LEWITIEN 26
26
Eẽ Masǝŋ tǝ ɓǝ laa zahe
(CuuƁ 7:12-24; 28:1-14)
1Dǝɓlii faa: We zyeɓ masǝŋ ki cam, wala foto fanne, wala ka ɓaŋ tǝsal peeni, wala ka zyeɓ fan ne tǝsal mor ka juupel wol ah ka. Ame ye Dǝɓlii Masǝŋ ɓiiri.#Pǝ̃ǝ 20:4; Lew 19:4; CuuƁ 5:8; 16:21-22; 27:1 2We gbǝ yǝk ɓǝ zah'nan com 'yak ɓe ra, we yii yǝk ɓǝ tal mbǝro ɓe ta. Ame ye Dǝɓlii.
3We laa ɓǝ lai marai we so syee mor ah ne goŋga ta ɓe,#CuuƁ 11:13-15; 28:1-14 4me ga pee bam gin tǝ nyi we ne cok ahe, 'wah ɓii ga joŋ fakpãhpǝǝ pǝsãhe, kpuu mai we pea ɓo a ga lee syẽm pǝlli. 5Sor ɓii ga joŋ pǝlli, we ga yea tǝ cen pǝ jol cen ba, so ka cok ŋhǝǝ lee kpuu vin ge ɓe. We ga yea tǝ ŋhǝǝ lee kpuu vin pǝ jol ŋhǝǝ ba, so ka cok ruu sor maki ah ge ɓe faɗa. We ga lwaa farel mai daŋ zahzyil ɓii mo ne 'yah ah ka renne, so we ga kaa pǝ sǝr ɓii jam.
6Me ga nyi jam nyi we pǝ sǝr ɓiiri, we ga swah sǝŋ nwãh nǝm jam, we ka ɗuu gal fan ki ya. Me ga vǝr fafyãh maɓea ah ra gin pǝ sǝr ɓiiri, sal ka ga yea gŋ ya ta. 7We ga kaa kacella tǝ za syiŋ ɓiiri. 8Za dappe kǝsyil ɓii a ga nĩira za temere, za temere a ga nĩira za ujenere jemma. 9Me ga ẽe we, me ga nyi wee nyi we pǝlli. Me ga joŋ ɓǝ gbanzah ɓe mai me gbǝ ɓo ne we. 10Ne cok wee ga ce sor ɓii mafuu ah pǝ jolle, ka we re ma syii mai mo kal vǝr laŋ ya ba, sai we ga woo myah ga lalle, ka soɓ cok rǝk mafuu ah ga gŋ. 11Me ga kaa kǝsyil ɓii ɓǝr tal mbǝro ɓe, zahzyil ka ga sye me tǝ ɓii yao. 12Me ye ga yea Masǝŋ ɓiiri, we ga ciŋ za ɓe.#2 Kor 6:16 13Ame Dǝɓlii Masǝŋ ɓiiri, me ye zaŋ we gin sǝr Egiɓ pǝ̃ǝ ne ko, mor ka we joŋ byak kao. Ame ɗǝr faswaa mai mo tǝtǝl ɓii ge lal ɓe, me soɓ we ɓo ne tǝtǝl ɓiiri, ka we syee ɓaŋ tǝtǝl kan sǝŋ.
Kiita tǝ ɓǝ bai laa zahe
(CuuƁ 28:15-68)
14Dǝɓlii faa: We syee mor ɓǝ lai ɓe ra ya ɓe, we ga lwaa kiita. 15We kal zǝǝ tǝ ɓǝ gbanzah mai me gbǝ ɓo ne we, we zyii ka syee mor ɓǝ lai ɓe ne ɓǝ cuu ɓe ra ya ɓe, 16me ga ŋgoŋ kiita tǝ ɓiiri, me ga pee ɓeɓ ge tǝtǝl ɓiiri, syem maɓe' ah ne syem tǝtǝl 'wah magaɓ ah a ga gaɓ we, ŋhaa nahnǝn ɓii ga rǝ̃ǝ, so mazwãhsuu ɓii ga laa bone ta. We ga ruu sor 'wah ɓiiri, amma we ka ga lwaa re ya, mor za syiŋ ɓii ga ɗaŋra we, a ga rera fan ahe. 17Me ka ga yea ne we ya, mor ka za syiŋ ɓii mo nĩira we, za mai mo syiŋra we ɓo mo kaara swah tǝtǝl ɓiiri, gal ga re we, we ga rǝk ɗulli, so pa ma nĩi mor ɓii laŋ ka ga yea ya.
