JOSWA 24
24
Joswa faa ɓǝ nyi za Israel daŋ
1Joswa tai ban Israel daŋ yaŋ Sikem. Ɗii zaluu Israel ne za goŋ ɓǝǝ ne za lakaali ɓǝǝ tǝkine zaluu ma pel za daŋ ge uura pel Masǝŋ. 2So Joswa faa nyi ra: Dǝɓlii Masǝŋ Israel faa sye: Ɓaaɓe pa ɓii lii yea kaara ɓo kah el Efrat nǝzakǝŋhaa, a syeera mor masǝŋ ki cam ra. Tarak pah Abraham ne Nakor no kǝsyil ɓǝǝra.#Tǝŋ 11:27 3Me ɓaŋ pa ɓii Abraham gin nǝzakǝŋhaa, me kyãh tǝ sǝr Kannan ne ki daŋ, me joŋ morsǝ̃ǝ ah pǝpãare, me nyi Isak nyi ko.#Tǝŋ 12:1-9; 21:1-3 4Isak laŋ me nyi Yakuɓ ne Esau nyi ko, me nyi waa Edom nyi Esau ka mo kaako gŋ, mǝ ah yo. Amma Yakuɓ ne wee ah kalra ge sǝr Egiɓ.#Tǝŋ 25:24-26; 36:8; 46:1-7; CuuƁ 2:5 5Me pee Mosus ne Aron ge gŋ, me so cuu bone nyi za sǝr Egiɓ pǝlli, so me pǝ̃ǝ ne we gin gŋ.#Pǝ̃ǝ 3:1–12:42 6Me zaŋ pa ɓii lii gin sǝr Egiɓ pǝ̃ǝra ge lalle, so ge daira zah mabii, Egiɓien foora mor ɓǝǝ ne muŋta sal tǝkine za pǝr ŋhaa ge daira zah mabii Syẽ.#Pǝ̃ǝ 14:1-31 7Pa ɓii yera yee wo ɓe, so me woŋ kǝsyil ɓǝǝ ne Egiɓien ne cok fuu, so me jǝŋ bii ge tǝ ɓǝǝ muŋ ra tǝɗe'. Awe tǝ fan mai me joŋ wo Egiɓien ɓe.
Fahfal ah we ge kaa kǝsyicok zah'nan pǝpãare. 8Me ge sǝr Amorien mai mo kaara ɓo Yordan nǝzakǝŋhaa ne we, amma me soɓ ra ge mor jol ɓiiri. We re sǝr ɓǝǝra, me ik ra pel ɓiiri.#KeeZ 21:21-35 9So Balak we Sippor goŋ Moab ur ruu sal ne za Israel, so pepee ɗii Bileam we Beor ka mo tǝǝko we.#KeeZ 22:1–24:25 10Amma me zyii laa zah Bileam ya, so jin faa ɓǝ sãh tǝ ɓiiri, me ǝ̃ǝ we jol ahe. 11So we yee el Yordan we ge Jeriko. Za ma kaara Jeriko ruura sal ne we: Amorien, Perisien, Kanaanien, Hetien, Girgasien, Hevien, tǝkine Jebusien, me soɓ ra laŋ ge mor jol ɓiiri.#Jos 4:14-17; 6:1-21 12Me joŋ za goŋ Amorien gwa ɗuura gal pel ɓiiri, kafahe ɓii ye ka nĩi ra ne saŋ ɓii ya.#Pǝ̃ǝ 23:28; CuuƁ 7:20 13Me nyi sǝr ah nyi we, we laa bone ne ɓǝ ah ɗǝ ya, me nyi yaŋ ah nyi we, we ye ka vuu ya, amma we kaa gŋ ne suu tǝsyẽe. We tǝ ren lee syẽm kpuu vin ma pǝ 'wah tǝkine mǝ tǝbaakãmme, amma we ye ka pea ya.#CuuƁ 6:10-11
14Zǝzǝ̃ǝko we ɗuu Dǝɓlii, we joŋ mor ah ne goŋga tǝkine ɓǝ sãhe, we myah masǝŋ ki cam mai pa ɓii lii mo syeera mor ɓǝǝ sǝr Mesopotamia tǝkine sǝr Egiɓ daŋ ge lalle. Amma we joŋ mor Dǝɓlii. 15Amma joŋ mor Dǝɓlii mo pǝɓe' wo ɓii ɓe, ka we nǝǝ dǝɓ mai we ga joŋ mor ah tǝ'nahko, ɗah we nǝǝ masǝŋ pa ɓii lii ra mai mo syeera mor ɓǝǝ zakǝŋhaa ne? Wala we nǝǝ masǝŋ Amorien ne? Mor we kaa ɓo pǝ sǝr ɓǝǝra. Amma ame, ne yaŋ ɓe, ru ga syee mor Dǝɓlii.
