PƏ̃Ə ZA ISRAEL 33

Dǝɓlii faa za Israel mo zolra gin kah waa Sinai

1Dǝɓlii faa nyi Mosus: Mo gyo, mo zol gin nyee ne za mai mo pǝ̃ǝ ne ra gin sǝr Egiɓ, we ge tǝ sǝr mai me haa zah nyi Abraham, Isak tǝkine Yakuɓ, me faa me ga nyi nyi morsǝ̃ǝ ɓǝǝra.#Tǝŋ 12:7; 26:3; 28:13 2Me ga pee angelos ga pel ɓiiri, me ga nĩi Kanaanien, Amorien, Hetien, Perisien, Hevien, tǝkine Jebusien 3tǝ sǝr masãh ma joŋ fan lii ko. Amma me ka ga yea tǝgǝǝ ɓii ya, mor awe ye za tǝtǝl yakke, maki me ik we tǝ fahlii.

4Ne cok za Israel mo laara ɓǝ magaɓ naiko, yera yee. Koo dǝɓ vaŋno ma ɓaa fan gai ah ra ga wo suu kǝka. 5Mor Dǝɓlii faa nyi Mosus kǝpelle: Mo faa nyi za Israel: Awe ye za tǝtǝl yakke, me kal dan ge kǝsyil ɓii tǝgbana daa nǝn to laŋ, maki me ga ik we. Zǝzǝ̃ǝko we wǝǝ fan gai wo suu ɓii ge lalle, me ga tǝ fan mai mee ga joŋ ne we. 6So za Israel hǝǝ wǝǝra fan gai ɓǝǝ gin wo suu ge lalle, ka ɓaara yao.

Ɓǝ tal mbǝro ma taini

7Ne cok kyãh ɓǝǝ, Mosus a gaa tal mbǝro ma tai fahfal cok ɗǝr pǝɗǝkki. A ɗiira ne tal mbǝro ma taini. Koo zune daŋ mo tǝ 'yah fii Dǝɓlii a pǝ̃ǝ gin wo tal mbǝro ma taini. 8Ne cok fẽene daŋ Mosus mo tǝ pǝ̃ǝ ga pǝ tal mbǝro ma taini, za daŋ ur uu sǝŋ ne ɓal zah tal mbǝro swul ɓǝǝra, a ẽera fahfal Mosus ŋhaa a dan ga pǝ tal mbǝro ma taini. 9Ne cok fẽene daŋ Mosus mo dan ge pǝ tal mbǝro ɓe, waddǝǝ swãh bam ɗǝr gin uu zahfah tal mbǝro, Dǝɓlii a faa ɓǝ ne Mosus gŋ. 10So za daŋ mo kwora waddǝǝ swãh bam mo uu ɓo zahfah tal mbǝro ma taini, a keara ga sǝŋ. 11Dǝɓlii a uu pel Mosus faa ɓǝ ne ki tǝgbana dǝɓ moo faa ɓǝ ne bai ahe, so Mosus a pii soo gin zahjulli. Amma we tǝbanna Joswa dǝɓ yeɓ ah we Hur ka soɓ cok gin zah tal mbǝro ya.

Dǝɓlii faa zye ga syee ne za Israel

12Mosus faa nyi Dǝɓlii: Mo laa ɗao, mo tǝ faa nyi me, me ge ne za nyẽeko, mo so cuu dǝɓ mai moo ga pee ga ne me nyi me ya. Ne ko daŋ mo faa mo tǝ me na fan ɓo, ame pǝsãh wo ɓo. 13Amma zǝzǝ̃ǝko me pǝsãh wo ɓo ɓe, mo cuu ɓǝ foo ɓo ra nyi me, ka me tǝ mo, me joŋ yeɓ ɓo, me joŋ fan ma 'nyah suu ɓo. Mo foo ɗao, zahban mai amo ye nǝǝ ra ka ciŋ za ɓo. 14Masǝŋ zyii faa: Me ga ne mo ne suu ɓe, mo ka ga swaa ɓǝ ya. 15Mosus so zyii faa: Mo ge ne ru ne suu ɓo ya ɓe, mo soɓ ru zol gin cok mai ɗǝ ka. 16Dǝɓ tǝ ne fẽe ame tǝkine za ɓo rai daŋ mo joŋ gboŋgboŋ ɓo wo ɓuu ne? Ako ye ka syel ɓo moo syee ne ru ŋhaa ka mo joŋ ru cam ne za ki mo no wo sǝr sye ya ne?

17Dǝɓlii faa nyi Mosus: Fan mai mo fii me tǝl ah daŋ me ga joŋ, mor me tǝ mo ɓo pǝsãhe, me laa pǝ'nyah ne mo. 18Mosus so faa nyi ko: Oseni mo cuu cokfãi ma cuu yǝk ɓo nyi me ɗao. 19Dǝɓlii zyii faa: Me ga pǝ̃ǝ pel ɓo ne cuu yǝk ɓe nyi mo, me ga cuu tǝɗii ɓe Dǝɓlii nyi mo ta, me ga joŋ bǝ̃ǝ wo dǝɓ mai me 'yah joŋ bǝ̃ǝ wol ahe, me ga kwo syak tǝ dǝɓ mai me 'yah kwan syak tǝl ahe.#Ro 9:15 20So faa: Me ka soɓ mo kwo zahpel ɓe ya, mor dǝɓ ka kwan me ka mo so yeako ne cee ya. 21Dǝɓlii faa: Cok no kah ɓe nyeeno, mo uu tǝ pǝɗakka. 22Ne cok mai cokfãi ma cuu yǝk ɓe moo gin pǝ̃ǝ, me ga kan mo pǝ yii pǝɗakka, me ga rii zah ɓo ga gŋ ne jol ɓe, ŋhaa ka me pǝ̃ǝ kalle, 23ka me ge ɓaŋ jol ɓe gur ɓe, mo ga kwo fah kǝfal ɓe, amma mo ka ga kwo kǝpel ɓe ya.

Currently Selected:

PƏ̃Ə ZA ISRAEL 33: MUAR

Highlight

Compare

Copy