HAGAI 2

Yǝk yaŋ Masǝŋ mafuu ahe

1Ne zah'nan jemma gwa tǝtǝl vaŋno pǝ fĩi patǝ rǝŋ ah pǝzyil syii ahe, Dǝɓlii faa ɓǝ nyi profeto Hagai. 2Faa, mo faako nyi Serubabel govener sǝr Yuda, ne Joswa pa joŋzahsyiŋ malii tǝkine za pãa daŋ: 3Za mai mo kwora yǝk yaŋ ɓe ma kǝpel mo yea a no coŋ ɓo kǝsyil ɓii ne? We kwan ɗah matǝ zǝzǝ̃ǝ a ɗǝne? Ka nahnǝn ɓii na fan kol a ne?#Ezr 3:12 4Amma zǝzǝ̃ǝko, koo zune kǝsyil ɓii zahzyil mo nǝǝ we ka, we tǝŋ yeɓɓe, mor me no ne we. 5Ne cok mai we pǝ̃ǝ gin sǝr Egiɓ, me faa nyi we, me ga yea ne we cẽecẽe. Tǝ'yak ɓe no ne we, we ɗuu gal ka.#Pǝ̃ǝ 29:45-46

6Cok coŋ ɓo biŋ nai sye, me ga laŋ coksǝŋ ne sǝr ne cok mayak ah tǝkine mabii daŋ.#Yahu 12:26 7Me ga laŋ za sǝr ne lii ah daŋ, a ga woora fan ɓǝǝ daŋ ge nyee ne ko, joŋ ɓǝǝ ga baa ɓǝr yaŋ ɓe kǝrkǝrri. 8Vãm solai ne vãm kaŋnyeeri mai mo wo sǝr daŋ ma ɓe yo. 9Yaŋ ɓe mafuu a ga yea pǝyǝk kal ma kǝpelle, me ga joŋ za ɓe kaa pǝ cok mai tǝkine laa pǝ'nyahre. Ame Dǝɓlii ma ne swah daŋ me faa naiko.

Profeto Hagai fii za joŋzahsyiŋrĩ

10Ne zah'nan jemma gwa tǝtǝl nai, pǝzyil fĩi doraŋ, ne syii gwa ah Darius mo kaa goŋ ɓo, Dǝɓlii ma ne swah daŋ faa ɓǝ nyi profeto Hagai faɗa. 11Faa: Mo fii za joŋzahsyiŋ tǝ ɓǝ mai ɗǝ: 12Dǝɓ mo ɓaŋ tǝgǝr nǝǝ mai mo mor joŋ syiŋ pǝ cok joŋ syiŋ mo koo ne jol mbǝro ahe, wala mo soɓ mbǝro ah juu tǝwaare, wala mo farel maki ah yo, wala mo bii lee kpuu vin o, mo nǝm yo, wala mo farel maki ah cam yo daŋ, a ga joŋ farel ah yea daŋdaŋ taa ne? Za joŋzahsyiŋ zyiira faa: Kǝka.

13So Hagai fifii kpǝ, faa: Dǝɓ mo ne 'nahm mor juu wul ɓo ɓe, ne cok mo so juuko farel kǝsyil farel marai vaŋno ɓe, a ga joŋ farel ah yea ne 'nahm taa ne? Za joŋzahsyiŋ zyiira faa: Oho.#KeeZ 19:11-22 14So Hagai faa: Dǝɓlii faa: Za mai laŋ ara pel ɓe nai ta, yeɓ mai moo joŋra, tǝkine fan mai moo joŋra syiŋ ne tǝ cok joŋ syiŋ daŋ, a ne 'nahmme.

Dǝɓlii ẽe za Israel

15Dǝɓlii faa: We foo ɓǝ fan mai mo joŋ wo ɓii kǝpel ka we ɓah tǝŋ mor vuu yaŋ ɓe ya ba. 16Ne cok dǝɓ mo ge pǝ cok ɗuu sor mo lǝŋ zye ga lwaa sor gŋ tahsah temere gwa ɓe, amma a lwaa gŋ tahsah temere vaŋno to. Ne cok dǝɓ mo ge pǝ cok ŋhǝǝ bii lee kpuu vin ka bea liitǝr temere vaŋno a lwaa liitǝr jemma nai to. 17Ame pee mǝǝvǝm ne marǝ̃ǝrǝ̃ǝ tǝkine syaŋ ge ɓeɓ fakpãhpǝǝ ɓii daŋ, amma ne daŋ laŋ we toobii ya. 18Zǝzǝ̃ǝko, tǝŋ daga pǝ zah'nan jemma tǝtǝl nai pǝ fĩi doraŋ maiko, mor yaŋ ɓe kpii vǝr ɓe, we foo ɓǝ fan mai mo joŋ wo ɓiiri. 19Ne cok ah sor ka yea ya, kpuu vin ne kpuu wuu ne kpuu grenadin, tǝkine tǝbaakãm daŋ ka lee ya, amma tǝŋ daga zǝzǝ̃ǝko, me ga ẽe we.

Dǝɓlii gbǝ zah ne Serubabel

20Com moo ne zah'nan jemma gwa tǝtǝl nai pǝ fĩi ahe, Dǝɓlii so faa ɓǝ nyi Hagai faɗa. 21Faa: Mo faa nyi Serubabel govener sǝr Yuda sye: Me ga laŋ coksǝŋ tǝkine sǝrri. 22Me ga nǝǝ goŋ gin tǝ za goŋe, me ga vǝr swah ɓǝǝra. Me ga joŋ muŋta sal lea ga sǝŋ tǝkine za ma yee ah daŋ. Pǝr ga wukki, za ma yee tǝ ɓǝǝ a ga ikra ki pǝ wulli. 23Ne zah'nan ah me ga ɓaŋ mo Serubabel dǝɓ yeɓ ɓe, kan goŋ ne tǝ za ɓe, mor amo ye dǝɓ mai me nǝǝ ɓo. Ame Dǝɓlii ma ne swah daŋ me faa naiko.

Currently Selected:

HAGAI 2: MUAR

Highlight

Copy