2 SAMUEL 7
7
Natan faa ɓǝ nyi David
(1 KeeƁ 17:1-15)
1Ne cok goŋ David mo kaa ɓo yaŋ ahe, Dǝɓlii nyi 'yak nyi ko pel za syiŋ ah mai mo ryaŋra ko ɓo daŋ. 2Goŋ faa nyi profeto Natan: Mo ẽe ɗao, me kaa ɓo pǝ yaŋ ma gban ne kpuu bahre, so sunduku Masǝŋ kaa ɓo pǝ tal mbǝro! 3Natan zyii zah goŋ faa: Mo ge joŋ fan mai zahzyil ɓo mo tǝ foo daŋ, mor Dǝɓlii no ne mo.
4Amma ne suŋ ah Dǝɓlii ge wo Natan faa: 5Mo ge faa nyi dǝɓ yeɓ ɓe David: Dǝɓlii faa sye: Mo ye ga vuu yaŋ kal nyi me ka kaa gŋ ne? 6Mor daga ne cok mai me pǝ̃ǝ gin sǝr Egiɓ ne za Israel ŋhaa tǝ'nahko me kaa pǝ yaŋ ma vuu ne jol taa ya, amma me kyãh gwǝǝ ne kaa pǝ tal mbǝro. 7Ne cok mai me syee ne za Israel daŋ me faa ɓǝ nyi dǝɓ vaŋno kǝsyil ban Israel mai me rǝk ra na za kǝpii za ɓe Israel, mor fẽe we vuu yaŋ ma ne kpuu bah ah nyi me ya taa ɓe ne?
8Zǝzǝ̃ǝko mo ge faa nyi dǝɓ yeɓ ɓe David: Dǝɓlii ma ne swah daŋ faa sye: Me ɓaŋ mo gin mor gwii lalle, ka mo yea dǝɓlii tǝ za ɓe Israel, 9me no ne mo pǝ cok daŋ mo syee gŋ, me nĩi za syiŋ ɓo daŋ pel ɓo ɓe. Me ga joŋ tǝɗii ɓo pǝ'man tǝgbana mǝ zaluu wo sǝrri. 10Me ga nǝǝ cok maki ah kpee mor za ɓe Israel, me ga rǝk ra gŋ, a ga kaara pǝ cok ahe, ka ga laŋra yao. Za maɓea ah ka ga cuura syak nyi ra na ma kǝpel 11tǝgbana ma ne cok me rǝk za lakaali tǝ za ɓe Israel ao. Me ga nyi 'yak nyi mo ne wǝǝ mo jol za syiŋ ɓo daŋ. Ame Dǝɓlii me ye tǝ faa nyi mo, me ga joŋ morsǝ̃ǝ ɓo yea wo sǝrri. 12Ne cok mo wuu, mo ciira mo ge kah za ɓo ra ɓe, me ga ur morsǝ̃ǝ ɓo, we ɓǝr ɓo mai mo byaŋ ne suu ɓo fahfal ɓo, me ga joŋ goŋ ah pǝswahe.#Lǝŋ 89:3-4; 132:11; Yoh 7:42; Yeɓ 2:30 13Ako ye ga vuu yaŋ mor tǝɗii ɓe, me ga joŋ goŋ ah yea ga lii. 14Ame ye ga yea pamme, ako laŋ ye ga yea we ɓe. Ne cok mo joŋko ɓǝɓe' ɓe, me ga lai ko tǝgbana pah wel moo lai wel ahe.#Lǝŋ 89:27-28; 2 Kor 6:18; Yahu 1:5 15Amma me ka ga soɓ ko ɓoo tǝgbana me soɓ Saul me ɓaŋ mo kan goŋ ne pǝ cok ah ya. 16Morsǝ̃ǝ ɓo tǝkine goŋ ɓo a yea ga lii. Dǝɓ morsǝ̃ǝ ɓo ga kaa goŋ ga lii.#Lǝŋ 89:36-37
17Natan kee ɓǝ mai daŋ nyi David tǝkine ɓǝ fakwan ah daŋ.
