PƏ̃Ə ZA ISRAEL 16

Masǝŋ nyi manna nyi za Israel

1Ne zah'nan jemma tǝ dappe ne patǝ gwa fĩi fahfal mo pǝ̃ǝra gin sǝr Egiɓ, pãa za Israel daŋ urra gin Elim ge daira kǝsyicok Sin mai mo kǝsyil Elim ne Sinai. 2Pãa za Israel daŋ kyãhra ɓǝ nyee wo Mosus ne Aron kǝsyicokki, 3faa nyi ra: Kǝnah ru wuk ɓo ne jol Dǝɓlii tǝ sǝr Egiɓ ne cok ru kaa ɓo zah cii nǝǝ ne ren paŋgasso kǝ̃ǝni. So we woo ru za mapãa mai daŋ ka wuk kǝsyicok mai ne koŋne.

4So Dǝɓlii faa nyi Mosus: Me ga soɓ farel 'mǝr gin nyi we sǝŋ, za ga pǝ̃ǝ ga woora nǝn zah'nan vaŋno vaŋno cẽecẽe, ka me lii ra, ɗah a syeera mor ɓǝ lai ɓe ra no, wala ka syeera ya ne?#Yoh 6:31 5Amma ne patǝ yea zah'nanne, ka mo woora nǝn zah'nan gwa mo zyeɓra kanne.

6Mosus ne Aron faara nyi za Israel: Ne lil we ga tǝ, Dǝɓlii ye pǝ̃ǝ ne we gin sǝr Egiɓ, 7so ne zah'nan we ga kwo yǝk Dǝɓlii mor we tǝ kyãh ɓǝ nyee wol ahe. Oho, ɓǝ nyee mai we tǝ kyãh we ka tǝ kyãh wo ɓuu ya, mor aru ye za ma joŋ yeɓ ah to. 8So Mosus faa: Dǝɓlii ga nyi nǝǝ nyi we re ne lilli, ne zah'nanne paŋgasso ye yea, we ga re kǝ̃ǝ, mor Dǝɓlii laa ɓǝ nyee mai we tǝ kyãh wol ah ɓe. We ka tǝ kyãh ɓǝ nyee wo ɓuu ya, amma we tǝ kyãh wo Dǝɓlii.

9Mosus faa nyi Aron: Mo faa nyi pãa za Israel daŋ mo gera pel Dǝɓlii, mor laako ɓǝ nyee ɓii ɓe. 10Ne cok Aron mo tǝ faa ɓǝ nyi pãa za Israel daŋ, pakra nahnǝn fah kǝsyicok kwora yǝk Dǝɓlii cuu pǝzyil swãh bamme. 11Dǝɓlii faa nyi Mosus: 12Me laa ɓǝ nyee za Israel ɓe. Mo faa nyi ra: Ne cok tǝ foofoo we ga re nǝǝ, ne zah'nan we ga kǝ̃ǝ ne paŋgasso, awe ga tǝ, ame ye Dǝɓlii Masǝŋ ɓiiri.

13Lil mo joŋ o, wee juu mortahl ge koo cok ɗǝr ɓǝǝ kǝrikki, ne zah'nan mahm nǝn ryaŋ cok ɗǝr ɓǝǝ daŋ. 14Ne cok mahm ah mo vǝrri, so fan ki no lal a tǝ sǝr pǝnyee na nah fanne, maki ah na lǝǝ juu. 15Za Israel ge kwora fan ahe, faara tǝgǝǝ ki: A fẽe mai na? Mor ɓah tanra fẽe ye ne ya ba. Mosus faa nyi ra: Farel mai Dǝɓlii mo nyi ɓo we ka we re ko yo.#1 Kor 10:3 16Ɓǝ mai Dǝɓlii mo faa tǝl ah a naiko: Koo zune daŋ mo woo nǝn ahe, dǝɓ vaŋno tahsah lii fan vaŋno ta, nǝn pãa za piicel ɓiiri, koo zune kǝsyil ɓii daŋ mo ge woo mor za ɓǝr yaŋ ahe.

