JOSWA 8
8
Yaŋ Ai leere
1So Dǝɓlii faa nyi Joswa: Mo ɗuu gal ka, suu mo coo mo ka ta, mo ur mo ɗii za sal daŋ mo ge ruu sal ne Ai, me soɓ goŋ Ai ne zan ah ne yaŋ ah tǝkine sǝr ah jol ɓo ɓe. 2Mo joŋ ne yaŋ Ai ne goŋ ah tǝgbana mo joŋ yaŋ Jeriko ne goŋ ah ta. Amma lak ah tǝkine faɓal ah ra daŋ, we woo ka syak ɓiiri. We ge ryaŋ yaŋ ah we lal mok fahfal ah lalle.
3Joswa ur ne za sal daŋ ka ga yaŋ Ai. Joswa syen za maswah ah ujenere jemma sai pee ra kal ne suŋni. 4Lai ra faa nyi ra: We ge lal mok fahfal yaŋ ah lalle, we ɗǝǝ ne yaŋ ah pǝɗǝk pǝlli ka, amma we zyeɓ suu ɓii pǝsãhe. 5Amma ame ne za mai mo ne me daŋ ru syee ga kah yaŋ ahe, ka za yaŋ Ai mo pǝ̃ǝra ka ruu sal ne ru na ma kǝpel kŋ ɓe, ru ga ɗuu pel ɓǝǝra. 6A ga nĩira ru ŋhaa ru soɓ ra ɗǝǝ ki ne yaŋ pǝɗǝkki, so a ga faara: Za Israel tǝ ɗuura pel man na ma kǝpel kŋ o kpǝ. Ru ga ɗuu pel ɓǝǝ ka sǝǝ tǝ ɓǝǝ ne naiko. 7Ka we pǝ̃ǝ gin cok mai we fok ɓo gŋ, ka we re yaŋ ahe. Mor Dǝɓlii Masǝŋ ɓii ga soɓ yaŋ ah jol ɓiiri. 8Ne cok we re yaŋ ah ɓe, ka we ɓaa wii nyi nyi tǝgbana ɓǝ mai Dǝɓlii mo faa. Ɓǝ mai me faa ɓo we koiko. 9Joswa soɓ fahlii nyi ra kal o, ge mokra kǝsyil Betel ne Ai nǝfah kǝmorcomlil Ai. Amma Joswa pii soo ge swǝ zahjulli.
10Joswa ur ne zah'nan pimpim tai za salle, so kal pel ɓǝǝ ne zaluu Israel daŋ ka ga ruu sal ne za Ai. 11Za sal mai mo ne ki daŋ kalra ge, gera kah yaŋ ah gwari, ɗǝrra pel yaŋ Ai nǝfah kǝsǝŋ, cok tǝforoŋ no kǝsyil ɓǝǝ ne yaŋ Ai. 12Joswa woo za tǝgbana ujenere dappe pee ra ka mo ge mokra kǝsyil Betel ne yaŋ Ai nǝfah kǝmorcomlil ahe. 13Zyeɓra za sal uu naiko: Za sal maki ara no fahkǝsǝŋ yaŋ ahe, za sal mai mo lalra mok ɓo laŋ ara nǝfah kǝmorcomlil ahe. Ne suŋ ah Joswa kal ge swǝ pǝ cok tǝforoŋ ahe. 14Ne cok goŋ Ai mo kwo ɓǝ ah naiko, hǝǝ juu zan ah ne zah'nan pim, pǝ̃ǝra tǝgǝǝ yaŋ ɓǝǝ ge lal ka ruu sal ne za Israel pǝ cok tǝforoŋ Yordan. Goŋ tǝkine zan ah daŋ kalra ge pǝ cok mai mo ruura sal kǝpel kŋ. Amma goŋ tǝ sõone za lal mokra ɓo no fahfal yaŋ ah ya. 15Joswa tǝkine zan ah joŋra yella tǝŋ ɗuura pel ɓǝǝ ga nǝfah kǝ cok tǝgbana sal nĩi ra ɓo. 16Za yaŋ Ai taira daŋ, pǝ̃ǝra ka nĩi mor za Israel. Nĩira mor Joswa ŋhaa ɗǝǝra pǝɗǝk ne yaŋ. 17Koo coŋ dǝwor vaŋno yaŋ Ai ne Betel ma bai pǝ̃ǝ ka nĩi mor za Israel ya. Soɓra zahfah yaŋ ah gǝǝ.
