JOSWA 13
13
Sǝr coŋ ɓo ka ren ba
1Joswa tam ɓe, syii ah joŋ pǝpãa ɓe. Dǝɓlii faa nyi ko: Mo tam ɓe, so sǝr coŋ ɓo pǝlli ka ren ba. 2Sǝr mai mo coŋ ɓo a naiko: sǝr Filistien ne sǝr Gesurien daŋ, 3tǝŋ daga kah el Sihor mai mo tǝŋ sǝr Egiɓ nǝfah kǝmorcomzah'nan ŋhaa ge dai zahsyee Ekron ne fahsǝŋ gbǝm, a keera ra ga tǝkine Kanaanien. Za goŋ Filistien matǝ dappe a naiko: goŋ Gaza, goŋ Asdod, goŋ Askalon, goŋ Gat, goŋ Ekron. So sǝr manyeeki ah mai mo coŋ ɓo a naiko: sǝr Avimien mai mo kaara ɓo nǝfah morkǝsǝŋ cok ahe, 4sǝr Kanaanien tǝkine Meara mǝ Sidonien daŋ ŋhaa ge dai Afek zahsyee Amorien, 5so sǝr Gebal tǝkine sǝr Liban daŋ, tǝŋ daga morcomzah'nan Ba'al-Gad kah waa Hermon ŋhaa ge dai Hamat, 6za ma kaara tǝ waa daŋ tǝŋ daga Liban ŋhaa ge dai Misrefot nǝfah kǝmorcomlilli, ne Sidonien daŋ. Ame ye ga nĩi ra pel za Israel ne suu ɓe, amma ka mo wom sǝr ah nyi za Israel ne cahcah mor ka mo kaara tǝgbana me faa nyi mo.#KeeZ 33:54 7Mo wom sǝr ah zǝzǝ̃ǝ nyi ban Israel camcam doraŋ tǝkine raita ban Manasse.
Woŋra sǝr ma kah el Yordan nǝfah morcomzah'nanne
8Raita ban Manasse ne za Ruben ne za Gad lwaara sǝr ma ɓǝǝ ka ren ɓe, sǝr mai Mosus mo nyi ra kah el Yordan nǝzakǝŋhaa nǝfah kǝmorcomzah'nan tǝgbana Mosus dǝɓ yeɓ Dǝɓlii mo nyi ra.#KeeZ 32:33; CuuƁ 3:12 9Sǝr ah tǝŋ daga Aroyer mai mo kah cok tǝforoŋ Arnon tǝkine cok ma tǝbǝǝ Medeba ŋhaa dai Dibon, 10yaŋ ma tǝluɓ Sihon goŋ Amorien mai mo kaa goŋ ah daga Hesbon ŋhaa ge gbǝ zahsyee ne wee Ammon. 11So tǝŋ daga Giliat ne sǝr Gesurien ne Maakatien nǝkah waa Hermon tǝkine Basan daŋ ŋhaa ge dai Salka, tǝkine 12sǝr mǝ goŋ Og mai mo kaa ɓo sǝr Basan. Kaa yaŋ Askarot ne Edrai. Og coŋ ɓo syak ah kǝsyil za Refaim to. Mosus nĩi goŋ Sihon ne Og gwa daŋ. 13Amma za Israel nĩira Gesurien ne Maakatien a, kaara ɓo kǝsyil za Israel ŋhaa tǝ'nahko.
