ESAIA 11
11
Goŋ matǝ jam
1Morsǝ̃ǝ goŋ David ŋgoŋ ge ɓo lal tǝgbana dǝɓ moo ŋgoŋ kpuu soɓ tǝɓǝr ahe. Amma goŋ mafuu ah ga ur kǝsyil za morsǝ̃ǝ David tǝgbana tǝɓǝr kpuu moo juu goo mafuu ahe.#Caŋ 5:5; 22:16
2Swah Dǝɓlii ga nyi tǝtǝl tan fan nyi tǝkine yella ka kaa goŋ ne tǝ zan ahe. A ga tǝ fahlii ka joŋ 'yah Dǝɓlii tǝkine ɗuu ko. 3A ga laa pǝ'nyah ne joŋ yeɓ ahe. Ka ga ŋgoŋ kiita ne joŋ za camcam wala laa ɓǝ ne sok laa to ya. 4A ga ŋgoŋ kiita tǝ za syak ne fahlii matǝ goŋga ahe, a ga cam tǝtǝl za matǝtǝ̃ǝre. Ɓǝ faa ah mo faa ɓo a ga ŋgoŋ kiita tǝ sǝrri, za ma joŋ faɓe' a ga wukra.#2 Tes 2:8 5A ga kaa goŋ tǝ zan ah ne fahlii matǝ njaŋ ah tǝkine masãhe.#Ef 6:14
6Goobam ne pǝsǝ̃ǝ a ga kaara wo ki jam. Kpiŋ ga swahra kah ki ne wee sǝgwiiri. Wee dǝǝ tǝkine wee ɓol a ga rera wom cok vaŋno, wee nyee yee ga pii ra.#Esa 65:25 7Dǝǝ ne swãhtǝkeekee ga rera wom cok vaŋno, wee ɓǝǝ ga swahra kah ki jam. Ɓol ga rera wom tǝgbana dǝǝ. 8Koo welaŋ mo joŋ kyẽm ne sooyii laŋ, ka ga loŋ ko ya. 9Fan ma gaɓ za wala faɓe' ka ga yea tǝ waa Masǝŋ Matǝdaŋdaŋ ya. Fatan Dǝɓlii ga baa pǝ sǝr ah tǝgbana mabii mo ɓoo ɓo.#Hab 2:14
Za mai mo myahra ɓo a ga pii soora
10Zah'nan ah no ginni, ne cok ah goŋ mafuu ah daga morsǝ̃ǝ David a ga yea tǝgbana fan ma cuu fan nyi za sǝrri, a ga taira ge yaŋ goŋ ah malii ka yii ko.#Ro 15:12 11Ne cok zah'nan ah mo ge dai ɓe, Dǝɓlii ga joŋ yeɓ ne swah ah mo ne ko, ka woo zan ah mai mo coŋ ɓo sǝr Asiria, Egiɓ, sǝr Patros, Etiopia, Elam, Babilon, ne Hamat, ne sǝr ma kah mabii tǝkine ma pǝ kyo kǝsyil mabii daŋ pii soo ge yaŋ ne ko. 12Dǝɓlii ga ɓaŋ tutowal ga sǝŋ mor ka cuu nyi za sǝrri, azye tǝ tai za Israel ne za Yuda mai mo myahra ɓo kahlaa sǝr nai daŋ pii soo gin ne faɗa. 13Sǝr goŋ Israel ka ga joŋ tǝwon ne sǝr Yuda yao, za Yuda ka ga yea na za syiŋ za Israel ao. 14A ga taira ki gwa daŋ, a ga ruura sal ne Filistien mai mo fah kǝmorcomlilli, a ga ɗaŋra za mai mo fah kǝmorcomzah'nan daŋ. A ga ɗaŋra za Edom ne Moab, za Ammon ga syeera mor ɓǝǝra. 15Dǝɓlii ga pee zyak macwak ah ge, a ga yak el Nil, a ga yak el Efrat, a ga woŋ el ah camcam rǝŋ ka dǝɓ mo gak syee yee gŋ ne sǝɓal kpǝ kalle.#Caŋ 16:12 16Ka fahlii lii mo yea gŋ mor zan ah Israel mai mo coŋra ɓo sǝr Asiria, ka mo syeera gŋ tǝgbana ma ne cok mai pa ɓǝǝ lii mo pǝ̃ǝra gin sǝr Egiɓ ge.
Bible Moundang © Alliance Biblique du Tchad, 1996.