PƏ̃Ə ZA ISRAEL 36

1Bezalel ne Oholiaɓ tǝkine za makẽne Dǝɓlii mo nyi fatan ɓo nyi ra ne yella, ka tan fan ne joŋ ahe, ka mo joŋra yeɓ tal mbǝro matǝdaŋdaŋ, ka mo joŋra fan daŋ mai Dǝɓlii mo cuu ɓo.

Za gera ne fan nyi pǝlli

2Mosus ɗii Bezalel ne Oholiaɓ tǝkine za ma ne fatan mai Dǝɓlii mo nyi yella nyi ra, ara ye za mai zahzyil ɓǝǝ mo ur ne ɓǝ ah ka joŋ yeɓ ahe. 3A nyiŋra fan nyi mai za Israel mo nyira mor yeɓ tal mbǝro matǝdaŋdaŋ jol Mosus, ka joŋ yeɓ ne ko. Zah'nan daŋ a ginra ne fan nyi ma ne 'yah zahzyilli. 4Comki za fatan mai mo tǝ joŋra yeɓ ah 5ge faara nyi Mosus: Za tǝ ginra ne fan joŋ yeɓ pǝlli kal tǝ mai Dǝɓlii mo cuu joŋ ah ɓo.

6So Mosus pepee ge pǝ cok ɗǝr daŋ faa nyi za ka mo gera ne fan nyi ma mor joŋ tal mbǝro matǝdaŋdaŋ kao. So za soɓra gin ne fan nyi o. 7Amma fan joŋ yeɓ ah kii mor yeɓ ah daŋ ŋhaa coŋni.

Zyeɓ tal mbǝro ma taini

(Pǝ̃ǝ 26:1-37)

8Za ma ne fatan mai moo joŋra yeɓ ah zyeɓra ɓǝr tal mbǝro ne zyim manik ma kaŋ ne syiŋ pǝsǝ̃ǝre, zahban ah camcam jemma: zyim kǝrãhmo, masyẽ, ne masyẽ tǝ nyaknyakke, so kaŋra foto cerubim tǝ zyim ah daŋ.#Pǝ̃ǝ 26:1-37 9Wah zyim ah ra daŋ i jol jemma gwa tǝ nama, 'ah ah i jol nai nai, zyim ah ra lii ɓo zahki zahki. 10Sãara zyim dappe ge wo ki vaŋno, sãara matǝ dappe maki ah ra laŋ ge wo ki vaŋno ta. 11So joŋra tǝgaa ne zyim kǝrãhmo kah zah godel kǝtǝ vaŋno ahe, so joŋra kah zah godel kǝki ah vaŋno, patǝ gwa ah nai ta, jurra ki. 12So sãara tǝgaa jemma dappe ge kah zah godel vaŋno ahe, so sãara tǝgaa jemma dappe ge kah zah godel patǝ gwa ah nǝkǝtǝ vaŋno ah ta. Tǝgaa ah ra sãara ɓyaŋ ki ɓo daŋ. 13So joŋra kǝṽǝl ma gban zyim ma vãm kaŋnyeeri, so gbahra godel ge wo ki ne ko.

14So kaŋra zyim ne syiŋ sǝgwii ge tǝ tal mbǝro ma taini, zyim ah a jemma tǝ vaŋno. 15Wah zyim ah daŋ i jol ɓo jemma sai jemma sai, 'ah ah ra daŋ i jol ɓo nai nai, zyim ah ra lii ɓo zahki zahki. 16Zyim matǝ dappe mai sãa ge ɓo wo ki cam, so zyim matǝ yea maki ah ra laŋ sãa ge ɓo wo ki cam ta. 17Sãara tǝgaa jemma dappe ge kah zah godel vaŋno ah nǝn kǝtǝ vaŋno ahe, so sãara tǝgaa jemma dappe ge kah zah godel patǝ gwa ah kǝtǝ vaŋno ah ta. 18Joŋra kǝṽǝl gban zyim ne vãm syẽ jemma dappe ka tai tal mbǝro, ka mo yea vaŋno. 19So joŋra fan rii tǝtǝl tal mbǝro camcam gwa, vaŋno ah ne wak kǝbǝr ma syesyiŋ, maki ah ne wak syiŋ malii mor ka rii tǝtǝl ah sǝŋ.

