JOEL 2
2
Lai tǝ ɓǝ zah'nan Dǝɓlii
1We ul tǝsol salle, we ɓyaŋ ɓǝ Sion, tǝwaa matǝdaŋdaŋ mǝ Masǝŋ. Za sǝr Yuda daŋ, suu mo coora coo, mor zah'nan Dǝɓlii tǝ gin gwari. 2Zah'nan ah a ga yea tǝgbana cokfuu matǝ piɓpiɓɓa, na zah'nan mai swãh moo jǝŋ cok ne pǝfuu. Tǝzyee ma'man ah tǝ ginni, cee ah joŋ cok ɓo tǝgbana com mo tǝ dan ɓe, cee waa moo jǝŋ cokki, tǝzyee ma morãi dǝɓ kwo taa ya, dǝɓ ka so fǝ̃ǝ kwo faɗa yao.
3A renra fakpãhpǝǝ ga ne tǝgbana wii ye tǝ syen cok ganne. Kǝpel ka ɓah ginra ya ba, sǝr a tǝgbana 'wah Eden, amma fahfal mo gera gŋ mo so kalra, sǝr ah so ciŋ cok kolle, fan ki coŋ gŋ ya. 4Ara tǝgbana pǝrri, mo so tǝ ɗuura ɓe, a ɗuura tǝgbana pǝr ma ga zah salle.#Caŋ 9:7-9 5Mo tǝ ɗuura tǝwaa sǝŋ ɓe, cii fan joŋ ɓǝǝ a cii na muŋta sal mai pǝr moo kwakke, wala tǝgbana fãa gao mai wii mo tǝ syen ɓe moo ciini, ara tǝgbana za maswah ah mai moo zyeɓra suu ma ka ruu salle. 6Ne cok mo ge daira ɓe, zune daŋ a ɗuu galle, ŋhaa zahpel ah a fer cam. 7A syeera tǝgbana za maswah ahe, a yeera ɓaale tǝgbana sooje moo yeera. Zune daŋ mo tǝ syee ɓe, a syee ga pel ah jaŋjaŋ, ka rãa ya. 8Koo dǝɓ ma woo mor dǝɓ ki laŋ kǝka, zune daŋ a syee ga pel ah jaŋjaŋ. A ŋgǝ̃ǝra kǝsyil salle, fan ki ka gak cak ra ya. 9A ɗaŋra yaŋ, a yeera tǝ ɓaale, a cwǝǝra ga tǝgǝǝ yaŋ, a danra zahtǝwoo ga ɓǝr yaŋ tǝgbana nyinni.
10Sǝr coo pel ɓǝǝ gǝrgǝrri, coksǝŋ laŋ geri geri. Com ne fĩi daŋ foo pǝfuu, ŋwǝǝmǝŋgai sǝŋ laŋ ka sǝǝ ya.#Caŋ 8:12 11Dǝɓlii ɓyaŋ ɓǝ ne swah pel za sal ahe, za sal ah moo laara zah ah ara pǝpãare, ara pǝswah ta. Zah'nan Dǝɓlii a pǝgaɓ no cam, azu yee gak rõm uu ne ne?#Caŋ 6:17
Ɗii ka toobii
12Dǝɓlii faa: Amma ne daŋ laŋ, zǝzǝ̃ǝko we toobii ne zahzyil ɓii daŋ, we pii soo ge wo ɓe ne syẽe fanne, ne yee tǝkine ɓǝ swaani. 13We soɓ zahzyil nǝǝ ɓii ye mo cuu ɓǝ swaa ɓii ge lalle, we ŋgǝ̃ǝ mbǝro wo suu ɓii to ka.
We pii soo ge wo Dǝɓlii Masǝŋ ɓiiri, mor ako ye Dǝɓ tǝ gboŋgboŋ, a kwan syak pǝlli, a ne rõmme, a gban ɓǝ faa ah mo faa ɓo, cẽecẽe a ne 'yah ka rõm dǝɓɓi, ka ne 'yah ka ŋgoŋ kiita tǝ dǝɓ ya. 14Ɗah maki Dǝɓlii Masǝŋ ɓii a ga fer ɓǝ foo ah mo foo ɓo, a so ẽe we no ne? Nai ɓe, we gak nyi sor tǝkine bii lee kpuu vin nyi ko faɗa.
15We ul kokõorĩi tǝwaa Sion. We lai ɓǝ syẽe fanne, we ɗii za pãa ka mo ge juura pelle. 16We tai zana, we zyeɓ ra mor tai ma mor Dǝɓlii, we tai za maluuri, we tai wee manyee ne wee ma zahwon daŋ. Koo za ma kanra ki pǝfuu laŋ, mo pǝ̃ǝra gin ɓǝr yaŋ ɓǝǝ mo gera ta. 17Za joŋzahsyiŋ mai moo joŋra yeɓ Dǝɓlii pǝ yaŋ Masǝŋ laŋ, mo yera yee tǝkine juupel kǝsyil dǝǝgbil ma zah yaŋ Masǝŋ ne cok joŋ syiŋrĩ, mo faara: Dǝɓlii, mo kwo syak tǝ za ɓo, mo soɓ za ki syẽara ru ka syak ru ne faa, Masǝŋ ɓii kẽne ka.
