DANIEL 8
8
Daniel kwo kǝbǝr ne kǝdai
1Ne syii patǝ sai ah Belsazar mo kaa goŋ ɓo, me kwo fakwan patǝ gwa ahe. 2Pǝ fakwan me kwo, ne pel nai sǝ, me lwaa suu ɓe yaŋ malii ma ɗii ne Susa, pǝ sǝr Elam. Ame uu ɓo kah el Ulai. 3Me ɓaŋ nahnǝn me ẽe cokki, me kwo kǝbǝr uu ɓo kah el ahe. Kǝbǝr ah ne ciŋ pǝwah gwa, amma ciŋ ma ciŋ tǝ fal a pǝwah kal maki ɓe. 4Me kwo kǝbǝr ah tǝ ɗah tǝnyee ga nǝfah kǝmorcomlilli, nǝfah kǝsǝŋ, tǝkine morkǝsǝŋ. Nǝǝ maki ah mai moo gak uu pel ah wala ka ɗuu ǝ̃ǝ ko kǝka, a joŋ fan tǝgbana mai zahzyil ah mo 'yahe, a yii suu ah pǝ'manne.
5Ne cok me tǝ ẽe ka me tǝ mor ahe, me kwo kǝdai#8:5 Kǝdai: mai a cuu: Aleksander goŋ sǝr Grek. ɗuu gin fah morcomlil ge, a ɗuu pǝlli, ŋhaa ɓal ah ka juu sǝr a jol ɗul ahe. Kǝdai ah a no ne ciŋ magaɓ ah zahpel ah vaŋno. 6Ge dai wo kǝbǝr mai me kwo uu ɓo kah el kŋ, so ur ne ki ne swahe. 7Me kwo ko tǝ ɗah ki ne kǝbǝrri, joŋ ki ne ki ne swahe, so hah ciŋ kǝbǝr ah gwa daŋ. Kǝbǝr gak ka uu ne ki ya. Kǝdai ɓaŋ kǝbǝr ɓoo ge sǝŋ, so dah ko ge gŋ ne ɓalle, koo dǝɓ vaŋno ma gak nyiŋ kǝbǝr ah mor jol ah kǝka.
8Kǝdai ah so yii suu ah ge pelle. Amma ne cok mo lwaa swah ge pel pǝlli, ciŋ ah mawah so haoni, so ciŋ ki camcam nai ciŋ pǝ cok ahe, ciŋ ah ra giŋ ɓaa tǝtǝl camcam kal ge laa sǝr nai daŋ. 9So ciŋ malaŋ ah ciŋ kah ciŋ maki ah kǝsyil matǝ nai kŋ, so giŋ kal ge fah morkǝsǝŋ, ne fah morcomzah'nanne, ne fah kǝ pǝ sǝr Gbanzahe. 10Ciŋ ah giŋ ge pel pǝswahe, ŋhaa ruu sal ne za sal ma coksǝŋ, tǝgba faa: ŋwǝǝmǝŋgai, gbah manyeeki ah ɓaa ge tǝ sǝrri, so dah ra ge gŋ ne ɓalle.#Caŋ 12:4 11Ciŋ ah syẽa Dǝɓlii za sal ma coksǝŋ ta, cak ɓǝ joŋ syiŋ mai moo joŋra wol ah zah'nan Masǝŋ daŋ, ii yaŋ Masǝŋ ne 'nahmme. 12Ciŋ ah cak ɓǝ iŋ matǝ goŋga ahe, fan mai mo joŋko daŋ, vǝr ne jam.
13So me laa angelos maki fii angelos maki ah faa: Fan mai mo kwora kŋ a ga joŋ nekẽne? Ɓǝɓe' maɓe' lii ah a ga joŋ pǝ cok joŋ syiŋ mai moo joŋra zah'nan daŋ nekẽne? A ga dahra za sal ma coksǝŋ, ne yaŋ Masǝŋ daŋ ne ɓal nekẽne?