20So joŋra plaŋ tal mbǝro ma pea sǝŋ ne kpuu akasia. 21Kpuu ma pea sǝŋ daŋ wah ah i jol jemma jemma, 'ah ah i jol vaŋno ne raita. 22Plaŋ ah ra daŋ a ne fan gban ah ra gwa gwa, mgbãara ki ɓo ne plaŋ ahe, joŋra nai ne plaŋ tal mbǝro daŋ. 23Joŋra plaŋ tal mbǝro naiko: plaŋ jemma gwa nǝfah morkǝsǝŋ tal mbǝro. 24Joŋra ɓal plaŋ ma vãm solai jemma nai mor kǝsǝŋ plaŋ jemma gwa, mor kǝsǝŋ plaŋ vaŋno vaŋno daŋ fan gban ah gwa gwa. 25Joŋra plaŋ jemma gwa nǝfah kǝsǝŋ tal mbǝro 26tǝkine ɓal vãm solai jemma nai, ɓal gwa mor kǝsǝŋ plaŋ ah ra vaŋno vaŋno daŋ. 27Zah kǝndaŋ in zah tal mbǝro ma kǝmorcomlil joŋra plaŋ gŋ yea. 28Joŋra plaŋ gwa mor nyah tal mbǝro. 29Mgbãara plaŋ ah ge wo ki gwa gwa, wah ah dai tǝlǝǝ ahe. Joŋra nai gwa daŋ mor kah nyah tal mbǝro gwa daŋ. 30Joŋra plaŋ nama ne ɓal ah ra ne vãm solai jemma tǝ yea, ɓal gwa a mor kǝsǝŋ plaŋ vaŋno vaŋno daŋ.

31Joŋra kpuu yil plaŋ ah ra dappe ne kpuu akasia mor plaŋ ma laa kǝki tal mbǝro. 32So kpuu yil plaŋ dappe mor plaŋ patǝ gwa ma laa kǝki tal mbǝro, so kpuu yil plaŋ dappe mor plaŋ ma fah zah kǝndaŋ kǝmorcomlil ahe. 33Kpuu yil plaŋ ma kǝsyil tal mbǝro ur daga kǝki ŋhaa dai kǝki ahe. 34Syeera vãm kaŋnyeeri ge wo plaŋ ahe, ɓaŋra tǝgaa ma gban kpuu yil plaŋ ne vãm kaŋnyeeri. Syeera vãm kaŋnyeeri ge wo kpuu yil plaŋ ah ta.

35Zyeɓra zyim rii cok ne zyim manik ma kaŋ ne syiŋ pǝsǝ̃ǝre, makǝrãhmo, masyẽ, ne masyẽ tǝ nyaknyakke. So kaŋra foto cerubim wo zyim ah ta. 36Joŋra wǝǝdǝǝ ne kpuu akasia nai ka saa zyim rii cokki, so syeera vãm kaŋnyeeri ge wol ahe, kǝṽǝl ah ra joŋ ɓo ne vãm kaŋnyeeri, ɓaŋra ɓal ɓǝǝ nai ne vãm solai ka gban wǝǝdǝǝ ne ko. 37Zyeɓra zyim ɓoo zahfah tal mbǝro ne zyim manik ma kaŋ ne syiŋ pǝsǝ̃ǝre, makǝrãhmo, masyẽ, ne masyẽ tǝ nyaknyakke, kaŋra ŋwǝŋwǝǝre. 38Joŋra wǝǝdǝǝ ah ra dappe ne kǝṽǝl ah ra, syeera vãm kaŋnyeeri ge wo tǝtǝl ah ra ne faɓyak ah ra, ɓal ah ra dappe joŋ ɓo ne vãm syẽ.

Currently Selected:

PƏ̃Ə ZA ISRAEL 36: MUAR

Highlight

Compare

Copy