HAGAI 1
1
Dǝɓlii faa nyi za ka mo jin vuura yaŋ Masǝŋ faɗa
1Ne patǝ gwa syii Darius mo kaa goŋ sǝr Persia ɓo, ne zah'nan vaŋno pǝzyil fĩi patǝ yea ahe, Dǝɓlii faa ɓǝ ne zah Hagai profeto Masǝŋ. Faa ɓǝ ah nyi govener sǝr Yuda Serubabel we Salatiel, ne wo Joswa pa joŋzahsyiŋ malii we Jehosadak.#Ezr 4:24–5:2; 6:14
2Dǝɓlii ma ne swah daŋ faa: Za mai tǝ faara cok vuu yaŋ Masǝŋ ge ya ba. 3Dǝɓlii ma ne swah daŋ faa ɓǝ mai ne zah profeto Hagai: 4Za ɓe, mor fẽe we kaa ɓii ɓo pǝ yaŋ masãh ah ra, so yaŋ ɓe na gboŋ ne? 5We foo ɓǝ fan mai moo joŋ wo ɓiiri. 6We ruu fakpãhpǝǝ pǝlli, amma we lwaa biŋ nai to. We ren farelle, amma farel ah ka kǝ̃ǝ we ya, we zwan bii lee kpuu vin, amma ka in zah koŋ fazwan wo ɓii ya, we ɓoo mbǝro, amma ka lǝǝ cok wo ɓii ya. Dǝɓ ma joŋ yeɓ mor lakre, fan soo ah ka gak kii wol ah ya. 7We foo ɓǝ fan mai mo tǝ joŋ wo ɓiiri. 8Zǝzǝ̃ǝko we yee ge tǝ waare, ka we kyeɓ kpuu ge ne ko, ka we vuu yaŋ ɓe, me ga laa pǝ'nyahre, a ga juura pel wo ɓe gŋ.
9We 'yah ka we lwaa fakpãhpǝǝ ne gwahl pǝlli, amma we so lwaa biŋ. Ne cok we woo fakpãhpǝǝ ge yaŋ ne ɓe, me so fee ga lalle. Ame joŋ nai mor fẽene? Mor yaŋ ɓe ciŋ gboŋ ɓo, zune kǝsyil ɓii daŋ a foo ɓǝ yeɓ yaŋ ma ka syak ah to. 10Mor ah bam ka tan a, fakpãhpǝǝ ka joŋ ya. 11Me faa ka kǝǝ mo ge gbǝ wo sǝrri, mo gbǝ tǝ 'wah sor ɓiiri ne tǝgee ɓii ra, ne tǝ 'wah kpuu vin ne tǝ 'wah tǝbaakãm ɓii ne fakpãhpǝǝ mai daŋ moo ciŋ tǝ sǝrri, ne tǝ dǝfuu, ne faɓal tǝkine tǝ yeɓ mai daŋ dǝfuu moo joŋ ne jolle.
Za syeera mor ɓǝ lai Dǝɓlii
12So Serubabel ne Joswa tǝkine tǝcoŋ za mai daŋ mo coŋ ɓo, joŋra fan mai Dǝɓlii Masǝŋ ɓǝǝ mo faa ɓo nyi ra ka joŋni. Ɗuura galle, syeera mor ɓǝ faa profeto Hagai papee Dǝblii. 13So Hagai kee ɓǝ faa Dǝɓlii mo peeko ne nyi zana. Faa: Dǝɓlii faa: Me ga yea ne we tǝgbana ɓǝ faa ɓe me faa ɓo. 14Dǝɓlii ur zahzyil za daŋ ka mo vuura yaŋ ahe. Serubabel govener sǝr Yuda, Joswa pa joŋzahsyiŋ malii, tǝkine za mai daŋ mo pii soora gin pǝ byak ge mo coŋra ɓo gera, tǝŋ joŋra yeɓ yaŋ Dǝɓlii ma ne swah daŋ Masǝŋ ɓǝǝra. 15Fan ah joŋ ne zah'nan jemma gwa tǝtǝl nai pǝzyil fĩi patǝ yea ahe, ne syii gwa ah Darius mo kaa goŋ ɓo.
Currently Selected:
HAGAI 1: MUAR
Highlight
Share
Compare
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
