LEWITIEN 15
15
Fan mai moo ɗuu wo dǝɓ ga lalle
1Dǝɓlii faa nyi Mosus ne Aron: 2Mo faa nyi za Israel sye: Ne cok suu mo tǝ ɗuu pel dǝɓ ga lal ɓe, ka dǝɓ ah a ne 'nahm pel Dǝɓlii. 3Koo suu mo tǝ ɗuu pel dǝɓ ahe, wala mo so ka tǝ ɗuu yao, ka dǝɓ ah a ne 'nahm pel Dǝɓlii. 4Faswul mai dǝɓ ah mo swǝ tǝl ahe, wala ne fan mai mo kaako tǝl ahe, fan ah ra a ne 'nahm pel Dǝɓlii. 5Koo zune mo juu faswul ahe, 6wala mo kaa tǝ fan mai dǝɓ ah mo kaa tǝl ahe, sai dǝɓ ah mo vãhko fan wo suu ahe, ka mo so erko bii. Amma dǝɓ ah ga yea ne 'nahm pel Dǝɓlii, ŋhaa a dai lilli. 7Koo zune mo juu dǝɓ mai suu moo ɗuu pel ahe, sai dǝɓ ah mo vãhko fan wo suu ahe, ka mo so erko bii, amma ka dǝɓ ah ga yea ne 'nahm pel Dǝɓlii, ŋhaa a dai lilli. 8Dǝɓ ma ne syem nyẽe mo tǝɓ tǝsǝ̃ǝ ge wo dǝɓ mai mo ka ne 'nahm ya ɓe, sai ka dǝɓ ah mo vãhko fan wo suu ah ge lalle, mo so erko bii, amma dǝɓ ah ga yea ne 'nahm pel Dǝɓlii, ŋhaa a dai lilli. 9Dǝɓ ma ne syem nyẽe mo kaa tǝ tǝgaŋne, ka tǝgaŋ ah ɓeɓ ɓe. 10Koo zune mo juu fan mai dǝɓ ah mo kaa tǝl ahe, dǝɓ ah ga yea ne 'nahm pel Dǝɓlii, ŋhaa a dai lilli. Koo zune mo kal ɓaŋ fan mai dǝɓ ah mo kaa tǝl ahe, dǝɓ ah mo vãhko fan wo suu ah ge lalle, mo so erko bii. Amma dǝɓ ah ga yea ne 'nahm pel Dǝɓlii, ŋhaa a dai lilli. 11Dǝɓ ma ne syem nyẽe mo juu dǝɓ ki, ka vãh jol kǝpel a ɓe, ka dǝɓ mai dǝɓ ah mo juu ko mo vãhko fan wo suu ah ra, mo so erko bii. Amma ka dǝɓ ah ga yea ne 'nahm pel Dǝɓlii, ŋhaa a dai lilli. 12Dǝɓ ma ne syem mo juu cii vuu ɓe, sai mo dahra cii ah ge lalle, mo juu ŋhǝǝ laŋ, sai mo vãhra ŋhǝǝ ah ge lal ne bii.
13Syem dǝɓ ah mo laɓ ɓe, fan ah mo ka tǝ ɗuu pel ah yao ɓe, sai mo so kaako syak ah zah'nan rǝŋ, so ka mo vãhko fan wo suu ahe, ka mo so erko biikyaŋ, a ga nǝǝ yea pǝsãhe. 14Tǝ zah'nan patǝ nama ah mo wooko matǝvaawandala gwa, wala matǝvaakol gwa, mo geko pel Dǝɓlii zahfah tal mbǝro ma tai ne ko, mo ge nyiko juu ah ra nyi pa joŋzahsyiŋrĩ. 15Pa joŋzahsyiŋ ga ɓaŋ juu ah vaŋno, a joŋ syiŋ ma mor ɓaŋ faɓe' ga lal ne ko, maki ah laŋ a ga joŋ syiŋ suŋwii ne ko. Pa joŋzahsyiŋ mo joŋko naiko, ka Dǝɓlii mo rwah faɓe' dǝɓ ah ge lalle, ka dǝɓ ah mo vãh nǝǝ pǝsãhe.