18Fahfal fan marai daŋ, we so ka tǝ laa zah ɓe ya kpǝ ɓe, me ga joŋ kiita ɓii so ga pel zahlǝŋ rǝŋ. 19Me ga vǝr yii suu ɓii gin tǝtǝl ɓiiri, bam ka ga tǝ ya, sǝr ɓii ga yak pǝyak tǝgbana vãmme. 20We ga vǝr swah suu ɓii ne yeɓ tǝkolle, mor sǝr ɓii ka ga joŋ fakpãhpǝǝ nyi we ya, kpuu 'wah ɓii ra laŋ ka ga lee syẽm ya ta.
21We so kal tǝ joŋ ɓǝɓe' wo ɓe, we ka tǝ zyii laa zah ɓe fahfal ah ya kpǝ ɓe, me so ga joŋ kiita ɓii ga pel zahlǝŋ rǝŋ faɗa. 22Me ga pee fafyãh cok maɓea ah ge kǝsyil ɓiiri, a ga ikra wee ɓiiri, so a ga ɓeɓra faɓal ɓiiri, a ga vǝrra we, we ga coŋ biŋ nai sye, fahlii tǝgǝǝ yaŋ ɓii dǝfuu ka ga yea gŋ pǝlli ya.
23So fahfal kiita mai we ka tǝ zyii laa zah ɓe ya, we tǝ joŋ ɓǝɓe' wo ɓe ga pel kpǝ ɓe, 24me so jin ne we, me ga ŋgoŋ kiita tǝ ɓii zahlǝŋ rǝŋ, kiita ah ga yea pǝgaɓ kal ma kǝpelle. 25Me ga pee sal ge zah ɓii ka ŋgoŋ kiita tǝ ɓii ne ko, mor we syel ɓǝ gbanzah man na gbǝ ɓo ɓe. Koo we kyeɓ cok muŋ ɓo pǝ yaŋ ɓii maluu ra laŋ, me ga pee syem maɓe' ah ge tǝ ɓiiri, me ga soɓ we ga mor jol za syiŋ ɓiiri. 26Me ga vǝr farel ɓii mai we kan ɓo daŋ, cii vaŋno a ga kii mor joŋ farel ŋwǝǝ jemma, a ga liira farel ah nyi we lii, ne cok we re farel ah laŋ, we ka kǝ̃ǝ ya.
27So fahfal ah we ka tǝ zyii laa zah ɓe ya, we tǝ joŋ ɓǝɓe' wo ɓe ga pel kpǝ ɓe, 28me ga ɓaŋ kpãh me joŋ ki ne we, me ga ŋgoŋ kiita tǝ ɓii pǝ'man mor faɓe' ɓii ŋhaa zahlǝŋ rǝŋ faɗa. 29Koŋ ga joŋ ki ne we, we ga ryak nǝǝ wee ɓiiri. 30Me ga ɓeɓ cok juupel ɓii mai mo pǝ cok ma tǝgee sǝŋ ah ra, me ga hah cok tǝǝ ɓǝrdi ɓii ra ga sǝŋ. Me ga ɓaa wul ɓii ga tǝtǝl masǝŋ ki ɓii ra mai mo leara ge ɓo sǝŋ. Zahzyil ga sye me tǝ ɓiiri. 31Me ga joŋ yaŋ ɓii maluu ra ciŋ fǝl kolle, me ga ɓeɓ cok juupel ɓii ra. Me ka nyiŋ syiŋ ɓii mai wee ŋgom fan joŋ wo ɓe ne ya. 32Me ga ɓeɓ sǝr ɓiiri, ŋhaa za syiŋ ɓii mai mo ge rera sǝr ɓii ɓo, ɓǝ ah a so ga nǝǝ zahzyil ɓǝǝra. 33Me ga pee za ki gin ruu sal ne we, me ga myah we ga pǝ sǝr za ki, sǝr ɓii ga ciŋ cok kolle, yaŋ ɓii maluu ga ciŋ gboŋni. 34-35So sǝr ga lwaa 'yak mor we zyii ka soɓ 'yak ya. A ga yea tǝkolle, ne cok we myah ge ɓo pǝ sǝr za syiŋ ɓiiri, sǝr ga lwaa 'yak fahfal ɓiiri.
