PƏ̃Ə ZA ISRAEL 17
17
Bii ɓal tǝ pǝɗakka
1Za Israel urra gin kǝsyicok Sin, syeera syeesyee tǝgbana Dǝɓlii mo cuu nyi ra, so ge ɗǝrra Refidim, amma lwaara bii zwan gŋn a. 2Mor maiko za ur ne Mosus ne balle, faara: Mo nyi bii nyi ru zwahe. So Mosus faa nyi ra: We ur tǝ ɓe mor fẽene? We lii Dǝɓlii mor fẽene? 3Amma koŋ bii i za Israel cok ah pǝlli, kyãhra ɓǝ nyee wo Mosus, faara: Mor fẽe mo pǝ̃ǝ gin sǝr Egiɓ ne ru ka gin ik ru ne wee ɓuu ne faɓal ɓuu daŋ ne koŋ bii ne? 4Mosus ɓyaŋ ɓǝ wo Dǝɓlii, faa: Me ga joŋ ne za mai ɗǝne? Coŋ ɓo biŋ ka mo ɓaara me ne tǝsalle. 5Dǝɓlii faa nyi Mosus: Mo pǝ̃ǝ ge pel zana, mo woo zaluu Israel tai suu ɓo ne ko, mo ɓaŋ kǝndaŋ ɓo mai mo i bii zǝǝ Nil ne kŋ mor jol ɓo, mo gyo. 6Me ga uu pel ɓo ŋhaa tǝ pǝɗakka tǝ waa Sinai. Ka mo i pǝɗakka ka bii mo ɓal gin gŋ za mo zwahe. Mosus joŋ pel zaluu Israel naiko.
7Mosus ɗii cok ah ne Massa, ne Meriba ta, mor za Israel baara zahe, so liira Dǝɓlii gŋ faara: Dǝɓlii no tǝgǝǝ man ne? Wala kǝka ne?
Amalek ge ruu sal ne za Israel ne zan ahe
8Za Amalek ge ruura sal ne za Israel Refidim. 9Mosus so faa nyi Joswa: Mo syen za kǝsyil za tai suu ɓo ne ko, ka mo pǝ̃ǝ tǝ'nan ka ruu sal ne za Amalek. Ame laŋ me ga uu tǝgee sǝŋ ne kǝndaŋ Dǝɓlii jolle. 10Joswa joŋ na mai Mosus mo faa nyi ko, ruu sal ne za Amalek. Mosus ne Aron tǝkine Hur yeera ge tǝgee sǝŋ. 11Ne cok Mosus mo ɓaŋ jol ah ge sǝŋ ɓe, za Israel nĩi salle, so mo ɓoo jol ge sǝŋ ɓe, za Amalek nĩi salle. 12Ŋhaa jol Mosus wuu kpaŋgu kpaŋgu, so ɓaŋra tǝsal kan mor ahe. Mosus so kaa tǝl ahe. Aron ne Hur woora jol ah ge sǝŋ, dǝɓ ki nǝkǝnyeeno, dǝɓ ki nǝkǝŋhaano. Jol Mosus soɓ nooko ŋhaa com danne. 13Joswa ɓoo bii zah za Amalek ceera ne kafahe.
14Dǝɓlii Masǝŋ faa nyi Mosus: Mo ŋwǝǝ ɓǝ mai ge pǝ ɗerewol ka foo ɓǝ ahe, mo kan ɓǝ ah ge Joswa sokki, mor me ga vǝr tǝɗii za Amalek tǝɗe' gin wo sǝrri.#CuuƁ 25:17-19; 1 Sa 15:2-9 15Mosus vuu cok joŋ syiŋ wo Dǝɓlii, ɗii cok ah ne Dǝɓlii-Ye-Tutowal-Ɓe, 16faako sye: Mor ɓaŋ jol ɓo sǝŋ tǝ yǝk Dǝɓlii, Dǝɓlii ga ruu sal ne zahŋhǝǝtǝ̃ǝ ɓǝǝ ga lii ga lii.
Currently Selected:
PƏ̃Ə ZA ISRAEL 17: MUAR
Highlight
Share
Compare
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