16Ne cok dǝɓ mo lolom mo soɓ suu ne ɓe, sai mo erko bii. Amma dǝɓ ah ga yea ne 'nahm pel Dǝɓlii, ŋhaa a dai lilli. 17Koo fẽene daŋ mai mo joŋ ɓo ne zyimmi, wala mo zyeɓ ɓo ne wakke, suu mo kal ɗuu ge tǝl ah ɓe, sai dǝɓ ah mo vãhko suu ah daŋ ge lal ne bii, amma dǝɓ ah ga yea ne 'nahm pel Dǝɓlii, ŋhaa a dai lilli. 18Ne cok dǝɓ mo swǝ ne madǝwin mo soɓ suu ɓe, sai mo erra bii gwa daŋ. Amma a ga yeara ne 'nahm pel Dǝɓlii gwa daŋ, ŋhaa a dai lilli.
19Ne cok madǝwin mo saŋ ɓe, a ga yea ne 'nam pel Dǝɓlii zah'nan rǝŋ. Koo zune mo kal juu suu ah ɓe, dǝɓ ah ga yea ne 'nahm pel Dǝɓlii, ŋhaa a dai lilli. 20Fan mai mo kaako tǝtǝl ah ne cok zah'nan ŋwǝǝ saŋ ahe, wala mo faswul ah yo, ka fan ah ɓeɓ ɓe. 21-23Koo zune mo juu faswul mawin ahe, wala fan mai mo kaako tǝtǝl ahe, sai ka dǝɓ ah mo vãhko fan wo suu ahe, mo so erko bii. Amma dǝɓ ah ga yea ne 'nahm pel Dǝɓlii, ŋhaa a dai lilli. 24Dǝɓ mo kal swǝ ne madǝwin ne cok ŋwǝǝ saŋ ah ɓe, ka 'nahm mai mawin ah mo ne zǝǝ ko ɓe, dǝɓ ah ga yea ne 'nahm pel Dǝɓlii zah'nan rǝŋ, ka faswul mai dǝɓ ah mo swǝ tǝl ah laŋ ɓeɓ ɓe ta.
25Syim mo ɗuu mor madǝwin zah'nan pǝpãare, wala mo kal tǝ zah'nan ŋwǝǝ saŋ ah laŋ, mawin ah ga yea ne 'nahm pel Dǝɓlii tǝgǝǝ zah'nan mai daŋ syim mo tǝ ɗuu mor ahe, tǝgbana ma ne cok zah'nan ŋwǝǝ saŋ ah ta. 26Faswul mai mawin ah mo swǝ tǝl ahe, ne fan mai daŋ mo kaako tǝtǝl ah ne cok ahe, ka fan ah ra ɓeɓ ɓe. 27Koo zune mo juu fan ah ra ɓe, dǝɓ ah ga yea ne 'nahmme, sai dǝɓ ah mo vãhko fan wo suu ahe, mo so erko bii. Amma dǝɓ ah ga yea ne 'nahm pel Dǝɓlii, ŋhaa a dai lilli. 28Ne cok syim ah mo ka tǝ ɗuu yao ɓe, sai mawin ah mo kaako byak zah'nan rǝŋ, fahfal ah a ga yea pǝsãhe. 29Ne zah'nan patǝ nama ah mo wooko matǝvaawandala gwa, wala matǝvaakol gwa, mo geko nyi pa joŋzahsyiŋ zahfah tal mbǝro ma tai ne ko. 30Pa joŋzahsyiŋ mo ɓaŋ juu ah vaŋno, mo joŋ syiŋ ma mor ɓaŋ faɓe' ga lal ne ko, maki ah laŋ mo joŋko syiŋ suŋwii ne ko. Pa joŋzahsyiŋ mo joŋko naiko, ka Dǝɓlii mo rwah faɓe' mawin ah ge lalle, ka mo vãhko suu ah ne tǝ ɓǝ syim mo yea tǝ ɗuu mor ahe.
31Dǝɓlii faa nyi Mosus, mo laiko za Israel tǝ ɓǝ 'nahm ɓǝǝra, mor ka mo ɓeɓra tal mbǝro ah mai mo kǝsyil ɓǝǝ ka. Mo ka nai ya ɓe, a ga wukra.
32Mai ako ye ɓǝ lai matǝ ɓǝ dǝwor mai fan mo tǝ ɗuu pel ahe, wala mai mo lolom soɓ suu ne ko, 33ne matǝ ɓǝ mawin mai mo saŋ ɓo, ne matǝ ɓǝ dǝɓ mai mo swǝ ne mawin mai mo sǝsaŋ ɓo, mo ne 'nahmme.
Bible Moundang © Alliance Biblique du Tchad, 1996.