JOSWA 9
9
Yella za yaŋ Gibeon
1Ne cok za goŋ mai mo kaara ɓo kah el Yordan ne tǝ waare ne za ma kaara tǝ sǝr sǝŋ tǝkine za ma kaara kah mabii nǝfah kǝ Liban: Hetien, Amorien, Kanaanien, Perisien, Hevien, tǝkine Jebusien daŋ mo laara ɓǝ ahe, 2taira zah wo ki vaŋno mor ka ruu sal ne Joswa tǝkine za Israel.
3Ne cok za ma kaa Gibeon mo laara ɓǝ fan mai Joswa mo joŋ ne yaŋ Jeriko tǝkine yaŋ Ai, 4so joŋra yella ne vǝrvǝr ur ɓaŋra fahlii, woora farel mor fahlii gwǝǝre, woora daɗaari matãa ah bam nyi korro ɓǝǝra. So woora dah bii lee kpuu vin matãa mai mo ŋgǝ̃ǝ ɓo mo so dǝdahɓ ɓo, 5tǝkine sǝɓal matãa mai mo dǝdahɓ ɓo maara ge ɓalle, ɓaara mbǝro matãa ge wo suu, farel mai mo woora mor fahlii daŋ yakke, so gbǝ tǝ gbõo ɓo. 6Gera wo Joswa pǝ cok mai mo ɗǝrra ɓo gŋ Gilgal, faara nyi ko tǝkine za Israel daŋ: Ru gee sǝr maɗǝk ah ge. Amma we gbǝ zah ne ru. 7Za Israel zyiira zah za Gibeon#9:7 A ɗiira ne Hevien ta. rai faara: Azu tǝ ne, ɗah fan morãi we kaa ɓo kǝsyil ɓuu ne? Ru so gak gbǝ zah ne we suu ɗǝne?#Pǝ̃ǝ 23:32; 34:12; CuuƁ 7:2 8Faara nyi Joswa: Aru ye za yeɓ ɓo. Amma Joswa faa nyi ra: Awe za kẽne? We ur gin kẽe ge ne?
9So zyiira zah Joswa faa: Za yeɓ ɓo gee sǝr maɗǝk ah ge, mor ru laa kacii tǝɗii Dǝɓlii Masǝŋ ɓo mo zoo ɓo, ru laa ɓǝ fan mai mo joŋko sǝr Egiɓ, 10tǝkine fan mai mo joŋ wo za goŋ Amorien matǝ gwa mai mo kaara ɓo Yordan nǝzakǝŋhaa: Sihon goŋ Hesbon, ne Og goŋ Basan mai mo kaa ɓo Askarot.#KeeZ 21:21-35 11Zaluu ɓuu tǝkine za sǝr ɓuu daŋ faara nyi ru: We woo farel mor fahlii gwǝǝ jol ɓiiri, we ge zyaŋ tǝ ɓǝǝra, we faa nyi ra: Aru ye za yeɓ ɓiiri, we gbǝ zah ne ru. 12We ẽe tǝwaa ɓuu mai ru woo gin yaŋ ɓuu com mai ru tǝ ur ka gin wo ɓii ka a pǝcwakke, zǝzǝ̃ǝ yak ɓe, gbǝ tǝ gbõo ɓe ta. 13Dah bii lee kpuu vin marai laŋ ne cok ru bea bii baa daŋ ka a pǝfuu ba, we ẽe zǝzǝ̃ǝ dah ah ŋgǝ̃ǝ ɓe. Mbǝro ɓuu ra tǝkine sǝɓal ɓuu ra daŋ ɓeɓ ɓe, mor fahlii ah pǝɗǝk pǝlli.
14Za Israel nyiŋra farel ɓǝǝra, amma fiira Dǝɓlii ya. 15Joswa zyeɓ ɓǝ ne ra, gbǝ zah ne ra ka soɓ ra ne cee ɓǝǝra. Zaluu pel za pãa laŋ gbǝra zah ne ra nai ta.
16Gbǝra zah ne ra vǝr ɓe, fahfal ah zah'nan sai za Israel laara ara gwari ne ra. 17Za Israel urra tǝgǝǝ zah'nan sai ah ge daira yaŋ ɓǝǝra. Yaŋ ɓǝǝ maluu ye Gibeon, Kefira, Beerot, ne Kirjat-Jearim. 18Za Israel ruura sal ne ra ya, mor zaluu pel za pãa haara zah ɓo nyi ra ne tǝɗii Dǝɓlii Masǝŋ Israel. Sai za pãa daŋ kyãhra ɓǝ nyee wo zaluuri. 19Zaluu pel za pãa daŋ faara nyi zana: Ru haa zah ɓo nyi ra ne tǝɗii Dǝɓlii Masǝŋ Israel, zǝzǝ̃ǝ na ka gak juu ra ya. 20Fan mai na ga joŋ ne ra a naiko: na soɓ ra ne cee, mor ka kpãh Masǝŋ mo ge tǝ man mor gbanzah mai na gbǝ ɓo ne ra ka. 21Zaluu faara nyi zana: Na soɓ ra ne cee ɓǝǝra, amma mo ciŋra za sǝǝ zahwii tǝkine za bea bii nyi na. So joŋra na zaluu mo faara ɓo.
22Joswa ɗii ra faa nyi ra: Mor fẽe we joŋ tǝgwĩi ne ru we faa aru pǝɗǝk ne we pǝlli, asai we so kaa ɓo kah ɓuu nyee njak ne? 23Amma zǝzǝ̃ǝ tǝkẽawãk tǝ ɓiiri, awe ciŋ za sǝǝ zahwii tǝkine za bea bii mor yaŋ Masǝŋ ɓe ga lii ɓe.
24Zyiira zah Joswa faa: Za yeɓ ɓo laara ɓǝ mai Dǝɓlii Masǝŋ ɓo mo faa nyi Mosus dǝɓ yeɓ ah ka nyi sǝr mai daŋ nyi we, ka we vǝr za ma kaara sǝr ah mo pel ɓii daŋ. Ɓǝ gin ɓii ye re gal ɓuu ɓo, mor ah ru ɗuu ka ǝ̃ǝ suu ɓuuru, ko ru joŋ fan mai naiko. 25Mo ẽe zǝzǝ̃ǝ ru no mor jol ɓo, mo joŋ ne ru tǝgbana zahzyil ɓo mo 'yahe. 26Joswa joŋ ne ra naiko: ǝ̃ǝ ra jol za Israel, ikra ra pǝ wul a. 27Daga com ah Joswa joŋ ra na za sǝǝ zahwii ne za bea bii nyi za pãa daŋ tǝkine mor cok joŋ syiŋ wo Dǝɓlii. Ŋhaa tǝ'nahko a joŋra yeɓ mai pǝ cok mai Dǝɓlii mo nǝǝ ɓo ka mo juura pel wol ah gŋ.
Bible Moundang © Alliance Biblique du Tchad, 1996.