ESTAR 1
1
Magoŋ Vasti cuu swãa goŋ Ahasverus
1-2Ahasverus kaa goŋ sǝr Persia pǝ yaŋ malii ma ɗii ne Suusa, kaa goŋ tǝ sǝr camcam 127, tǝŋ daga sǝr India ŋhaa ge dai sǝr Etiopia.#Ezr 4:6
3Ne syii sai ah mo kaa goŋ ɓo, joŋ fĩi malii mor zaluu sǝr ah ne za yeɓ ahe. Ɗii zaluu sooje sǝr Persia ne Media daŋ gŋ, ne govener sǝr ah ra camcam, tǝkine za mayǝk ah ra daŋ. 4Goŋ cuu kǝ̃ǝ ah ne yǝk goŋ ah mo ne nyi ra fĩi yea.
5Fahfal ah goŋ so joŋ fĩi maki ah mor za mai mo kaara ɓo yaŋ Suusa, mor za makǝ̃ǝ ah ra, ne za masyak daŋ. Joŋra fĩi ah zah'nan rǝŋ pǝ cok matǝ gbai ah mai mo pǝ 'wah zahpiicel goŋe. 6Pǝ zahpiicel ah zyim mafãi ah ne makǝrãhmo no gŋ. Saara zyim ah ra ɓo ne suu mafãi masãh ah ge ɓo wo tǝgaa ma vãm solai mai mo tǝtǝl wǝǝdǝǝ tǝsal marbre ah ra. Ɗee mai mo zyeɓ ɓo ne vãm kaŋnyeeri ne vãm solai, kan ɓo tǝ sǝr zahpiicel ah mai mo zyeɓ ɓo ne tǝsal marbre mafãi ne masyẽ, ne magbǝ̃ǝ, tǝkine mafuu tǝ sinik sinik. 7Zwahra fan pǝ tahsah ma vãm kaŋnyeeri, tahsah ah ra zahban ah camcam pǝlli. Goŋ nyi fazwan nyi za pǝlli. 8Fazwan ah ra ka ne zahsyee ya, goŋ faa nyi za mai mo tǝ joŋra yeɓ yaŋ goŋe, koo zune daŋ mo lwaako fazwan zwǝ pǝ'man tǝgbana mai zahzyil ah mo 'yahe.
9So ɓǝr yaŋ goŋ laŋ magoŋ Vasti joŋ fĩi mor ŋwǝǝ ta.
10Pǝ zah'nan rǝŋ ah mo tǝ joŋra fĩi, goŋ zwǝ fazwanne, zahzyil ah laa pǝ'nyahre, so ɗii syẽe matǝ rǝŋ mai moo joŋra yeɓ yaŋ ahe: Mehuman, Bista, Harbona, Bigta, Abagta, Zetar, ne Karkas, 11faa nyi ra ka mo ge zaŋra magoŋ Vasti ge pel ah ne ko, mo maako bǝlam ge ne ko. Magoŋ Vasti a pǝsãh no cam, goŋ 'yah ka cuu sãh ah nyi zaluu ah ra ne za daŋ. 12Amma ne cok za matǝ rǝŋ mo ge faara ɓǝ mai goŋ mo faa ɓo nyi magoŋ Vasti, zyii ka gan a. Mor ah zahzyil sye goŋ ɓaŋ kpãh pǝlli. 13So tǝgbana zah fan joŋ mai goŋ moo joŋni, moo fii ɓǝ foo za tǝ ɓǝ lai ne fahlii joŋ ahe, ɗii za ma gbahra jol ah mai mo tǝra fahlii fan mai ka dǝɓ mo joŋ ɓo. 14Za ma gbah jol ah mai moo yeara ma ne goŋ gwari a naiko: Karsena, Setar, Admata, Tarsis, Meres, Marsena, ne Memukan. Ara ye zaluu matǝ rǝŋ mo pǝ sǝr Persia ne Media, mai ara ye mo za ma pǝ cok ul ma pel ah pǝ sǝr goŋe, so goŋ moo laa ɓǝ faa ɓǝǝra. 15So faa nyi ra: Ame goŋ Ahasverus, me pee za yeɓ ɓe ra ge wo magoŋ Vasti ka mo geko pel ɓe, amma zyii ka laa ɓǝ ah ya. Ko ɓǝ lai faa ɓo ka na joŋ ne ki ɗǝne?
16Memukan faa pel goŋ ne pel zaluu ah ra daŋ, faa: Magoŋ Vasti cuu swãa goŋ ɓo ka syak ah to ya, amma cuu swãa zaluu ah ra ɓo ta, tǝkine za mai mo pǝ sǝr goŋ ne lii ah daŋ. 17Mor pǝ sǝr goŋ daŋ, ŋwǝǝ mo kal laara ɓǝ fan mai magoŋ Vasti mo joŋ ɓe, a ga syẽara wǝǝ ɓǝǝra, a ga faara: Goŋ Ahasverus ɗii magoŋ Vasti ka mo geko wol ahe, so Vasti zyii ya. 18Ŋwǝǝ za maluu mai mo pǝ sǝr Persia ne Media daŋ, mo laara ɓǝ fan mai magoŋ mo joŋ ɓe, a ga faara nyi zaluu pel goŋ ra comki nai ta. Ko ka 'naanǝn tǝkine ɓǝ maɓea ah daŋ, ka ga i zah ya. 19Goŋ mo zyii ɓe, mo kan ɓǝ lai faa, magoŋ Vasti ka fǝ̃ǝ ge pel goŋ faɗa yao. So ka ɓǝ ah mo ŋwǝǝ ge pǝ ɗerewol, ɓǝ lai sǝr Persia ne Media, ka ɓǝ ah mo fer ka. So ka goŋ mo nyi cok magoŋ ah nyi mawin maki ah mai mo kal ko ɓe. 20Ne cok goŋ mo lai ɓǝ ah pǝ sǝr goŋ ah ne lii ah daŋ ɓe, madǝwin daŋ, koo wor ah mo pǝkǝ̃ǝre, wala mo pǝsyakke, a ga kee ko.
21Ɓǝ ah 'nyah suu goŋ ne zaluu ah ra daŋ, so goŋ joŋ na ɓǝ mai Memukan mo faa. 22Goŋ pee leetǝr pǝ cok goŋ ah ra camcam daŋ ne fahlii fan ŋwǝǝ ɓǝǝ moo ŋwǝǝra tǝkine zah za sǝr ah moo faara pǝ cok ɓǝǝra. Faa pǝ leetǝr ah ra, dǝwor daŋ ako ye dǝɓlii ɓǝr yaŋ ahe, ako ye pa ma ŋgoŋ pǝrat ɓǝ#1:22 Ako ye pa ma ŋgoŋ pǝrat ɓǝ: Bibel camcam woŋra ki ɓo tǝ ɓǝ maino..
Bible Moundang © Alliance Biblique du Tchad, 1996.