JOEL 3
3
Dǝɓlii ga ŋgoŋ kiita tǝ za sǝrri
1Dǝɓlii faa: Ne zah'nan ah me ga zyeɓ ɓǝ jam za sǝr Yuda ne za yaŋ Jerusalem.#Yeɓ 2:17-21 2Me ga tai za sǝr daŋ ga pǝ cok tǝforoŋ Ŋgoŋ Kiita ne ko, me ga ŋgoŋ kiita tǝ ɓǝǝ gŋ, tǝ ɓǝ fan mai daŋ mo joŋra wo za ɓe. Myahra za Israel ge pǝ sǝr manyeeki ah ra camcam, so womra sǝr ɓe kǝsyil ɓǝǝra. 3Ira cahcah tǝ za ɓe, a gbahra wee tǝbanna ne woi lea fan ne ko, mor ka soɓ fan ah soo matǝkoi tǝkine zwan yim ne ko.
4Sǝr Tirus ne Sidon ne Filistia daŋ, we 'yah ka joŋ me sye joŋ ɗǝne? We 'yah ka faŋ val tǝ ɓe ne? Mo nai ɓe, me yee hǝǝ faŋ val tǝ ɓiiri.#Esa 14:29-31; 23:1-18; Jer 47:1-7; Eze 25:15–28:26; Am 1:6-10; Zef 2:4-7; Zak 9:1-7; Mt 11:21-22; Lu 10:13-14 5Awe woo vãm solai ɓe ne vãm kaŋnyeeri, we woo joŋ ɓe ra kal ge yaŋ masǝŋ ki ɓii ra ne ko.#Ro 10:13 6We woo za sǝr Yuda ne za yaŋ Jerusalem gin pǝ sǝr ɓǝǝ kal ne pǝɗǝk we ge lea fan ne ra jol za Grek. 7Zǝzǝ̃ǝko me ga woo ra pǝ cok mai we lea ra ge ɓo gŋ pǝ̃ǝ ne ko. So me ga joŋ fan wo ɓii tǝgbana mai we joŋ wo ɓǝǝ ta. 8Me ga soɓ wee ɓii mawǝǝ ne maŋwǝǝ nyi za sǝr Yuda lea ta. So a ga woora ra lea ga jol Sabien#3:8 Sabien: Tǝɗii za Araɓ matãa yo. pǝɗǝkki. Ame Dǝɓlii me faa naiko.
9We lai ɓǝ mai kǝsyil za sǝr daŋ. We zyeɓ suu salle, we ɗii za maswah ah ra, we tai za sal daŋ ka mo gera. 10We woo kpãh ɓii ra coo kafahe ne ko, we woo gwǝǝ ɓii we coo zǝǝ ne ko. Koo dǝɓ matǝtǝ̃ǝ ah laŋ a gak ruu salle.#Esa 2:4; Mi 4:3 11Awe za mai we kaa ryaŋ sǝr Israel ɓo daŋ, we hǝǝ we ge, we tai ge pǝ cok tǝforoŋ.
Dǝɓlii, mo pee za sal ɓo maswah ah ra ge sǝŋ.
12Za sǝr mo zyeɓra suu ɓǝǝ ka gin pǝ cok tǝforoŋ Ŋgoŋ Kiita. Ame Dǝɓlii me ga kaa gŋ ŋhaa ka ŋgoŋ kiita tǝ za mai mo kaara ryaŋ sǝr Israel daŋ ɓo. 13Ara pǝɓe' no cam, mo cee ra ge sǝŋ tǝgbana dǝɓ moo cen sor ne gwǝǝre. Mo ŋhǝǝ ra tǝgbana dǝɓ moo ŋhǝǝ bii lee kpuu vin pǝ cok ŋhǝǝ ah ka bii ah mo ɗuu.#Caŋ 14:14-16,19-20; 19:15 14Za ujenere ujenere, ara no pǝ cok tǝforoŋ Ŋgoŋ Kiita, mor zah'nan Dǝɓlii moo ga ge gŋ ne a gwari. 15Com ne fĩi daŋ ga joŋ pǝfuu, ŋwǝǝmǝŋgai laŋ ka ga sǝǝra cok ya.
Masǝŋ ga ẽe zan ahe
16Dǝɓlii faa ɓǝ daga tǝwaa Sion, haŋ daga yaŋ Jerusalem, sǝr ne coksǝŋ daŋ laŋ geri geri, amma Dǝɓlii tǝ ga ǝ̃ǝ zan ahe.#Am 1:2 17Za Israel, awe ga tǝ, ame ye Dǝɓlii Masǝŋ ɓiiri, ame kaa ɓo Sion tǝwaa ɓe mai me nǝǝ ɓo, Jerusalem a ga yea yaŋ mai mo nǝǝ ɓo mor Dǝɓlii, za gwǝǝ ka gin ɗaŋra faɗa yao.
18Ne cok ah 'wah kpuu vin a ga yea tǝwaa ra ne lii ah daŋ, tǝgee ra daŋ dǝǝ ga yea gŋ, pǝ el sǝr Yuda ra daŋ bii ga yea gŋ pǝlli. Bii ga ɗuu gin pǝ yaŋ Dǝɓlii ga pǝ cok tǝforoŋ Kpuu Akasia, mor ka mo yea pǝpǝ̃ǝ vuu.
19Sǝr Egiɓ ga ciŋ cok kolle, sǝr Edom ga ciŋ fǝl kolle, mor za sǝr marai ge ruura sal ne sǝr Yuda, ikra zan ah mai mo joŋra ɓǝ ki ya ge lalle. 20-21Me ga faŋ val tǝ za mai mo ik ra ge lal pǝ wulli, me ka ga kwo syak tǝ za ma joŋ ɓǝɓe' ya. Za ga kaara pǝ sǝr Yuda ne yaŋ Jerusalem ŋhaa ga lii. So ame Dǝɓlii laŋ me ga kaa tǝwaa Sion.
Bible Moundang © Alliance Biblique du Tchad, 1996.