PƏ̃Ə ZA ISRAEL 13

Ɓǝ lai tǝ welii dǝfuu ne mǝ faɓalle

1Dǝɓlii faa nyi Mosus: 2Mo nyiŋ welii fan daŋ jol za Israel nyi me, welii dǝfuu tǝkine mǝ faɓal daŋ, ma ɓe yo.#KeeZ 3:13; Lu 2:23

Fĩi paŋgasso ma bai fan mbǝ̃ǝre

3Mosus faa nyi zana: We foo ɓǝ zah'nan mai we pǝ̃ǝ gin sǝr Egiɓ pǝ cok byak ɓii ne ko, mor Dǝɓlii pǝ̃ǝ ne we gin gŋ ne swah ahe. We re farel mambǝ̃ǝ ne ka. 4Tǝ'nahko we tǝ pǝ̃ǝ gin sǝr Egiɓ ne fĩi Abiɓ. 5Dǝɓlii haa zah nyi pa ɓii lii ra faa: Me ga nyi sǝr Kanaanien, Hetien, Amorien, Hevien, ne Jebusien nyi we. Sǝr ah a pǝsãhe, a joŋ fan pǝlli. Ne cok ah Dǝɓlii mo dai ne we gŋ ɓe, ka we joŋ fĩi mai pǝ fĩi patǝ vaŋno ah pǝ syii vaŋno vaŋno daŋ. 6Tǝgǝǝ zah'nan rǝŋ we re farel bai fan mbǝ̃ǝre. Ne zah'nan tǝ rǝŋ ah we joŋ fĩi ne wo Dǝɓlii. 7Tǝgǝǝ zah'nan tǝ rǝŋ we re farel bai fan mbǝ̃ǝre. Tǝgǝǝ zah'nan ah ra farel ma ne fan mbǝ̃ǝ mo joŋ yaŋ ɓii ka, so fan mbǝ̃ǝ laŋ mo yea ka ta. 8Com ah we ge faa ɓǝ fan mai Dǝɓlii mo joŋ mor ɓii ne cok mai we pǝ̃ǝ gin sǝr Egiɓ nyi wee ɓiiri. 9Ɓǝ ah ga joŋ we foo ɓǝ zah'nan mai Dǝɓlii mo pǝ̃ǝ ne we gin sǝr Egiɓ ne swah ah ga lii ga lii. A ga yea wo ɓii tǝgbana fan mai dǝɓ moo saa ga jol wala zahpel ka foo ɓǝ. A ga joŋ wee fee ɓǝ lai Dǝɓlii ga pelle, ka we kee ne tǝtǝl ta. 10We gbǝ ɓǝ lai mai ne zah'nan ah syii daŋ.

Ɓǝ welii fanne

11Ne cok Dǝɓlii mo dai sǝr Kanaan ne we, tǝgbana mo faako nyi pa ɓii lii ra ka nyi we ɓe, 12we nyi zah fan mǝ Dǝɓlii nyi nyi ne fan ma byaŋ kǝpel daŋ, welii ŋgaɓ fan mawǝǝ mai mo bem ɓo daŋ, mǝ Dǝɓlii yo.#Pǝ̃ǝ 34:19-20; Lu 2:23 13We wǝǝ tǝ welii korro daŋ ne gwii, we zyii ka wǝǝ tǝl ah ya ɓe, ka we hao sol ahe. We wǝǝ tǝ welii dǝfuu mawǝǝ kǝsyil ɓii ta. 14Comki wee ɓii mo fii we, ɓǝ mai cuu fẽene ɓe, we faa nyi ra: Dǝɓlii wǝǝ ru ne swah gin sǝr Egiɓ pǝ cok mai ru yea gŋ na byakke. 15Ne cok Farao mo pee mbaŋ mo zyii ka soɓ ru kal a, Dǝɓlii ik welii sǝr Egiɓ daga welii dǝfuu tǝkine welii faɓal daŋ. Mor maiko ru joŋ syiŋ wo Dǝɓlii ne fan mawǝǝ ma byaŋ kǝpel daŋ, amma ru wǝǝ tǝtǝl welii ɓuu ne fanne. 16Ɓǝ ah ga yea wo man tǝgbana fan mai naa saa ga jol wala zahpelle, a ga yea wo man na fan ma cuu fanne, ka na foo ɓǝ Dǝɓlii mai mo pǝ̃ǝ gin sǝr Egiɓ ne na ne swah ahe.

Ɓaŋtal swãh bam ne mǝ wii

17Ne cok Farao mo soɓ za Israel kalle, Dǝɓlii zaŋ ra ka mo syeera tǝ fahlii sǝr Filistien mai mo gwari laŋ ya#13:17 Mor fahlii: ah sooje Filistien gŋ.. Mor Masǝŋ faa: Ɗah maki za nyẽe mo kwora za sal ɓe, a ɗiira marvǝǝ so jinra ga sǝr Egiɓ ne? 18Amma Masǝŋ kiŋ ne ra tǝ fahlii kǝsyicok fah zah mabii Syẽ. Za Israel zyeɓra suu sal pǝ̃ǝra gin sǝr Egiɓ ne ko. 19Mosus woo woiŋ Yuseɓ kal ne ko, mor Yuseɓ haa zah ɓo nyi za Israel ne faa sye: Masǝŋ mo ge wǝǝ we ɓe, we woo woiŋ ɓe gin nyee kal ne ko.#Tǝŋ 50:25; Jos 24:32

20Urra gin Sukot ge ɗǝrra Etam nǝfah kǝsyicokki. 21Dǝɓlii kal pel ɓǝǝ ne ɓaŋtal swãh bam ne com mor ka zaŋ ra tǝ fahlii, so ne suŋ ɓe a syee pel ɓǝǝ ne ɓaŋtal wii mor ka sǝǝ cokfãi nyi ra, ka mo gak syeera ne suŋ ne com daŋ. 22Ne comme, ɓaŋtal swãh bam ka woŋ ki ne ra ya, ne suŋ laŋ, ɓaŋtal wii yea pel ɓǝǝra.

Currently Selected:

PƏ̃Ə ZA ISRAEL 13: MUAR

Highlight

Compare

Copy