LEWITIEN 27
27
Ɓǝ lai tǝ ɓǝ fan ma nyi nyi Dǝɓlii
1Dǝɓlii faa nyi Mosus: 2Mo faa nyi za Israel sye: Dǝɓ mo gbǝ zah pel Dǝɓlii ka nyi dǝfuu nyi ko, dǝɓ ah gak wǝǝ tǝtǝl dǝɓ ah ne lak tǝgbana ɓǝ lai ah mo cuu ɓo, 3-7tǝgbana 'man lak ah mo kanra ɓo:
- Dǝwor mai mo joŋ syii ɓo jemma gwa ŋhaa dai syii jemma yea, lak ah solai vãm jemma dappe.
- Madǝwin ye ɓe, lak ah solai vãm jemma sai.
- We wor ma joŋ syii dappe ŋhaa dai syii jemma gwa ye ɓe, lak ah solai vãm jemma gwa.
- Mǝlaŋ win ye ɓe, lak ah solai vãm jemma vaŋno.
- Mo we wor mai mo joŋ fĩi ɓo vaŋno ŋhaa dai syii dappe ye ɓe, lak ah solai vãm dappe.
- Mo mǝlaŋ win o, lak ah solai vãm sai.
- Mo dǝwor ma joŋ syii tǝgbana jemma yea wala ma kal ah ye ɓe, lak ah solai vãm jemma tǝtǝl dappe.
- Mo madǝwin ye mo joŋ syii ɓo tǝgbana jemma yea wala ma kal ah ye ɓe, lak ah solai vãm jemma vaŋno.
8Dǝɓ mai mo gbǝ zah ɓo mo pǝsyak pǝlli, mo ka gak soo soo ah na mai mo kan ɓo ya ɓe, sai ka mo zaŋra dǝɓ ah ge pel pa joŋzahsyiŋ ne ko, ka pa joŋzahsyiŋ mo tǝrko soo ah kan ɓyaŋ ki ne swah dǝɓ ah ka mo gak soo ko.
9Dǝɓ mo haa zah mo faa zye ga nyi faɓal nyi Dǝɓlii, faɓal ah mo 'nyah suu Dǝɓlii ɓe, ka fan nyi daŋ mai dǝɓ ah moo nyi nyi Dǝɓlii, ka a pǝsãhe. 10Dǝɓ mai mo gbǝ zah ɓo ka nyi faɓal nyi Dǝɓlii, mo kunko tǝtǝl ah ne maki ah ka. Mo kal kun ko ɓe, ka faɓal ah gwa daŋ mǝ Dǝɓlii yo. 11Amma mo gbǝko zah ɓo ka nyi faɓal mai Dǝɓlii moo kwan a ne 'nahm nyi ko, so Dǝɓlii laŋ mo ka ga nyiŋ fan nyi ah ya, ka dǝɓ ah mo gbǝko faɓal ah ge wo pa joŋzahsyiŋ ne ko, 12ka pa joŋzahsyiŋ mo cuuko lee ahe, nǝn sãh fan ah wala ɓe' ah mo ne ko, pa joŋzahsyiŋ ye mo ŋgoŋ ɓǝ ahe. 13Dǝɓ ah mo 'yahko ka so jin lee faɓal ah ɓe, sai ka mo leeko na lak ah mo cuu ɓo, mo so ɓooko jemma gwa ma pǝzyil temere ge gŋ faɗa.
14Ne cok dǝɓ mo soɓ yaŋ ah nyi Dǝɓlii ɓe, ka pa joŋzahsyiŋ mo cuuko lee yaŋ ah nǝn sãh yaŋ ah wala ɓe' yaŋ ahe, ka lee ah ko sǝǝ ko. 15Dǝɓ mai mo nyi yaŋ ah nyi Dǝɓlii, mo 'yahko ka so jin lee ɓe, sai mo leeko na lak ah mo cuu ɓo, mo so ɓooko jemma gwa ma pǝzyil temere ge gŋ faɗa.
