PƏ̃Ə ZA ISRAEL 14
14
Za Israel yeera mabii Syẽ
1Dǝɓlii faa nyi Mosus: 2Mo faa nyi za Israel mo pii soora ge falle, mo ɗǝrra gwǝǝ ɓǝǝ pel Pi-Hahirot tǝgǝǝ Migdol ne mabii, pel Ba'al-Zefon jaŋjaŋ, we ɗǝr gŋ kah mabii Syẽ. 3Farao ga faa kal za Israel sye: Zyakra pǝ sǝr mai ɓe, kǝsyicok laŋ ga cak zah ɓǝǝ ka mo gera pel ka. 4Me ga yak zahzyil Farao, so a ga foo mor ɓiiri, amma me ga cuu yǝk suu ɓe tǝ Farao tǝkine za sal ahe. Egiɓien ga tǝra, ame ye Dǝɓlii. So za Israel joŋra nai ta.
5Ge faara ɓǝ ah nyi goŋ Egiɓ: Za Israel ɗuura ɓe. So zahzyil Farao ne mǝ za yeɓ ah fer tǝ za Israel faara: Makẽe ye na joŋ ɓii na soɓ za Israel kal ka na lwaa za joŋ yeɓ kao ko ne? 6Farao ɓaŋ muŋta sal saa nyi pǝr ahe, woo za sal ah ge ne ra, 7woo muŋta sal maswah ah temere yea, so tai muŋta sal sǝr Egiɓ daŋ, za sal yeera tǝl ah daŋ ta. 8Dǝɓlii yer zahzyil Farao goŋ Egiɓ, so Farao foo mor za Israel mai mo pǝ̃ǝra ɓo ne swah Dǝɓlii. 9Egiɓien foora mor ɓǝǝ ne pǝr ne muŋta sal Farao ne za ma yee tǝl ah tǝkine za sal ah daŋ, ge daira mor ɓǝǝ lwaa ra ɗǝr ɓo kah mabii Syẽ gwari ne Pi-Hahirot jaŋjaŋ ne Ba'al-Zefon. 10Farao ge gwari ne ra, za Israel woora nahnǝn kwora Egiɓien tǝ ginra fahfal ɓǝǝra, za Israel ɗuura gal pǝlli, so yera yee wo Dǝɓlii. 11Faara nyi Mosus: Wala pal kǝka sǝr Egiɓ ya, ko mo woo ru ge ka wuk kǝsyicok ko ne? Makẽe ye mo joŋ ɓo wo ɓuu mo pǝ̃ǝ ne ru gin sǝr Egiɓ ko ne? 12Ru faa nyi mo Egiɓ ɓaa ya ne? Ru faa: Mo soɓ ru joŋ byak nyi Egiɓien, pǝram joŋ byak nyi Egiɓien kal tǝ mai ru ga wuk kǝsyicok ɓe. 13Mosus zyii zah ɓǝǝ faa: Zana, we ɗuu gal ka, we uu mbaŋ o, we ẽe ǝ̃ǝ mai Dǝɓlii mo 'yah ǝ̃ǝ we tǝ'nahko, mor Egiɓien mai we tǝ kwan ra tǝ'nahko, we ka ga kwo ra yao ŋhaa ga lii. 14Dǝɓlii ye ga ruu sal mor ɓiiri, we kaa 'wa 'wa.
15Dǝɓlii faa nyi Mosus: Mo yeyee wo ɓe mor fẽene? Mo faa nyi za Israel mo kalra pelle. 16Amo, mo ɓaŋ kǝndaŋ ɓo, mo ɓoo jol ɓo tǝ mabii mo ŋgǝ̃ǝ kǝsyil gwa ka za Israel mo syeera kǝsyil mabii tǝ sǝr yakke. 17So me ga yer zahzyil Egiɓien ka mo foora mor ɓǝǝ ge gŋ, me ga cuu yǝk ɓe tǝ Farao ne za sal ah ne muŋta sal tǝkine za yee ah daŋ. 18Ne cok me cuu yǝk ɓe tǝ Farao ne muŋta sal tǝkine za ma yee tǝl ah ɓe, Egiɓien ga tǝra, ame ye Dǝɓlii.
19Angelos Masǝŋ mai moo syee pel za Israel ur ge uu fal ɓǝǝra, ɓaŋtal swãh laŋ ur gin pel ɓǝǝ ge uu fal ɓǝǝ ta. 20Swãh bam ge uu kǝsyil Egiɓien ne za Israel, swãh ah nǝkǝki ah pǝfuu nǝkǝki ah laŋ a sǝǝ cok ne suŋni. So ne cok suŋ moo daŋ Egiɓien ka gak ginra wo ki ne za Israel gwari ya. 21Mosus ɓoo jol ah ge tǝ mabii, Dǝɓlii yee zah bii ne zyak sǝŋ maswah mai mo kuu ne suŋ mooko, yak sǝr ah pǝyakke, bii ah ra woŋ kǝsyil gwa. 22Za Israel danra ge kǝsyil mabii mo woŋ ɓo gwa tǝ sǝr yakke, bii ah ra uu na ɓaale nǝjokǝsãh ɓǝǝ nǝjokǝlǝɓai ɓǝǝra.#1 Kor 10:1-2; Yahu 11:29 23Egiɓien foora mor ɓǝǝra, danra ge mor ɓǝǝ kǝsyil mabii ne pǝr Farao ne muŋta sal tǝkine za ma yeera tǝl ah daŋ. 24Ne cok zahmor'nan Dǝɓlii ẽe kul Egiɓien daga pǝzyil ɓaŋtal wii ma swãh bamme, joŋ tǝtǝl kiŋ ra. 25Ɓeɓ ɓal muŋta sal ɓǝǝra, so syeera pǝgaɓɓe. Egiɓien faara: Na ɗuu soɓ za Israel, mor Dǝɓlii tǝ ruu sal ne na mor ɓǝǝra.
26Dǝɓlii faa nyi Mosus: Mo ɓoo jol ɓo tǝ bii ka bii mo ge tǝ Egiɓien ne muŋta sal ɓǝǝ tǝkine za ma yeera tǝl ah daŋ. 27Mosus ɓoo jol ah tǝ mabii. So zah'nan mo ceeni, mabii soo ge pǝ cok ah na matãa. Egiɓien ɗuura, so bii zyaŋ ne ra, Dǝɓlii myah ra ge kǝsyil mabii. 28Bii ge sǝ̃ǝ muŋta sal ne za ma yeera tǝl ah tǝkine sooje Farao mai mo danra ge pǝ mabii fahfal za Israel daŋ, koo dǝɓ vaŋno ǝ̃ǝ ya. 29Amma za Israel syeera kǝsyil mabii tǝ sǝr yakke, bii ah ra uu na ɓaale nǝjokǝsãh ɓǝǝ nǝjokǝlǝɓai ɓǝǝra.
30Com ah Dǝɓlii ǝ̃ǝ za Israel jol Egiɓien naiko, Israel kwora wul Egiɓien ɓaa ɓo kah gee mabii. 31Israel kwo yeɓ malii mai Dǝɓlii mo joŋ wo Egiɓien. So ɗuura Dǝɓlii, nyiŋra ko tǝkine dǝɓ yeɓ ah Mosus.
Currently Selected:
PƏ̃Ə ZA ISRAEL 14: MUAR
Highlight
Share
Compare
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