David juupel joŋ osoko nyi Masǝŋ
(1 KeeƁ 17:16-27)
18So goŋ David dan ge kaa pel Dǝɓlii pǝ tal mbǝro juupel wol ah faa: Masǝŋ Dǝɓlii, ame ne yaŋ ɓe daŋ me kii nǝn pǝ koŋ mai ka mo joŋ fan mai wo ɓe nai ya. 19Masǝŋ Dǝɓlii, zǝzǝ̃ǝ mo so joŋ maki ah ɓe faɗa, amo so cuu ɓǝ morsǝ̃ǝ ɓe moo ga yea pel nyi me. Masǝŋ Dǝɓlii, mo cuu zahŋhǝǝtǝ̃ǝ ma pel mo tǝ gin nyi me ɓe, ame laŋ me ye dǝfuu. 20Me so gak faa ɗah nyi mo ɗǝne? Amo tǝ me ɓo belbelle. 21Ɓǝ ah 'yah ɓo ne ɓǝ foo zahzyil ɓo ye foo ɓo ka joŋ wo ɓe naiko, mo joŋ fan malii mai daŋ mor ka cuu nyi me dǝɓ yeɓ ɓo. 22Masǝŋ Dǝɓlii, amo pǝ'manne! Tǝgbana ru laa ne sok ɓuu daŋ dǝɓ ma na mo kǝka, Masǝŋ maki ah na mo kǝka ta. 23Zahban maki ah kǝka wo dunia na za Israel mai mo wǝǝ ra pǝ byak mo so joŋ ra ciŋ za ɓo ɓo ne ya. Fan malii matǝ gǝriŋ ah mai mo joŋ mor ɓǝǝra, ɓǝ ah joŋ tǝɗii ɓo myah ɓo wo sǝr ne lii ah daŋ. Amo wǝǝ za ɓo gin sǝr Egiɓ, mo nĩi zahban manyeeki ah tǝkine masǝŋ ɓǝǝ ra pel ɓǝǝra.#CuuƁ 4:34 24Amo joŋ za Israel ɓo na za ɓo ga lii, Dǝɓlii, amo laŋ mo ciŋ Masǝŋ ɓǝǝ ɓo o.
25Zǝzǝ̃ǝko Masǝŋ Dǝɓlii, mo baa ɓǝ mai mo faa ɓo tǝ ɓe ne wee ɓǝr ɓe ge cok ahe, cẽecẽe mo joŋ fan mai mo faa ɓǝ ah ɓo ka joŋni. 26Tǝɗii ɓo ga yea pǝyǝk ga lii ga lii. Za ga faara: Dǝɓlii ma ne swah daŋ ako ye Masǝŋ tǝ za Israel. Mo ga soɓ morsǝ̃ǝ ɓe kaa goŋ ga lii. 27Dǝɓlii ma ne swah daŋ, Masǝŋ Israel, ame lwaa swah zahzyil ka juupel mai wo ɓo, mor amo ye cuu ɓǝ marai daŋ ɓo nyi me dǝɓ yeɓ ɓo, mo faa mo ga joŋ morsǝ̃ǝ ɓe kaa goŋe.
28Zǝzǝ̃ǝko Masǝŋ Dǝɓlii, amo ye Masǝŋ, ɓǝ faa ɓo ra goŋga yo, mo so faa ɓǝ malii mai ɓo nyi me.
29Ame fii mo, mo ẽe morsǝ̃ǝ ɓe, ka mo laara pǝ'nyah pel ɓo cẽecẽe. Mor Masǝŋ Dǝblii amo ye faa ɓǝ ah ɓo, ẽe ɓo yea tǝ morsǝ̃ǝ ɓe ga lii ga lii.
Bible Moundang © Alliance Biblique du Tchad, 1996.