16Dǝɓ mo bǝǝ 'wah ah nyi nyi Dǝɓlii ɓe, sai we cuu lee ah nǝn 'man nah fan mai moo ruura pǝ 'wah ahe, sak sor vaŋno, soo ah solai vãm jemma vaŋno. 17Dǝɓ ah mo nyi 'wah ah ɓo nyi Dǝɓlii fahfal syii rõm gwari sǝ ɓe, ka lee ah mai mo kan ɓo, mo yea noo sǝ. 18Amma mo ge nyiko 'wah ah ɓo ne cok maki ah fahfal hai ɓe, sai ka pa joŋzahsyiŋ mo cuuko soo ah nǝn pãa syii mai mo coŋ ɓo, ŋhaa ka ga dai syii rõmme. Mo nǝǝko lee ah ge lal naiko. 19Dǝɓ mai mo bǝǝ 'wah ah nyi ɓo nyi Dǝɓlii, mo 'yahko ka so jin lee ɓe, sai mo leeko na lak ah mo cuu ɓo, mo so ɓooko jemma gwa ma pǝzyil temere ge gŋ faɗa. 20Amma mo leeko 'wah ah jol Dǝɓlii ya, mo soɓ dǝɓ ki lee ɓe, ka ka ne fahlii ka so jin lee 'wah ah kpee yao. 21Ne cok syii rõm mo ge dai ɓe, 'wah ah ga ciŋ mǝ Dǝɓlii ga lii o, a ga yea mor za joŋzahsyiŋrĩ.
22Dǝɓ mo nyi 'wah mai mo leeko lee nyi Dǝɓlii ɓe, 23sai ka pa joŋzahsyiŋ mo cuuko lee 'wah ah nǝn pãa syii mai mo coŋ ɓo, ŋhaa ka ga dai syii rõmme, sai ka dǝɓ ah mo sooko lak ah com ahe, lak ah mǝ Dǝɓlii yo. 24Ne cok syii rõm mo ge dai ɓe, 'wah ah a jin ga jol pah ah ma kǝpel katãako, wala ga jol morsǝ̃ǝ ahe.
25Sai lee fan daŋ mo yea tǝgbana lak ah mai mo kanra ɓo.
26Dǝɓ ka gak ɓaŋ welii faɓal ah ka nyi nyi Dǝɓlii ya, mor mǝ Dǝɓlii ye daga ɓaa sǝ, tǝgbana mai mo faako ɓǝ ah ɓo. We dǝǝ ma byaŋ kǝpelle, we pǝsãhmme, wala mo we sǝgwii yo daŋ, mǝ Dǝɓlii yo. 27Amma welii faɓal mai Dǝɓlii moo kwan ne 'nahm ye ɓe, we gak soo tǝl ah ne lak tǝgbana mai lee ah mo cuu ɓo. We so ɓoo jemma gwa ma pǝzyil temere ge gŋ faɗa. We soo tǝl ah ne lak ya ɓe, ka pa joŋzahsyiŋ mo leeko fan ne jol dǝɓ ki, na lee ah mo kan ɓo.
28Fan mai dǝɓ mo nyi nyi Dǝɓlii ɓe daŋ, mo dǝfuu yo, wala mo faɓal o, koo mo 'wah ah yo, ka gak ɓaŋ lee fan ne ya, ka so jin lee laŋ ya ta, ka fan ah ra mǝ Dǝɓlii ye ga lii o.#KeeZ 18:14 29Koo dǝfuu mai mo nyira ɓo nyi Dǝɓlii, dǝɓ ka gak soo tǝl ah ne lakr a, amma a mor ka in pǝ wulli#27:29 “a mor ka in pǝ wulli wala a mor joŋ syiŋrĩ.”.
30Ɓǝ patǝ jemma fakpãhpǝǝ: mo sor o, wala mo lee syẽm kpuu yo daŋ, mǝ Dǝɓlii yo.#KeeZ 18:21; CuuƁ 14:22-29 31Dǝɓ mo tǝ 'yah ka so jin lee ɓe, sai mo leeko na mai lee ah mo kan ɓo, mo so ɓooko jemma gwa ma pǝzyil temere ge gŋ faɗa. 32Faɓal mai mo yaŋ daŋ, vaŋno ma pǝzyil jemma daŋ, mǝ Dǝɓlii yo. Ne cok we kee fan ah dai jemma ɓe daŋ, mǝ Dǝɓlii gŋ vaŋno. 33Pah faɓal ah mo woŋ tǝgǝǝ masãh ah ne maɓea ah ka, mo kunko tǝtǝl ah ka ta. Mo kal ɓaŋko maki ah kun tǝtǝl maki ah ne ɓe, ka faɓal ah gwa daŋ mǝ Dǝɓlii yo, ka dǝɓ ah mo sooko tǝ fan ah ra ne lak ka.
34Mai ɓǝ lai mai Dǝɓlii mo nyi nyi Mosus tǝ waa Sinai, ka mo cuuko nyi za Israel o.
Bible Moundang © Alliance Biblique du Tchad, 1996.