DANIEL 7
7
Daniel kee ɓǝ fakwan ahe
(7:1–12:13)
Daniel kwo nǝǝ camcam nai
1Ne syii patǝ vaŋno ah Belsazar mo kaa goŋ sǝr Babilon ɓo, ame Daniel, me lolom ne suŋni, pǝ lom ɓe me kwo fanne, me so ŋwǝǝ ɓǝ lom ahe. 2Fan mai me kwo pǝ lom ɓe ne suŋ a naiko:
Zyak nǝǝ gin laa sǝr nai daŋ ge kuu tǝ mabii malii. 3Nǝǝ maluu nai pǝ̃ǝra gin pǝ mabii malii, nǝǝ ah ra daŋ jur ki ya, ara camcam.#Caŋ 13:1; 17:8 4Patǝ vaŋno ah jur ɓol ɓo, amma a ne yee tǝgbana yee vakke. Ne cok me tǝ ẽere, dǝɓ ki ge nǝǝ yee ah ge lalle, so ɓaŋ nǝǝ ah ge sǝŋ, soɓ uu ne ɓal tǝgbana mǝ dǝfuu, so nyira ɓǝ foo dǝfuu nyi nǝǝ ahe.#Caŋ 13:2
5Patǝ gwa nǝǝ ah jur swãhtǝkeekee ɓo, nǝǝ ah ur uu ne ɓal ma kǝfalle. Woiŋ gǝǝzyii sai no pǝ zah ah kǝsyil syel ahe. Dǝɓ ki faa ɓǝ nyi ko: Mo gyo, mo ge re nǝǝ pǝ'man tǝgbana mai mo 'yahe!
6Ne cok me tǝ ẽere, nǝǝ maki ah so ge, jur kpiŋ ɓo, amma a ne yee ciciifal nai, tǝgbana yee juu, so a ne tǝtǝl nai ta. A ne swah tǝ sǝr ne lii ah daŋ.
7Ne cok me tǝ ẽere, nǝǝ patǝ nai ah so ge, nǝǝ ah a pǝswahe, a pǝgaɓ no cam, a ren gal dǝɓɓi, nǝǝ ah ne syel ma ne vãmme, soŋ nǝǝ manyeeki ah ra ne ko, so dah ra ne ɓalle. Nǝǝ ah jur ki ne nǝǝ ma kǝpel ra ya, a ne ciŋ jemma.#Caŋ 12:3; 13:1 8Ne cok me tǝ ẽe ciŋ ah ra, me so kwo ciŋ malaŋ ah tǝ ciŋ kǝsyil ciŋ maki ah ra. Hah ciŋ ma kǝpel mo yea gŋ ge lal sai. Ciŋ ah a ne nahnǝn tǝgbana dǝfuu, a ne zah ka faa ɓǝ yii suu ne ta.#Caŋ 13:5-6
Daniel kwo dǝɓ mai mo ne cee daga ɓaaɓe
9Ame tǝ ẽe cokki, me kwo fakal rǝk ɓo. Dǝɓ mai mo ne cee daga ɓaaɓe, kaa tǝ fakal ah vaŋno, mbǝro ah pǝfãi na lok mbǝro, rĩi tǝtǝl ah ra tǝgbana suu ooluu masãh ahe, fakal goŋ ah a tǝgbana tǝrĩi wii, uu ɓo tǝtǝl ɓal ah mo gǝrlǝŋ gǝrlǝŋ ko.#Caŋ 20:4; 1:14 10Wii tǝgbana bii a pǝ̃ǝ pel ah ɗuu gin lalle. Za ujenere, ujenere tǝ yiira ko, so za million, million uura ɓo pel ahe. Za ma ŋgoŋra kiita tǝŋra ŋgoŋ ahe, ɗerewol gbǝrri.#Caŋ 5:11; 20:12
11Ne cok me tǝ ẽe cokki, me laa ciŋ malaŋ kŋ tǝŋ faa ɓǝ maɓea ah yii suu ne ko. So me kwo ira nǝǝ patǝ nai ah pǝ wulli, so ɓaŋra wul ah ɓoo ge pǝ mabǝlaowii mai moo syen fan nahmnahm. 12So swah nǝǝ manyeeki ah ra vǝr ta, amma ne daŋ laŋ nyira fahlii nyi ra ka mo yeara ne cee zah'nan nje.
