pãa daŋ ge gŋ.
4Mosus joŋ tǝgbana mai Dǝɓlii mo faa nyi ko. Ne cok za pãa daŋ mo taira, 5faa nyi ra: Zǝzǝ̃ǝko, me ga joŋ fan mai Dǝɓlii mo faa ɓǝ ah ɓo nyi me ka me joŋ.
6Mosus woo Aron ne wee ah er bii nyi ra. 7So ɓoo mbǝro mawah ah ne mbǝro ma ɗii ne manto nyi Aron, so baŋ haŋ nyi ne zyim baŋ suu, so ɓoo ɗaŋsikki nyi, so baŋ ne ganda ah mai mo kaŋ ɓo kaŋ. 8So baŋ fan ma saa zahbii ge tǝtǝl ahe, maa Urim ne Tummin#8:8 Urim ne Tummin ye tǝsal manyeeki ah gwa mai pa joŋzahsyiŋ moo joŋ yeɓ ne ka tan 'yah Masǝŋ. ge pǝzyil ahe. 9So kim syim zahtǝtǝl nyi nyi, so saa fan ma na tol ma ne vãm kaŋnyeeri ge tǝ zyim zahtǝtǝl ahe, tǝgbana mai Dǝɓlii mo faa ɓo nyi ko.
10So Mosus ɓaŋ nǝmmi, syee ge tǝ tal mbǝro ne fan mai mo ɓǝr ah daŋ. Ne joŋ ah naiko, nǝǝ fan ah ra ne daŋ mor Dǝɓlii. 11Ɓaŋ nǝm biŋ, mee ge tǝ cok joŋ syiŋ zahlǝŋ rǝŋ, tǝkine fan yeɓ mai mo no gŋ daŋ, ne tahsah daaro, ne cok kan ahe, mor ka joŋ fan ah ra daŋdaŋ mor Dǝɓlii. 12So syee nǝm ge tǝtǝl Aron biŋ, kan ko tǝ yeɓ ne ko. 13Fahfal ah Mosus woo wee Aron, ɓaa mbǝro nyi ra, so bam haŋ nyi ra ne zyim baŋ suu, maa njok ge nyi ra tǝtǝlli, tǝgbana mai Dǝɓlii mo faa nyi ko.
14Mosus so ɓaŋ ŋgǝǝri ma mor joŋ syiŋ ma ɓaŋ faɓe' ga lalle, Aron ne wee ah rǝkra jol ɓǝǝ ge tǝtǝl ahe. 15Mosus ŋgoŋ ŋgǝǝri ahe, ɓaŋ syim ah biŋ, so saŋ ne tǝwee jolle, tah ge wo ciŋ mai mo tǝ cok joŋ syiŋrĩ mor ka nǝǝ cok ah ne mor Dǝɓlii. So sǝǝ tǝcoŋ syim ah ge tǝ sǝr kah cok joŋ syiŋrĩ. Ne fahlii mai vãh cok ah ne ko, joŋ cok ah pǝsãh mor Dǝɓlii. 16Mosus ɓaŋ nǝm mai mo ɓǝr ah daŋ, raita zyii ahe, ne nyeere, ne nǝm mai mo wol ah daŋ, so syak ne wii tǝ cok joŋ syiŋrĩ. 17So ɓaŋ tǝcoŋ nǝǝ ŋgǝǝri ahe, ne wak ahe, tǝkine fan ɓǝr ah ra daŋ ge syak tǝ wii fahfal jul lalle, tǝgbana mai Dǝɓlii mo faa ɓo nyi ko.
18Mosus so ɓaŋ kǝbǝr ma mor joŋ syiŋ suŋwii, Aron ne wee ah rǝkra jol ɓǝǝ ge tǝtǝl ahe. 19Mosus ŋgoŋ kǝbǝr ahe, so mee syim ah ge tǝ cok joŋ syiŋ wo nyah ah nai daŋ. 20-21So ŋgom nǝǝ kǝbǝr ahe, so vãh fan ɓǝr ah ra ne ɓal ahe, syak tǝtǝl ah ne nǝm ah ne tǝcoŋ nǝǝ kǝbǝr ah daŋ tǝ wii tǝ cok joŋ syiŋrĩ, tǝgbana mai Dǝɓlii mo faa ɓo nyi ko. Syiŋ suŋwii mai ako ye fan nyi ma farelle. Dǝɓlii laa fuŋ fan nyi ah pǝ'nyahre.