17Za Israel joŋra na mooko, za nyeeki woo kal tǝl ahe, za nyeeki woo nǝn ɓǝǝ ya. 18So mo ge liira ne tahsah, dǝɓ mo woo pǝlli so coŋ fan ki ya, dǝɓ mo woo biŋ so pee ya, koo zune daŋ woo ɓo nǝn farel ahe.#2 Kor 8:15 19Mosus faa nyi ra ka dǝɓ vaŋno mo coŋ kan dai zah'nan ka. 20Amma laara ɓǝ faa Mosus ya, za nyeeki soɓ tǝcoŋ ah dai zah'nanne, so syer cwǝ̃ǝre, a fuŋ pǝsõo. Mosus ɓaŋ kpãh ne ra. 21Zah'nan Masǝŋ daŋ koo zune daŋ a woo nǝn farel ahe. Ne cok com mo lǝǝ ɓe, farel mai mo coŋ ɓo tǝ sǝr a hǝǝni.

22Ne patǝ yea zah'nanne, woora farel nǝn zahlǝŋ gwa, tahsah gwa tǝ dǝɓ vaŋno. Zaluu pel za ge keera ɓǝ ah nyi Mosus. 23Mosus so faa nyi ra: Dǝɓlii faa ɓǝ ah ɓo naiko, tǝ'nan sye, zah'nan 'yak yo, com 'yak Dǝɓlii yo. We gǝr sum mai we 'yah ka gǝrri, we kǝǝ fan mai we 'yah ka kǝǝni, tǝcoŋ fan daŋ mai mo ga coŋ we kan mor zah'nanne.#Pǝ̃ǝ 20:8-11 24So soɓra fan ah dai zah'nanne, tǝgbana Mosus mo lai ɓǝ ahe, ka fuŋ sõo ya, syer cwǝ̃ǝ ya ta. 25Mosus faa: We re mai tǝ'nahko, mor tǝ'nah com 'yak Dǝɓlii yo, we ka lwaa fan ki lal a. 26Tǝgǝǝ zah'nan yea we woo o, amma ne zah'nan rǝŋ ah mai mo ye com 'yakke, we ka lwaa fan ki ne ya.

27Ne zah'nan ah za ki ur kǝsyil ɓǝǝ ka ga wooni, amma lwaara fan ki ya. 28So Dǝɓlii faa nyi Mosus: We ga gbǝ ɓǝ lai ɓe nekẽne? 29We ẽe ɗǝ, Dǝɓlii nyi zah'nan com 'yak nyi we, mor ah ne zah'nan yea ah a nyi farel nyi we mor zah'nan gwa, ka koo zune daŋ mo kaa pǝ cok kal ahe, mo kyãhko ne zah'nan rǝŋ ah ka. 30So ne zah'nan rǝŋ ah 'yakra bai joŋ yeɓɓe.

31Za Israel ɗiira farel mai ne manna, jur nah fan manyee ah ɓo, a pǝfãi, dǝɓ laa na sum tǝnjwǝǝre.#KeeZ 11:7-8 32Mosus faa: Dǝɓlii faa ɓǝ ah ɓo sye: We soɓ tahsah manna kan vaŋno mor wee ɓǝr ɓiiri, ka mo ge kwora farel mai me nyi we re kǝsyicok ne cok me pǝ̃ǝ gin sǝr Egiɓ ne we. 33-36Tahsah ah vaŋno a tǝgbana tahsah jemma gwa ma tǝ'nahko. Mosus faa nyi Aron: Mo ɓaŋ ciiri, ka mo rǝk manna tahsah tǝ vaŋno ge gŋ, mo kan pel Dǝɓlii ka byak gŋ mor wee ɓii ma fahfalle. Aron ge kan fan ah pel sunduku gbanzahe, tǝgbana Dǝɓlii mo faa. Za Israel rera manna tǝgǝǝ syii jemma nai ŋhaa ge daira tǝsyee sǝr Kanaan.#Yahu 9:4#Jos 5:12

Currently Selected:

PƏ̃Ə ZA ISRAEL 16: MUAR

Highlight

Compare

Copy