36Za mai we pǝ sǝr za syiŋ ɓiiri, me ga joŋ zahzyil ɓii ɗuu galle, koo zyak mo laŋ goo mayak ah to laŋ, we ga ɗuu galle. We ga rǝk ɗul zah salle, tǝgbana nǝǝra kafahe ɓo tǝ ɗuu mor ɓii ne ko. Koo za ma nĩi mor ɓii mo kǝka laŋ, we ga lea ga sǝŋ nooko. 37Dǝɓ ma nĩi mor ɓii ka ga yea laŋ ya, so we ga ɗuu lea ga tǝki, we ka gak uu pel za syiŋ ɓii ka ruu sal ne ra ya. 38We ga wuk zah sǝr zana, sǝr za syiŋ ɓii ga sǝ̃ǝ we. 39Tǝcoŋ za ki kǝsyil ɓii mo coŋ ɓo ne cee pǝ sǝr za syiŋ ɓiiri, a ga vǝrra mor faɓe' ɓiiri, ne faɓe' mai pa ɓii lii ra mo joŋni.
40Amma morsǝ̃ǝ ɓii a ga keera ɓǝ faɓe' ɓǝǝra, ne faɓe' mai pa ɓǝǝ lii ra mo joŋra, mor joŋra faɓe' wo ɓe, ŋwoora kyaŋ ne me. 41Mor ah me joŋ ki ɓo ne ra, me nĩi ra kal ge ɓo pǝ sǝr za syiŋ ɓǝǝra. Fahfal ah morsǝ̃ǝ ɓii mo wonra suu ɓǝǝra, mo nyiŋra kiita faɓe' ɓǝǝ ne ɓǝ ŋwookyaŋ ɓǝǝ ɓe, 42me ga foo ɓǝ gbanzah ɓe me gbǝ ɓo ne Yakuɓ, Isak, ne Abraham, me so ga swaa ɓǝ faa ɓe me faa ɓo, me ga nyi sǝr nyi za ɓe.#Tǝŋ 17:7-8; 26:3-4; 28:13-14 43Kǝpel ah za ka ga yea tǝ sǝr ah ya, ka sǝr ah mo lwaa 'yakke. Zan ah ga laara bone tǝ ɓǝ mai mo soɓra ɓǝ lai ɓe ne ɓǝ cuu ɓe ra ɓoo. 44Amma ne daŋ laŋ, ne cok mai ara mo no pǝ sǝr za syiŋ ɓǝǝ ba, me ka soɓ ra ɓoo wala vǝr ra tǝɗe' ya. Me ka syel ɓǝ gbanzah ɓe me gbǝ ɓo ne ra ya. Mor ame ye Dǝɓlii Masǝŋ ɓǝǝra. 45Me ga swaa ɓǝ gbanzah ɓe me gbǝ ɓo ne pa ɓǝǝ lii ra, ne cok me cuu swah ɓe me ne nyi za daŋ, me zaŋ za ɓe gin sǝr Egiɓ pǝ̃ǝ ne ko, ka ame Dǝɓlii, me yea Masǝŋ ɓǝǝra.
46Mai ɓǝ lai ne ɓǝ cuu mai Dǝɓlii mo nyi nyi Mosus tǝ waa Sinai, ka mo cuuko nyi za Israel o.
Bible Moundang © Alliance Biblique du Tchad, 1996.