PƏ̃Ə ZA ISRAEL 37
37
Sunduku gbanzahe
(Pǝ̃ǝ 25:10-22)
1Bezalel ɓaa sunduku gbanzah ne kpuu akasia. Wah ah i jol gwa ne raita, 'ah ah i jol vaŋno ne raita, giŋ ah i jol vaŋno ne raita. 2Syee vãm kaŋnyeeri masãh ge kǝɓǝr ah ne kǝlal ahe, ɓaŋ tǝkee ah ne vãm kaŋnyeeri kiŋ daŋ. 3Ɓaŋ tǝgaa nai ne vãm kaŋnyeeri mor ahe, mgbãa ge wo kah nyah ah nai daŋ, gwa nǝkǝki gwa nǝkǝki ahe. 4So joŋ kpuu zǝǝ gwa ne kpuu akasia, syee vãm kaŋnyeeri ge wo ɓǝǝra. 5Maa kpuu zǝǝ ah ra ge fah tǝgaa ma kahlaa sunduku mor ka ɓaŋ sunduku ahe. 6Joŋ cok ma rwah faɓe' ne vãm kaŋnyeeri, wah ah i jol gwa ne raita, 'ah ah i jol vaŋno ne raita. 7So coo cerubim gwa ne vãm kaŋnyeeri zahker cok rwah faɓe' gwa daŋ. 8Cerubim vaŋno zahker ah maki, cerubim vaŋno laŋ zahker ah maki ahe, joŋ cerubim zahker cok rwah faɓe' gwa daŋ mgbãa ge wo cok rwah faɓe'. 9Cerubim ah ra gbah yee ɓǝǝ ge ɓo wo ki, gbǝra cee ɓo tǝ cok rwah faɓe' ne yee ɓǝǝra, rǝkra nahnǝn nyi ki, ɗǝmra zahpel ɓǝǝ ge tǝ cok rwah faɓe'.
Taabǝl ma mor farel ma nyi mor Masǝŋ
(Pǝ̃ǝ 25:23-30)
10Zyeɓ taabǝl ne kpuu akasia, wah ah i jol gwa, 'ah ah i jol vaŋno, giŋ ah i jol ne raita. 11Syee vãm kaŋnyeeri ge wol ahe, zyeɓ tǝkee ah ne vãm kaŋnyeeri. 12Zyeɓ zahkee taabǝl ne kpuu, 'ah ah ne 'ah jolle, zyeɓ tǝl ah sǝŋ ne vãm kaŋnyeeri kiŋ daŋ. 13Ɓaŋ tǝgaa vãm kaŋnyeeri nai mor ahe, mgbãa wo kah nyah ah nai mai mo tǝɓal ah ra nai. 14Tǝgaa ah ra mgbãa ɓo gwari ne tǝker ahe, mor ka gban kpuu zǝǝ ka ɓaŋ taabǝl ne ko. 15So joŋ kpuu zǝǝ ah ra ne kpuu akasia, syee vãm kaŋnyeeri ge wo ɓǝǝra, ka ɓaŋ taabǝl ne ko. 16Joŋ fan yeɓ tǝ taabǝl naiko: tahsah ah ra, kǝɗaa ah ra, tǝkpelzaŋraŋ ah ra, tǝkine tahsah ah ra ma joŋ syiŋ ne ko ne vãm kaŋnyeeri masãhe.
Kpuu pitǝrla
(Pǝ̃ǝ 25:31-40)
17Bezalel coo kpuu pitǝrla ne vãm kaŋnyeeri masãhe, so coo ɓal ah ne sol ahe, mgbãa ki ɓo ne fãi fan tǝkine jii fan ah ra. 18Jol yea ur gin kah ah ra, jol sai ur gin kǝki ahe, jol mai sai ur gin kah ah ma kǝki ah ta. 19Kpuu pitǝrla a ne fan ma na fãi kpuu amand tǝ jol ahe, ne jii fan tǝkine fãi fanne. 20Jii fan vaŋno ma cocoo na fãi amand nai, tǝkine jii fan ah ne fãi fan ahe. 21Jii fan vaŋno no mor kǝsǝŋ jol ah ra matǝ gwa ma kǝpelle, so a no mor kǝsǝŋ jol ah ra matǝ gwa patǝ gwa ahe, so a no mor kǝsǝŋ jol ah ra matǝ gwa patǝ sai ah ta. 22Jii fan ah ra ne jol ah ra mgbãa ki ɓo na fan tǝ vaŋno ne kpuu pitǝrla, joŋ ɓo ne vãm kaŋnyeeri masãh ah daŋ. 23Joŋ pitǝrla ah ra rǝŋ, joŋ fan rum wii ahe, tǝkine tahsah ma woo sãh ah ra daŋ ne vãm kaŋnyeeri masãhe. 24Joŋ kpuu pitǝrla matǝ rǝŋ tǝkine fan yeɓ ah ra daŋ ne vãm kaŋnyeeri masãh ta.
Cok tǝǝ syiŋ ɓǝrdi
(Pǝ̃ǝ 30:1-5)
25Zyeɓ cok joŋ syiŋ ma tǝǝ ɓǝrdi ne kpuu akasia, wah ah i jol ɓo vaŋno, 'ah ah i jol ɓo vaŋno ta, wah ne 'ah ah zahki zahki, giŋ ah i jol ɓo gwa, ciŋ ah ra mgbãa ki ɓo ne cok joŋ syiŋrĩ. 26Vãm kaŋnyeeri masãh syee ɓo tǝl ahe, kahlaa ah ra kiŋ ɓo ne ciŋ ah ra, joŋ tǝkee ah kiŋ ɓo daŋ ne vãm kaŋnyeeri. 27Joŋ tǝgaa vãm kaŋnyeeri gwa mor kǝsǝŋ kahlaa ah tǝkee ah gwa, ka maa kpuu zǝǝ ma ɓaŋ ah gŋ. 28Joŋ kpuu zǝǝ ne kpuu akasia, syee vãm kaŋnyeeri ge wol ahe.
Nǝm ma syee tǝtǝlli tǝkine ɓǝrdi
29Joŋ nǝm masãh ma syee tǝtǝlli tǝkine ɓǝrdi ma fuŋ 'nyah masãhe tǝgbana mai pa joŋ ɓǝrdi moo joŋni.
Currently Selected:
PƏ̃Ə ZA ISRAEL 37: MUAR
Highlight
Share
Compare
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