14Sai ban Lewi syak ɓǝǝ to Mosus nyi sǝr nyi ra ka ren a. Syiŋ suŋwii mai moo tǝǝra pel Dǝɓlii Masǝŋ Israel ye zah faren ɓǝǝ tǝgbana Masǝŋ mo faa ɓo nyi ko.#CuuƁ 18:1
Mosus nyi sǝr nyi ban Ruben
15Mosus nyi sǝr nyi ban Ruben tǝgbana pãa za yaŋ ɓǝǝra. 16Lwaara sǝr ma ɓǝǝ daga Aroyer ŋhaa ge dai kah el Arnon yaŋ ma kah el ah ne ma tǝbǝǝ ah mo gwari ne Medeba daŋ, 17Hesbon ne yaŋ ah maluu mo tǝbǝǝ ah daŋ: Dibon, Bamot-Ba'al ne Bet-Ba'al-Meon, 18Jahaza, Kedemot ne Mefaat, ne 19Kirjataim, Sibma ne Zeret-Sakar ma tǝ waare ne ma pǝ elle, 20ne Bet-Peor ne tǝ waa Pisga ne Bet-Jesimot, 21yaŋ ma tǝbǝǝ ah daŋ tǝkine sǝr Sihon goŋ Amorien mai mo kaa ɓo Hesbon. Mosus i ko tǝkine za goŋ sǝr Midian: Ewi, Rekem ne Zur, Hur tǝkine Reba, ara ye za goŋ mai Sihon mo lwaa ra ɓo, kaara ɓo sǝr ahe. 22Amma Bileam we Beor pa yiila yo, za Israel ira ko pǝ wul tǝkine za ki daŋ. 23El Yordan ciŋ zahsyee sǝr za Ruben. Zah sǝr ma ɓǝǝ ye ne za yaŋ ɓǝǝra, yaŋ maluu mo gŋ tǝkine manyee ah ra daŋ ma ɓǝǝr o.
Mosus nyi sǝr nyi ban Gad
24Mosus nyi sǝr nyi ban Gad, ne za yaŋ ɓǝǝra. 25Zah sǝr ma ɓǝǝ tǝŋ daga Jaizer, ne yaŋ Giliat ra daŋ, tǝkine raita sǝr wee Ammon ŋhaa ge dai Aroyer mai mo pel Rabba. 26So tǝŋ daga Hesbon ŋhaa ge dai Ramat-Mispe ne Betonim, so daga Makanayim ŋhaa ge dai zahsyee Lodebar. 27Sǝr ma pǝ cok tǝforoŋ Yordan ye sǝr Bet-Haram ne Bet-Nimra ne Sukot ne Zafon, marai daŋ tǝcoŋ sǝr Sihon goŋ Hesbon yo. Zahsyee sǝr ɓǝǝ ma fah morcomlil tǝŋ daga el Yordan ŋhaa ge dai mabii Galile nǝfahsǝŋ. 28Mai daŋ sǝr mǝ wee Gad ne za yaŋ ɓǝǝ yo. Yaŋ maluu ne manyee rai daŋ Mosus nyi nyi ban Gad ka mo rera.
Mosus nyi sǝr nyi ban Manasse ma morcomzah'nanne
29Mosus nyi sǝr nyi raita ban Manasse ka renne. 30Zah sǝr ma ɓǝǝ tǝŋ daga Makanayim ge ɓaŋ Basan tǝɗe', sǝr Og goŋ Basan tǝkine yaŋ maluu mǝ Jair mai mo pǝ sǝr Basan yaŋ jemma yea, 31so tǝkine raita Giliat ne Askarot ne Edrai yaŋ maluu mai Og goŋ Basan mo lwaa yo. So ciŋ zah sǝr mǝ wee Makir we Manasse, nyi ra nyi raita wee Makir ne za yaŋ ɓǝǝra.
32Sǝr marai daŋ Mosus wom nyi za kǝsyicok Moab nǝfah kah el Yordan nǝzakǝŋhaa nǝfah kǝmorcomzah'nan Jeriko, ka mo rera. 33Amma Mosus nyi sǝr nyi ban Lewi ka ren a. Mor Dǝɓlii Masǝŋ Israel ye zah faren ɓǝǝ tǝgbana mo faako nyi ra.#KeeZ 18:20; CuuƁ 18:2
Bible Moundang © Alliance Biblique du Tchad, 1996.