16Za zyiira faa: Masǝŋ mo cak ru ne soɓ syee mor Dǝɓlii ka ru so joŋ mor masǝŋ ki cam. 17Mor Dǝɓlii Masǝŋ ɓuu ako ye pǝ̃ǝ ne ru tǝkine pa ɓuu daga sǝr Egiɓ pǝ cok joŋ byak ɓuuru. So joŋ yeɓ maswah maluu ne nahnǝn ɓuuru, so byak ru tǝ fahlii mai ru syee gŋ kǝsyil zahban mai daŋ ru pǝ̃ǝ kǝsyil ɓǝǝra. 18Dǝɓlii nĩi zahban daŋ pel ɓuuru, ŋhaa tǝkine Amorien mai mo kaara ɓo pǝ sǝr ahe. Aru laŋ ru ga joŋ mor Dǝɓlii, mor ako ye Masǝŋ ɓuuru.
19So Joswa faa nyi zana: We ka gak syee mor Dǝɓlii ya, mor ako ye Masǝŋ matǝdaŋdaŋ ne Masǝŋ ma tǝwonni, ka ga rõm ɓǝɓe' ɓii ne yeɓ ɓe' ɓii ya. 20Ne cok we soɓ syee mor Dǝɓlii we so tǝ syee mor masǝŋ ki cam ɓe, a ga jin soo joŋ ɓǝɓe' wo ɓiiri, a ga muŋ we fahfal mo joŋko ɓǝ sãh wo ɓiiri. 21Za zyiira zah Joswa faa: Ka nai ya, amma ru ga joŋ mor Dǝɓlii. 22Joswa faa nyi zana: Awe ye za syedowal ne suu ɓiiri, mor awe ye nǝǝ Dǝɓlii ne suu ɓii ka joŋ mor ahe. Zyiira ne pãa ɓǝǝ daŋ faara: Aru ye za syedowal ahe. 23So faa nyi ra: Mo nai ɓe, we nǝǝ masǝŋ za gwǝǝ kǝsyil ɓii ge lalle. We nyi zahzyil ɓii nyi Dǝɓlii Masǝŋ Israel. 24Za faara nyi Joswa: Ru ga joŋ mor Dǝɓlii Masǝŋ ɓuuru, ru ga laa ɓǝ faa ahe.
25Com ah Joswa gbǝ zah ne zana, cuu ɓǝ lai tǝkine kiita nyi ra Sikem. 26Joswa ŋwǝǝ ɓǝ ah ra daŋ ge pǝ ɗerewol Ɓǝ Lai Masǝŋ. So ɓaŋ tǝsal ma'man ah pee ge sǝŋ mor kpuu malii kah yaŋ mai mo nǝǝ ɓo mor Dǝɓlii. 27Joswa faa nyi za daŋ: We ẽe ɗǝ, tǝsal mai ye ga yea syedowal tǝ mana, mor tǝsal ah laa ɓǝ mai daŋ Dǝɓlii mo faa nyi na ɓe. A ga joŋ syedowal tǝ ɓiiri, mor ka we soɓ Masǝŋ ɓii ka. 28Fahfal ah Joswa soɓ fahlii nyi za o, zune daŋ kal ge fah yaŋ ahe.
Wul Joswa ne Eleasar
29Fahfal ɓǝ marai mo joŋ, Joswa we Nun dǝɓ yeɓ Dǝɓlii wuu, joŋ syii temere ne jemma vaŋno. 30Ciira ko pǝ sǝr mǝ ah Timnat-Serak tǝ waa Efraim nǝfah kah waa Gaas nǝfahsǝŋ.#Jos 19:49-50
31Ne zah'nan Joswa daŋ, za Israel joŋra mor Dǝɓlii tǝkine zah'nan zaluu ma fahfal Joswa daŋ, mor tǝra ɓǝ yeɓ mai daŋ Dǝɓlii mo joŋ wo za Israel ɓe.
32Za Israel ɓaŋra woiŋ Yuseɓ gin sǝr Egiɓ ge ne ko, ge ciira Sikem pǝ 'wah mai Yakuɓ mo lee jol wee Hamor pah Sikem ne solai vãm temere. Sǝr ah ciŋ mǝ wee Yuseɓ.#Tǝŋ 33:19; 50:24-25; Pǝ̃ǝ 13:19; Yoh 4:5; Yeɓ 7:16
33Eleasar we Aron laŋ wǝ ta, ciira ko Gibea yaŋ nan ah Fineas, nyira yaŋ ah nyi ko tǝwaa Efraim.
Bible Moundang © Alliance Biblique du Tchad, 1996.