22So Mosus ɓaŋ kǝbǝr patǝ gwa ahe, mai mo mor ka rǝk za joŋzahsyiŋ tǝ yeɓɓe, Aron ne wee ah rǝkra jol ɓǝǝ ge tǝtǝl ahe. 23Mosus ŋgoŋ kǝbǝr ahe, so saŋ syim ah kan ge tǝ goosok Aron ma nǝfah jokǝsãhe, ne tǝ malamlii jol ah ma fah jokǝsãhe, ne tǝ malamlii ɓal ah ma nǝjokǝsãhe. 24So woo wee Aron, so kan syim ge nyi ra tǝ goosok ɓǝǝ ma nefah jokǝsãh biŋ biŋ, ne tǝ malamlii jol ɓǝǝ ma nefah jokǝsãhe, ne tǝ malamlii ɓal ɓǝǝ ma nejokǝsãhe. So Mosus mee tǝcoŋ syim ah daŋ ge tǝ cok joŋ syiŋ wo nyah ah nai daŋ. 25So ɓaŋ nǝm kǝbǝrri, nǝm ma wo sǝ̃ǝ ahe, tǝkine nǝm mai mo tǝ ɓǝr ah daŋ, ne raita zyiiri, ne nyeere, ne nǝm mai mo wol ah daŋ, tǝkine sah nǝǝ ah ma jokǝsãhe. 26So ɓaŋ paŋgasso mai mo pǝ col vaŋno, mai mo ka ne fan mbǝ̃ǝ ya, mo joŋ ɓo ne nǝmmi, mo nyira ɓo mor Dǝɓlii, so ne paŋgasso mai mo joŋra ɓo pǝnyee pǝnyee vaŋno, woo rǝk ge tǝ nǝm ne sah nǝǝ ahe, 27so woo fan ah daŋ nyi ge nyi Aron ne wee ah jolle, so nyira fan nyi ah nyi Dǝɓlii. 28Mosus so nyiŋ farel ah jol ɓǝǝ faɗa, so tǝǝ tǝ wii tǝ cok joŋ syiŋrĩ tǝtǝl tǝcoŋ fan ma joŋ syiŋ suŋwii. Syiŋ ma joŋ mor kan dǝɓ tǝ yeɓ yo, syiŋ farel o, Dǝɓlii laa fuŋ fan nyi ah pǝ'nyahre. 29So Mosus ɓaŋ pel nǝǝ ahe, so nyi nyi Dǝɓlii, zah faren mǝ Mosus mo pǝzyil nǝǝ gwii ma joŋ syiŋ ma mor kan dǝɓ tǝ yeɓ yo. Mosus joŋ fan daŋ tǝgbana mai Dǝɓlii mo faa ɓo nyi ko ka joŋni.
30Mosus so ɓaŋ nǝm ma syee ga tǝtǝlli, ne syim mai mo tǝ cok joŋ syiŋrĩ, so mee syim ah ge wo Aron, ne wee ahe, tǝkine wo mbǝro ɓǝǝra. Ne fahlii mai cuu, nǝǝra ɓo ne mbǝro ɓǝǝ daŋ rǝk ɓo mor Dǝɓlii.
31Mosus faa nyi Aron ne wee ahe: We ɓaŋ nǝǝ ah ge zahfah tal mbǝro ma tai ne ko, ka we kǝǝre, we re gŋ ne paŋgasso mai mo pǝ col mo nyira ɓo mor kan dǝɓ tǝ yeɓɓe, tǝgbana mai Dǝɓlii mo faa ɓǝ ah nyi me, ka me faa nyi we, we joŋ. 32Tǝcoŋ nǝǝ ne paŋgasso ah mo coŋ ɓe, ka we syak ne wii. 33We zol gin zahfah tal mbǝro ma tai ka, ŋhaa joŋ zah'nan rǝŋ, sai ka zahsyiŋ ma kan ɓii tǝ yeɓ baa ɓe. 34Dǝɓlii ye faa ɓo nyi na, ka na joŋ fan mai na joŋ ɓo tǝ'nahko, mor ka ɓaŋ faɓe' ɓii ga lalle. 35We kaa zahfah tal mbǝro ma tai com ne suŋ daŋ, zah'nan rǝŋ, we joŋ tǝgbana mai Dǝɓlii mo faa ɓo. We joŋ nai ya ɓe, we ga wukki. Ɓǝ mai Dǝɓlii mo faa ɓo nyi me koiko. 36So Aron ne wee ah joŋra fan mai daŋ Dǝɓlii mo faa ɓǝ ah nyi ra ne zah Mosus.
Bible Moundang © Alliance Biblique du Tchad, 1996.