PƏ̃Ə ZA ISRAEL 34

Dǝɓlii cuu ɓǝ lai ah nyi Mosus faɗa

(CuuƁ 10:1-5)

1Dǝɓlii faa nyi Mosus: Mo zyeɓ tǝsal gwa jur ne ma kǝpel kŋ, ka me so ŋwǝǝ ɓǝ mai mo yea ŋwǝǝ ɓo tǝ tǝsal ah ra mai mo dahe. 2Mo zyeɓ suu ɓo mor zah'nanne. Ne zah'nan mo yee ge tǝlǝǝ waa Sinai, mo ge uu pel ɓe gŋ. 3Dǝɓ mo yee ge ne mo ka, koo dǝɓ vaŋno mo ge tǝ waa laŋ ka, ŋgaɓ gwii tǝkine dǝǝ mo pii ge gwari ne waa laŋ ka ta. 4Mosus zyeɓ tǝsal ah ra gwa na ma kǝpelle, so ur ne zah'nan pimpim yee tǝ waa Sinai, tǝgbana Dǝɓlii mo faa nyi ko, woo tǝsal ah ra mor jol gwa daŋ.

5Dǝɓlii ɗǝr ge pǝzyil swãh bamme, uu ne ki gŋ, so cuu tǝɗii ah matǝdaŋdaŋ nyi ko. 6Dǝɓlii ge pǝ̃ǝ pel ahe, so faa ɓǝ nyi ko ne kyaŋ lii faa: Ame Dǝɓlii Masǝŋ ma kwan syakke, Dǝɓ matǝ gboŋgboŋ, Dǝɓ mai mo ka ɓaŋ kpãh gwari ya, Dǝɓ ma ne 'yah lii tǝkine goŋga,#Pǝ̃ǝ 20:5-6; KeeZ 14:18; CuuƁ 5:9-10; 7:9-10 7Dǝɓ ma no ne 'yah zahŋhǝǝtǝ̃ǝ ujenere, Dǝɓ ma rwah faɓe' ne ɓǝɓe' zana, amma me ka soɓ dǝɓ faɓe' bai ŋgoŋ kiita tǝl ah ya, me ga faŋ val faɓe' pam tǝ weere, ne wee ɓǝr ɓǝǝra, ŋhaa tǝ zahŋhǝǝtǝ̃ǝ patǝ sai ne patǝ nai ah daŋ.

8Ne pel sǝ Mosus ɗǝŋ tǝtǝl ge sǝŋ, kea ne zahciŋɓalle, 9faa: Oseni Dǝɓlii ɓe, moo joŋ gboŋgboŋ wo ɓe no ɓe, mo syee ne ru, mor tǝtǝl za nyẽe pǝyakke, mo rõm ɓǝɓe' ɓuu tǝkine faɓe' ɓuuru, mo nyiŋ ru na za ɓo.

Masǝŋ gbǝ zah ne za Israel kpǝ

(Pǝ̃ǝ 23:14-19; CuuƁ 7:1-5; 16:1-17)

10Masǝŋ faa nyi Mosus: Mo ẽe ɗǝ, zǝzǝ̃ǝko me ga gbǝ zah ne we, me ga joŋ fan matǝ gǝriŋ mai fan ah mo ɓah joŋ wo sǝr kǝsyil zahban daŋ taa ya ba pel ɓiiri, za mai mo no tǝgǝǝ ɓii daŋ ga kwora yeɓ ɓe Dǝɓlii, mor fan mai me ga joŋ ne we, ɓǝ myah zwãh dǝɓ yo.#Pǝ̃ǝ 23:14-19; CuuƁ 7:1-5; 16:1-17 11We foo ɓǝ mai me faa nyi we tǝ'nahko. We laa ɓe, me ga nĩi Amorien, Kanaanien, Hetien, Perisien, Hevien, tǝkine Jebusien pel ɓiiri. 12We joŋ yella, ka we gbǝ zah ne za ma kaara sǝr mai we tǝ ga gŋ ka, ka mo ciŋra mǝmmǝǝ pel ɓii ka. 13Amma we hah cok joŋ syiŋ ɓǝǝ ge sǝŋ, we dah fan ma cuu masǝŋ ɓǝǝ ge lalle, we cee masǝŋ ɓǝǝ ge lal ta.#CuuƁ 16:21

14We kea ge sǝŋ pel masǝŋ ki cam ka, mor me ɗii suu ɓe ne Masǝŋ tǝwonni, ame ye Masǝŋ tǝwonni. 15Ka we gbǝ zah ne za sǝr ah ka. Mor ne cok mo tǝ juura pel wo masǝŋ ɓǝǝ tǝkine joŋ syiŋ wo ɓǝǝ ɓe, a ga ɗiira we ka we tai ne ra, a ga kǝǝra we ka ren farel mai mo nyira ɓo nyi masǝŋ ɓǝǝra. 16Maki wee ɓii mawǝǝ ga kan wee ɓǝǝ maŋwǝǝre, a ga kǝǝra wee ɓii joŋra ɓǝɓe' wo ɓe ne juupel wo masǝŋ ɓǝǝra.