Masǝŋ so joŋ gboŋgboŋ
18So Dǝɓlii pee suu mbaŋ zyeɓ sǝr ahe, kwo syak tǝ zan ahe. 19Zyii zah ɓǝǝ faa: Zǝzǝ̃ǝko me ga nyi sor ne bii lee kpuu vin tǝkine nǝm nyi we, ŋhaa we ga kǝ̃ǝre. Za ki ka ga syẽara we faɗa yao. 20Me ga nĩi tǝzyee mai mo gera gin fahsǝŋ ge wo ɓii kalle, me ga nĩi manyeeki ah myah ga kǝsyicok pǝ sǝr mayak ahe. Ma kǝpel ah mo gera, me ga nĩi ra myah ga pǝ mabii Wulli, ma fahfal laŋ me ga nĩi ra myah ga pǝ mabii Mediterrania. Wul ɓǝǝ ga zwǝǝ gin tǝ bii sǝŋ, so fuŋ ah ga dah cok daŋ. Me ga joŋ nai mor ɓǝ ɓeɓ fan mai mo ɓeɓra fan ɓiiri.
21'Wahe, we ɗuu gal ka, amma we 'nyah suu, we laa pǝ'nyahre, mor Dǝɓlii joŋ yeɓ ɓo mor ɓii pǝ'manne. 22Nǝǝ cokki, we ɗuu gal ka, mor wom tǝ zyee kǝsyicok o, kpuu tǝ lee o, kpuu wuu tǝkine kpuu vin tǝ leera syẽm o ta.
23Za Sion, we 'nyah suu, we laa pǝ'nyah ne ɓǝ fan mai Dǝɓlii Masǝŋ ɓii mo joŋ mor ɓiiri. Nyi bam zah bam nyi we, so soɓ bam gwahl tǝ ge nyi we, tǝgbana mai mo yea tǝ nyi nyi we ɓaaɓe. 24Cok mai moo ɗuura sor gŋ, sor ga baa gŋ kǝrkǝr, pǝ cok mai moo ŋhǝǝra bii lee kpuu vin gŋ, bii lee kpuu vin ne nǝm ga baa gŋ ta. 25Me ga nyi fakpãhpǝǝ nyi we tǝgbana ma ne cok mai tǝzyee ne tǝzyeari tǝkine tǝcwãa mo ge ɓeɓ jol ɓiiri, mor ame ye Dǝɓ ma pee fan ah ra ginni. 26Zǝzǝ̃ǝko we ga lwaa farel ka renne, ŋhaa we ga kǝ̃ǝ ta. So we ga yii Dǝɓlii Masǝŋ ɓiiri, mor joŋ fan matǝ gǝriŋ ah ɓo mor ɓiiri, za ki ka ga syẽara we faɗa yao. 27Za Israel, so we ga tǝ, me no kǝsyil ɓiiri, ame ye Dǝɓlii, me ye Masǝŋ ɓiiri, dǝɓ ma na me kǝka, za ki ka ga syẽara we faɗa yao.
Masǝŋ ga pee Tǝ'yak ah ge tǝ zana
28 # 2:28 Pǝ Bibel manyeeki ah sapetǝr 3:1 tǝŋ ɓo ne verse 28. Fahfal ah me ga pee Tǝ'yak ɓe ge tǝtǝl za daŋ. Wee ɓii mawǝǝ ne maŋwǝǝ a ga cuura ɓǝ faa ɓe, za tam ɓii a ga loora lomme, wee tǝbanna ɓii a ga kwora fanne. 29Ne cok ah me ga pee Tǝ'yak ɓe ge tǝ za yeɓ ɓe mawǝǝ ne maŋwǝǝ daŋ.
30Ne zah'nan ah me ga cuu fan ma cuu fan daga coksǝŋ tǝkine tǝ sǝrri, syim ga ɗuu, wii ne suŋwii ma'man ah a ga zoo. 31Kǝpel zah'nan malii ne magaɓ Dǝɓlii moo ga ge ne ko, com ga joŋ pǝfuu, fĩi ga fer yea pǝsyẽ na syimmi.#Mt 24:29; Mk 13:24-25; Lu 21:25; Caŋ 6:12-13 32Amma koo zune mo fii Dǝɓlii ka mo gbahko jol ahe, a ga ǝ̃ǝ. Tǝgbana Dǝɓlii mo faa ɓǝ ah ɓo, za ki kǝsyil za yaŋ Jerusalem a ga ǝ̃ǝra. Za mai Dǝɓlii mo syen ra ɓo, a ga yeara sǝŋ ne cee.
Bible Moundang © Alliance Biblique du Tchad, 1996.