18So Dǝɓlii faa nyi Joswa: Mo ɓaŋ zǝǝ mai mo jol ɓo ge sǝŋ tǝ Ai, mor me soɓ yaŋ ah jol ɓo ɓe. So Joswa joŋ naiko. 19Ne cok mo ɓaŋ jol ah ge sǝŋ, za mai mo mokra ɓo urra ne hǝǝre, ɗuura dan ge tǝgǝǝ yaŋ, rera yaŋ ahe. Hǝǝ ɓaara wii nyi yaŋ ahe. 20Za yaŋ Ai jinra nahnǝnni, kwora suŋwii yaŋ ah zoo kal ge ɓo sǝŋ. Swah ka wo ɓǝǝ ka gak ɗuu ga koo kẽne yao, mor za mai mo tǝ ɗuura ga nǝfah kǝsyicok so jinra tǝ ɓǝǝ ɓe. 21Ne cok Joswa tǝkine zan ah mo kwora za mai mo lal mokra ɓo mo rera yaŋ ahe, so suŋwii yaŋ ah mo zoo ge ɓo sǝŋ, so jin ikra za yaŋ Ai. 22Za ma tǝgǝǝ yaŋ laŋ so pǝ̃ǝra ge zyaŋra tǝ ɓǝǝra, za Israel ryaŋra ra cyõ. Ikra ra, dǝɓ ma ɗuu ǝ̃ǝ kǝka, koo dǝɓ vaŋno laŋ coŋ ne cee ya. 23Amma gbǝra goŋ Ai ne nahnǝnni, gera wo Joswa ne ko.
24Ne cok za Israel mo vǝrra ik za yaŋ Ai mai mo lal tǝkine ma fah kǝsyicok mai mo nĩira mor ɓǝǝ daŋ, so pii soora ge yaŋ Ai, ikra za yaŋ ah daŋ ta. 25Ne cok ah pãa za mai mo ikra ra yaŋ Ai za wǝǝ tǝkine ŋwǝǝ daŋ joŋ ujenere jemma tǝ gwa. 26Joswa ɓoo jol ah mai mo ɓaŋ zǝǝ ge ɓo sǝŋ ne ge sǝŋ ya, ŋhaa ikra za yaŋ Ai vǝr tǝɗe' ɗǝ. 27Sai coŋ faɓal tǝkine fan ma lwaa zah sal to, za Israel woora ka syak ɓǝǝra, tǝgbana ɓǝ mai Dǝɓlii mo faa nyi Joswa. 28Joswa ɓaa wii nyi yaŋ Ai soɓ yaŋ ah ɓoo na gboŋ lii ŋhaa tǝ'nahko. 29Amma rao goŋ Ai ge tǝ kpuu ŋhaa dai lilli. Ne cok com mo tǝ yah dan o, faa nyi za ka mo ɗǝrra wul ah gin tǝ kpuu ge sǝŋ. Ɓaŋra wul ah ge ɓoo zahfah yaŋ Ai, weara tǝsal tǝ wul ah pǝ'manne, a no gŋ ŋhaa tǝ'nahko.
Joswa kee ɓǝ lai tǝ waa Ebal
30Ne cok ah Joswa vuu cok joŋ syiŋ wo Dǝɓlii Masǝŋ Israel tǝ waa Ebal.#CuuƁ 27:2-8 31Joŋ tǝgbana Mosus dǝɓ yeɓ Dǝɓlii mo faa ɓǝ ah nyi za Israel, na mai mo ŋwǝǝ ɓo pǝ ɗerewol ɓǝ lai Mosus: Cok joŋ syiŋ ah ma ne tǝsal mai mo zyeɓra taa ya ye mo yea, mai dǝfuu mo zyeɓra ne vãm taa ya. Tǝǝra syiŋ suŋwii tǝkine syiŋ ma nyi jam tǝl ahe.#Pǝ̃ǝ 20:25 32Joswa ŋwǝǝ ɓǝ lai Mosus gŋ tǝ tǝsal ah ra ne nahnǝn za Israel. 33Za Israel daŋ, koo gwǝǝre, wala dǝɓ mai mo byaŋ kǝsyil ɓǝǝra, za tam ɓǝǝra, ne zaluu ma pel ɓǝǝ ne za tǝsal ɓǝ, tǝkine za lakaali ɓǝǝra, uura kahlaa sunduku gwa daŋ pel za joŋzahsyiŋ ma ɓaŋra sunduku gbanzah Dǝɓlii. Raita za uu soo ge nǝfah kǝ kah waa Garisim, raita ah maki ah uura nǝfah kah waa Ebal, tǝgbana mai Mosus dǝɓ yeɓ Dǝɓlii mo faa ɓǝ ah kǝpel ka ẽe za Israel.#CuuƁ 11:29; 27:11-14 34So Joswa kee ɓǝ lai, ne ɓǝ ẽe tǝkine tǝkẽawãk daŋ tǝgbana mai mo ŋwǝǝ ɓo pǝ ɗerewol ɓǝ lai. 35Koo ɓǝ vaŋno kǝsyil ɓǝ mai Mosus mo ŋwǝǝ daŋ, mai Joswa mo cee ge lal bai kee pel za Israel mo taira ɓo kǝka, ŋwǝǝre, wee nyeere, tǝkine za gwǝǝ mai mo kaara ɓo kǝsyil ɓǝǝ daŋ no gŋ.
Bible Moundang © Alliance Biblique du Tchad, 1996.