17We coo masǝŋ ki cam ne vãm ka juupel wo ɓǝǝ ka.#Pǝ̃ǝ 20:4; Lew 19:4; CuuƁ 5:8; 27:15

18We joŋ fĩi farel ma bai fan mbǝ̃ǝre, tǝgǝǝ zah'nan rǝŋ we re farel ma bai fan mbǝ̃ǝre tǝgbana mai me ree nyi mo. Me cuu cok joŋ ah pǝ fĩi Abiɓ, mor we pǝ̃ǝ ne ko gin sǝr Egiɓ.#Pǝ̃ǝ 12:14-20; Lew 23:6-8; KeeZ 28:16-25

19Welii daŋ ma ɓe yo, welii ŋgaɓ fan daŋ, mǝ dǝǝ koo gwii.#Pǝ̃ǝ 13:2 20We wǝǝ tǝ welii korro ne gwii. We zyii ka wǝǝ tǝl ah ya ɓe, ka we hao sol ahe. We wǝǝ tǝ welii ɓii ra daŋ. Dǝɓ mo ge pel ɓe ne jol kol ka.#Pǝ̃ǝ 13:13

21We joŋ yeɓ tǝgǝǝ zah'nan yea, amma ne zah'nan rǝŋ ah we 'yakke, koo ne cok pǝpǝǝ, koo ne cok gwahlle, we 'yakke.#Pǝ̃ǝ 20:9-10; 23:12; 31:15; 35:2; Lew 23:3; CuuƁ 5:13-14 22Ne cok we tǝŋ tai fakpãhpǝǝ ɓii ma joŋ kǝpel ɓe, we joŋ fĩi ahe, so ne cok we joŋ fagwahl ɓii daŋ vǝr ɓe, ka we joŋ fĩi julli.#Lew 23:15-21,39-43; KeeZ 28:26-31

23Za wǝǝ ɓii daŋ mo ge juura pel wo ɓe Dǝɓlii Masǝŋ Israel pǝ syii vaŋno ɓal sai. 24Me ga nĩi zahban camcam pel ɓiiri, me ga 'ah zahsyee sǝr ɓiiri, ka ne cok mai we ge ka juupel ɓal sai pǝ syii ɓe, ka dǝɓ mo kyeɓ ka ren sǝr ɓii ka.

25Ne cok we ŋgoŋ faɓal joŋ syiŋ ne wo ɓe ɓe, we tai ne paŋgasso ma joŋ ne fan mbǝ̃ǝ ka, we soɓ nǝǝ joŋ fĩi Paska cee zah'nan ka.#Pǝ̃ǝ 12:10

26We ge pǝ yaŋ ɓe Dǝɓlii ɓii ne lee syẽm kpuu ma ruŋ kǝpelle.

We kǝǝ we gwii tǝ wii ne won mah ah ka#34:26 Mo ẽe ɓǝ mai mo ŋwǝǝ ɓo mor ɓǝ ma pǝ sapetǝr 23:19..#CuuƁ 14:21; 26:2

27So Dǝɓlii faa nyi Mosus: Mo ŋwǝǝ ɓǝ maraino, mor tǝ ɓǝ ah ra, me gbǝ zah ɓo ne mo tǝkine za Israel daŋ. 28Mosus kaa tǝ waa ne Dǝɓlii zah'nan jemma nai, suŋ jemma nai ta, re farel a, zwǝ bii ya ta. Dǝɓlii ŋwǝǝ ɓǝ gbanzah tǝ tǝsal ah ra, tǝgba faa, ɓǝ lai jemma vaŋno.

Mosus ɗǝr gin tǝ waa Sinai

29Ne cok Mosus mo ɗǝr gin tǝ waa Sinai, a ne tǝsal ma ne ɓǝ lai jol gwa, tǝ sõone zahpel ah tǝ sǝsãh mor faako ɓǝ ɓo ne Masǝŋ ya.#2 Kor 3:7-16 30Ne cok Aron tǝkine za Israel daŋ mo kwora zahpel Mosus tǝ sãhni, ɗuura galle, gera wol ah gwari ya. 31Mosus so ɗii ra. Aron tǝkine zaluu Israel daŋ so pii soora ge wol ahe, so Mosus faa ɓǝ ne ra. 32Fahfal ah za Israel daŋ gera wol ahe, so kee ɓǝ lai makẽne Dǝɓlii mo faa nyi ko tǝ waa Sinai daŋ nyi ra. 33Ne cok Mosus mo i zah ɓǝ faa ne ra, ɓaŋ zyim rii zahpel ah ne ko. 34Ne cok Mosus mo ge pǝ tal mbǝro ma tai ka faa ɓǝ ne Dǝɓlii ɓe, a wǝǝ zyim rii zahpel ah ga lalle. Mo so pǝ̃ǝ ge lal ɓe, a faa ɓǝ makẽne Dǝɓlii mo ree nyi ko nyi za Israel. 35Za Israel moo kwanra zahpel Mosus sǝǝ ma ne, Mosus so jin koo zahpel ah ne zyimmi, sai ka ge ɓo tǝ faa ɓǝ ne Dǝɓlii.

Currently Selected:

PƏ̃Ə ZA ISRAEL 34: MUAR

Highlight

Compare

Copy