13Ne cok fakwan ɓe me kwo ne suŋni, me kwo fan na dǝfuu, tǝɓ ge wo ɓe gwari, swãh bam ryaŋ ko ɓoo ɓo kǝsyilli, so syee kal ge wo dǝɓ mai mo ne cee daga ɓaaɓe, ge uu pel ahe.#Mt 24:30; 26:64; Mk 13:26; 14:62; Lu 21:27; Caŋ 1:7,13; 14:14 14So dǝɓ ah nyi swah ne yǝk ne goŋ nyi ko, ka za sǝr daŋ, zahban camcam, za ma faara zah camcam daŋ mo juura pel wol ahe. A ga yea ne swah ga lii ga lii, goŋ ah ka ga vǝr a syaŋsyaŋ.#Caŋ 11:15
Kee zah lomme
15Fan mai me kwo, ɓǝ ah gaɓ me no cam, re gal ɓe pǝlli. 16Ame kal ge wo dǝɓ mai mo uu ɓo gŋ, me fii ko ka mo keeko mor ɓǝ lom ah daŋ nyi me. So dǝɓ ah kee mor ah nyi me. 17Faa: Nǝǝ maluu matǝ nai, goŋ maluu camcam mo tǝ yah ur wo sǝr o. 18Amma za Masǝŋ mayǝk yee ga lwaara swah goŋ ga mor jolle, a ga kaara goŋ ah ga lii ga lii.#Caŋ 22:5
19So me 'yah ka me tǝ mor ɓǝ nǝǝ patǝ nai ahe, mai mo jur nǝǝ maki ah ra ya, amma nǝǝ ah a ren gal dǝɓɓi, a ne syel ma ne vãmme, fyãh ah ra ne vãm syẽ, a cur nǝǝ maki ah ra ne ko, so a dah ra ne ɓalle. 20Me so 'yah ka me tǝ mor ɓǝ ciŋ matǝ jemma mo tǝtǝl ahe, tǝkine mor ɓǝ ciŋ malaŋ mai mo ciŋ mo so hah ciŋ maki ah ra sai ge lalle. Ciŋ ah a ne nahnǝn ne zahe, faa ɓǝ yii suu ah ne ko, ɓǝ ciŋ ah re gal ɓe kal maki ah ra ɓe.
21Ne cok me tǝ ẽe cokki, me kwo ciŋ ah tǝ ruu sal ne za Masǝŋ, so kaa kacella tǝ ɓǝǝra.#Caŋ 13:7 22So dǝɓ mai mo no ne cee daga ɓaaɓe ge, zyii ɓǝ ge mor za Masǝŋ mayǝkki. Com mai ka mo lwaara swah ge mor jol ge ɓe.#Caŋ 20:4
23Dǝɓ ah kee zah lom ah nyi me faa: Nǝǝ patǝ nai ahe, a cuu goŋ patǝ nai ah mo tǝ yah ur wo sǝrri, goŋ ah ka ga yea na goŋ maki ah rai ya. A ga re sǝr ne lii ah daŋ, a ga dah ne ɓalle. 24Ciŋ matǝ jemma laŋ, goŋ camcam jemma mo tǝ yah ur wo sǝr o. So fahfal ah goŋ maki ah ga urri#7:24 Goŋ maki ah ga urri: A cuu goŋ Antiokus Epifanes. Mo ẽe Dan 8:23 ta., goŋ ah ka ga yea tǝki ne goŋ ma kǝpel ra ya. A ga jee goŋ matǝ sai ra kŋ.#Caŋ 17:12 25A ga faa ɓǝɓe' tǝ Masǝŋ mayǝkki, a ga cuu bone nyi za Masǝŋ, a ga kyeɓ ka fer ɓǝ lai ma syee mor ɓǝ iŋ ɓǝǝra, ne fahlii joŋ fĩi ɓǝǝ daŋ. Za Masǝŋ ga yeara mor jol ah syii sai ne raita.#Caŋ 12:14; 13:5-6 26So kiita ma coksǝŋ ga tǝŋ ŋgoŋni, a ga nǝǝra ko tǝ goŋ ah ga lalle, a ga muŋra ko tǝɗe'. 27Amma yǝk goŋ wo sǝr tǝkine swah ah daŋ, a ga nyira nyi za Masǝŋ mayǝkki. Goŋ ɓǝǝ ga yea ne swah ga lii ga lii, za goŋ sǝr daŋ ga laara zah ɓǝǝra.#Caŋ 20:4; 22:5
28Ɓǝ ah vǝr naiko. Ame Daniel, gal re me pǝlli, ŋhaa zahpel ɓe fer cam sǝ. Amma me kan ɓǝ mai daŋ pǝ zahzyil ɓe.
Bible Moundang © Alliance Biblique du Tchad, 1996.