ESTAR 2
2
Estar ciŋ magoŋe
1Fahfal ah ne cok kpãh goŋ mo wuuni, goŋ so foo ɓǝ fan mai Vasti mo joŋni, tǝkine ɓǝ lai mai goŋ mo kan ɓo tǝ ɓǝ ahe. 2Za ki kǝsyil za ma gbahra jol goŋ ne ɓǝ, mai moo yeara ma wo goŋ gwari, foora ɓǝ faa: Goŋe, mor fẽe mo faa ka za mo kyeɓra woi masãh ah nyi mo ya ne? 3Mo nǝǝ za ki pǝ sǝr goŋ ɓo ra camcam daŋ, ka mo kyeɓra woi masãh ah ra, ka mo gera yaŋ Suusa nyẽe ne ko, ka mo ge soɓra ra nyi nyi Hegai syẽe ma lwaa ɓǝ ŋwǝǝ goŋe, ka mo byak ra pǝsãhe. 4So ka mo ẽe woi mai zahzyil ɓo mo 'yah ko pǝlli, mo ɓaŋ kan magoŋ ne pǝ cok Vasti. Goŋ kwo, gbah jol mai ɓǝ ah a pǝsãhe, so joŋ na mai mo faara nyi ko.
5Yahuduyo ki no, kaa ɓo yaŋ Suusa, a ɗii dǝɓ ah ne Mordekai we Jair, we Syimai, we Kis, daga morsǝ̃ǝ ban Benyaamin. 6Ne cok Nebukanezar goŋ sǝr Babilon mo gbǝ Jojakin goŋ sǝr Yuda yaŋ Jerusalem kal ne ko, kǝsyil za mai mo gbahra ra ɓo ne goŋ Jojakin, Mordekai no gŋ ta.#2 ZaG 24:10-16; 2 KeeƁ 36:10 7Mordekai ako ye nan Estar mai moo ɗiira ko ne Hadasa ta. Ne cok pam ne mam mo wukra, Mordekai ɓaŋ ko wol na mǝlaŋ ka syak ahe, Estar woi masãh ah yo, lee cok nǝn ɓo pǝsãh no cam.
8Ne cok goŋ mo so kan ɓǝ lai mafuu ah za daŋ mo laara, taira wee ŋwǝǝ pǝlli ge yaŋ Suusa. Gera gŋ ne Estar ta. Ge soɓra ko yaŋ goŋ jol Hegai mai moo byak ŋwǝǝre, ka mo byak ko. 9Hegai a 'yah Estar pǝlli, Estar lwaa ɓǝ 'nyah pel ahe. Hǝǝ ne nyi fan mai ka Estar mo zyeɓ suu ah ne ka yea pǝsãh tǝkine farel daŋ nyi ko. So nyi cok masãh lii ah nyi ko pǝ yaŋ ŋwǝǝre, nyi wee maŋwǝǝ rǝŋ mai mo syenra ra ɓo yaŋ goŋ nyi ko, ka mo joŋra yeɓ nyi. 10Amma Estar muŋ ɓǝ ban ah mbaŋ, zyii ka cuu suu ah zye ye Yahuduyo ya, mor Mordekai faa nyi ka mo cuuko ka. 11Ne zah'nan Masǝŋ daŋ Mordekai a gin kyãh zah yaŋ pǝ cok mai Estar mo gŋ, mor ka laa ɓǝ ah ɗah joŋ ɓo ɗǝne?
12Cok mai ɓǝ lai ah mo kanra ɓo ka ŋwǝǝ mo zyeɓra suu ɓǝǝ ne ko, a syii vaŋno, fĩi yea a tahra nǝm murra#2:12 Murra: Mo ẽe glossaire. (Kǝka gŋ ya, ko ɗǝne?), so fĩi yea a tahra ɓǝrdi ma fuŋ 'nyahre, tǝkine zyeɓ suu ne zah fagai camcam. Fahfal ah gur wee maŋwǝǝ daŋ a gara wo goŋ Ahasverus ne patǝtǝlli. 13Ne cok woi mo ur gin yaŋ ŋwǝǝ ka ga yaŋ goŋ ɓe, a gak saa zah fan mai zahzyil ah mo 'yahe. 14A ga gŋ ne lilli, ne zah'nan ɓe, a ga yaŋ ŋwǝǝ patǝ gwa ah jol Saasgas syẽe ma byak mǝǝ byak goŋe, ka so ga wo goŋ faɗa yao, sai ka goŋ 'yah ko ɓo pǝlli, ko a ɗii ko.
15Cok mǝ Estar ka ga wo goŋ ge dai. Estar mǝlaŋ Abihail nan Mordekai yo, Mordekai ɓaŋ ko wol na mǝlaŋ ka syak ahe. Koo zune mo kwo Estar daŋ, ɓǝ ah a 'nyah suu ahe. Ne cok mai cok mǝ ah mo ge daini, ɓaŋ fan ki ya, sai fan mai Hegai syẽe ma byak ŋwǝǝ mo cuu nyi ka ɓoo to. 16Zaŋra Estar ge yaŋ goŋ Ahasverus ne ko, ne fĩi patǝ jemma ma ɗii ne Tebet, ne syii rǝŋ ah mo kaa goŋ ɓo. 17Goŋ 'yah Estar kal wee maŋwǝǝ maki ah ra daŋ, joŋ gboŋgboŋ tǝkine ɓǝ 'nyah wol ah kal wee maŋwǝǝ manyeeki ah ra daŋ. Goŋ maa bǝlam nyi, ɓaŋ ko kan magoŋ ne pǝ cok Vasti. 18So goŋ joŋ fĩi malii ah mor ka yii Estar, ɗii zaluu ah ra ne za yeɓ ah ra daŋ. Com ah za sǝr goŋ ah daŋ 'yakra ne ko, joŋ goŋ wo za pǝlli ta.
Mordekai ǝ̃ǝ goŋe
19Ne cok mo taira wee maŋwǝǝ faɗa, ka Mordekai tǝ joŋ yeɓ yaŋ goŋe. 20Estar zyii ka cuu suu ah azye ye Yahuduyo ya. Mor Mordekai faa nyi ka mo cuuko ka. Estar laa zah ah tǝgbana mai mo yea tǝ laa zah ah ne cok ka a pǝlaŋ ba.
21Com maki ah Mordekai tǝ joŋ yeɓ yaŋ goŋe, Bigtan ne Teres, ara ye syẽe ma byak zahfah yaŋ goŋe, ɓaŋra kpãh tǝtǝl goŋ Ahasverus, kyeɓra ka in ko pǝ wulli. 22Mordekai laa ɓǝ ahe, so faa ɓǝ ah nyi magoŋ Estar, so Estar laŋ faa ɓǝ ah nyi goŋ ne tǝɗii Mordekai. 23Kyeɓra mor ɓǝ ahe, so lwaara ɓǝ ah goŋga yo. So raora za tǝ gwa rai ge tǝ kpuu sǝŋ. Goŋ faa, ka mo ŋwǝǝra ɓǝ ah ge pǝ ɗerewol ma ŋwǝǝ ɓǝ sǝr goŋ ahe.
Bible Moundang © Alliance Biblique du Tchad, 1996.