JOSWA 23
23
Ɓǝ cuu Joswa
1Fahfal ah ka nǝn pǝlli ɓe, Dǝɓlii nyi 'yak nyi za Israel pel za syiŋ ɓǝǝ mai mo ryaŋra ɓo cok daŋ. Ka Joswa laŋ tam ɓe, syii ah joŋ pǝpãa ɓe, 2ɗii za Israel daŋ, zaluu ɓǝǝra, za goŋ ɓǝǝra, za lakaali tǝkine zaluu ma pel ɓǝǝ daŋ faa nyi ra: We ẽe me tam ɓe, syii ɓe joŋ pǝpãa laŋ ɓe. 3So awe laŋ we kwo fan mai Dǝɓlii Masǝŋ ɓii mo joŋ ne zahban marai daŋ pel ɓii ɓe, mor Dǝɓlii Masǝŋ ɓii ye ruu sal mor ɓiiri. 4We ẽe ɗǝ, me wom zah sǝr ɓii nyi we ne cahcah ne za yaŋ ɓiiri, me nyi zahban mai mo coŋ ɓo tǝkine mai me ik ra daga kah el Yordan ŋhaa ge dai zah mabii Mediterrania nǝfah kǝmorcomlil nyi we. 5Mor Dǝɓlii Masǝŋ ɓii ye ga nĩi ra pel ɓii gboroŋ daŋ, awe laŋ we ga re sǝr ɓǝǝ tǝgbana mai Dǝɓlii Masǝŋ ɓii mo faa nyi we. 6Sai we gbǝ zahzyilli, mor ka we byak tǝkine joŋ ɓǝ mai mo ŋwǝǝ ɓo pǝ ɗerewol ɓǝ lai Mosus daŋ, we cak pǝ ɓǝ ah ge nǝjokǝsãh koo nǝjokǝlǝɓai ka. 7We suuki ne zahban mai mo coŋra ɓo kǝsyil ɓii ka, we ɗii masǝŋ ɓǝǝ ra ge zah ɓii ka, we haa zah ne masǝŋ ɓǝǝ ka, we joŋ mor ɓǝǝ ka, we kea ge sǝŋ pel ɓǝǝ ka ta. 8Amma we gbǝ ɓǝ Dǝɓlii Masǝŋ ɓiiri, we mgbãa ko tǝgbana we tǝŋ joŋ ah ɓaaɓe ŋhaa tǝ'nahko. 9Dǝɓlii nĩi zahban maluu maswah rai daŋ pel ɓiiri, ŋhaa tǝ'nahko za ma gak uu pel ɓii kǝka. 10Dǝɓ vaŋno kǝsyil ɓii a gak nĩi za ujenere, mor Dǝɓlii Masǝŋ ɓii ye tǝ ruu sal mor ɓiiri, tǝgbana mo faako nyi we.#CuuƁ 3:22; 32:30 11We byak suu ɓii pǝsãhe, we 'yah Dǝɓlii Masǝŋ ɓiiri. 12We pii soo mgbãa ki ne zahban mai mo coŋra ɓo kǝsyil ɓii, we so kan wee ɓǝǝ so ara laŋ mo kan wee ɓii ta ɓe, 13ka we hǝǝ tǝ njaŋ, Dǝɓlii Masǝŋ ɓii ka ga nĩi zahban rai pel ɓii yao. A ga yeara wo ɓii tǝgbana tǝdah tǝkine mǝmmǝǝ, a yeara kahlaa ɓii tǝgbana zǝlaŋne, a yeara nahnǝn ɓii tǝgbana waa, ŋhaa we ga vǝr gin pǝ sǝr masãh mai Dǝɓlii Masǝŋ ɓii mo nyi we.
14Tǝ'nah ame gwari ne wul o, we tǝ ne zahzyil ɓii tǝkine mazwãhsuu ɓii daŋ, ɓǝ sãh mai Dǝɓlii Masǝŋ ɓii mo faa nyi we daŋ koo vaŋno kǝsyil ah lee ge lal a. 15Amma ɓǝ sãh mai Dǝɓlii Masǝŋ ɓii mo faa tǝ ɓii daŋ ge joŋ wo ɓii ɓe. 16Amma we zǝǝ tǝ ɓǝ gbanzah mai Dǝɓlii Masǝŋ ɓii mo faa ɓe, we so kal ge tǝ syee mor masǝŋ ki cam we kea ge sǝŋ pel ɓǝǝ ɓe, Dǝɓlii ga ge tǝ ɓii ne ɓǝɓe' daŋ mor ka muŋ we gin pǝ sǝr masãh mai Dǝɓlii Masǝŋ ɓii mo nyi we. Nai ta ka we tǝ, Dǝɓlii ga ɓaŋ kpãh tǝ ɓii pǝ'manne, we ga vǝr gin pǝ sǝr masãh mai mo nyiko nyi we gwari.
Bible Moundang © Alliance Biblique du Tchad, 1996.