14Me laa pa angelos maki ah zyii faa: A ga joŋ zah'nan 1.150: Ne cok ah syiŋ ma joŋ ne lil ne zah'nan daŋ ka ga joŋ ya. Fahfal ah yaŋ Masǝŋ ga zyeɓ pǝsãhe.
Angelos Gabriel kee mor ɓǝ fakwan ahe
15Ame Daniel, me 'yah ka me tǝ mor ɓǝ fakwan ahe, ne pel gwari sǝ, dǝɓ ki ge uu kah ɓe. 16So me laa kyaŋ dǝɓ faa ɓǝ daga kah el Ulai ge faa: Gabriel, mo kee mor ɓǝ fakwan mai mo kwoko nyi ko.#Lu 1:19,26 17Gabriel syee ge uu kah ɓe, so gal ah re me pǝlli, ŋhaa me lee ge sǝŋ. So faa nyi me: We dǝfuu, mo laa mor ɓǝ fan mai mo kwo kŋ o. Ɓǝ fakwan ah tǝ ga joŋ ne zah'nan vǝr sǝrri.
18Ne cok mo tǝ faa ɓǝ nyi me naiko, me lee ge sǝŋ ɓat, me tǝ suu ɓe ya. Amma so nyen jol gbǝ me ne ɓaŋ me ur uu sǝŋ. 19So faa: Me ga cuu kpãh mai Masǝŋ mo ɓaŋ ɓo, in zah ah mo ga i nyi mo. Fan mai mo kwo, a cuu ɓǝ fan mai mo tǝ ga joŋ ne zah'nan vǝr sǝrri.
20Kǝbǝr mai mo kwo, mo ne ciŋ gwa, a cuu goŋ sǝr Media ne goŋ sǝr Persia. 21Kǝdai ah a cuu goŋ sǝr Grek, so ciŋ magaɓ ah mo zahpel ahe, a cuu goŋ ma kǝpel ahe. 22Ciŋ ma kǝpel kŋ mo haoni, so maki ah nai mo ciŋra pǝ cok ahe, a cuu goŋ camcam nai, mai za ɓǝǝ moo ga woŋra, so ka ga yeara pǝswah na goŋ ma kǝpel a.
23Ne cok zah'nan goŋ rai mo ge gwari ka vǝr ɓe, zah'nan ɓǝɓe' ɓǝǝ mo baa ɓe, goŋ maki ah ga urri, a pǝɓe' a ne tǝtǝl pǝyakke, a vǝrvǝr no cam. 24A ga syee ga pel pǝswahe, amma ka tǝ syee ga pel ne swah suu ah ya. A ga ɓeɓ fan pǝlli, so a ga yea ne pejii pǝ fan joŋ ah daŋ. A ga muŋ za sǝr maswah ah ra, a ga ɓeɓ za Masǝŋ ta. 25Mor a pǝ yella, a ga yea ne pejii tǝ fahlii fan joŋ tǝ vǝrvǝr ahe. A ga yii suu ahe, a ga muŋ za pǝlli ne yii suu ahe, a ga ŋwookyaŋ ne Goŋ malii ah laŋ ta, amma a ga muŋ, jol dǝfuu ye ka ga muŋ ko ya. 26Fakwan mai mo kwo tǝ ɓǝ joŋ syiŋ ma joŋ ne lil ne zah'nan daŋ, mo cuura mor ɓǝ ah nyi mo, goŋga yo. Amma mo ɗah kan ɓǝ ah pǝ zahzyil ɓo, mor ɓǝ ah a ga joŋ pel pǝɗǝkki.
27Ame Daniel, me joŋ pǝtǝtǝ̃ǝre, syem joŋ me zah'nan rǝŋ. Me so urri, me kal ge tǝ yeɓ ɓe mai goŋ mo ɓaŋ me kan ɓo gŋ tǝ joŋni. Amma ɓǝ fakwan ah gaɓ me pǝlli, mor me laa mor ɓǝ ah ya.
Bible Moundang © Alliance Biblique du Tchad, 1996.