2 SAMUEL 6
6
David ge ɓaŋ sunduku gbanzah ge Jerusalem ne ko
(1 KeeƁ 13:1-14; 15:25–16:6,43)
1So David tai za Israel ma syen ah daŋ faɗa, ara ujenere jemma sai. 2David ur ne za mai mo ne ki daŋ kalra ge Baale ma sǝr Yuda mor ka ɓaŋ sunduku Masǝŋ mai mo ɗii ɓo ne tǝɗii Dǝɓlii ma ne swah daŋ mo kaa ɓo kǝsyil cerubim tǝ sunduku.#Pǝ̃ǝ 25:22 3Ɓaŋra sunduku Masǝŋ kan tǝ muŋta dǝǝ mafuu ahe. Ɓaŋra pǝ̃ǝ gin yaŋ Abinadaɓ mai mo tǝgee ne ko. Wee Abinadaɓ, Uzza ne Akiijo, syeera ne muŋta dǝǝ ahe.#1 Sa 7:1-2 4Uzza a syee kah sunduku Masǝŋ, Akiijo a syee mǝ ah pel ahe. 5David tǝkine za Israel daŋ a dǝra daa pel Dǝɓlii ne zah fan kyẽm camcam mai mo zyeɓra ɓo ne kpuu maswahe: tǝnjuŋ ɗaŋ, tǝnjuŋ zahrãani, yuŋni, tǝnjuŋŋi, tǝkine koŋkeere.
6Ne cok mo ge daira pǝ cok ɗuu sor Nakon, Uzza nyen jol ah gbǝ sunduku Dǝɓlii, mor dǝǝ soɓ ee ɓo nǝkahe. 7So Dǝɓlii ɓaŋ kpãh ne Uzza pǝ'manne, i ko pǝ cok ah mor faɓe' ah mo joŋko#6:7 Ɓǝ ah faɓe' yo, mor zyak ɓǝlai ɓo. Mo ẽe CuuƁ 10:8., wǝ kah sunduku Masǝŋ ŋhoo sǝ. 8David ɓaŋ kpãh tǝ ɓǝ mai Dǝɓlii mo i Uzza pǝ wulli. So a ɗiira cok ah ne Peres-Uzza ŋhaa tǝ'nahko.
9Ne cok ah David ɗuu gal Dǝɓlii faa: Sunduku Dǝɓlii gak ga ɗah yaŋ ɓe suu ɗǝne? 10David zyii ka ɓaŋ sunduku Dǝɓlii ga wol ah yaŋ ah mo kaa ɓo gŋ ne yao. Mor ah cak ne sunduku kal ge kan yaŋ Obed-Edom, Gatiyo. 11Sunduku Dǝɓlii nǝn yaŋ Obed-Edom fĩi sai. So Dǝɓlii ẽe Obed-Edom ne za yaŋ ah daŋ.#1 KeeƁ 26:4-5
12Ge faara nyi goŋ David: Dǝɓlii ẽe za yaŋ Obed-Edom tǝkine fan mai mo jol ah daŋ mor ɓǝ sunduku gbanzahe. So David ur kal ge ɓaŋ sunduku Dǝɓlii yaŋ Obed-Edom ne ɓǝ 'nyah ge yaŋ ah ne ko. 13Ne cok za mai mo tǝ ɓaŋra sunduku Dǝɓlii mo ɓaŋra ɓal ne syel yea, David ŋgoŋ ŋgǝǝri ne we dǝǝ matam maŋwoo ah joŋ syiŋ ne ko. 14A dǝdaa pel Dǝɓlii ne swah suu ah daŋ, ɓoo mbǝro ɗaŋsikki mai zyim ah mo kaŋ ɓo ne suukirtaani. 15David tǝkine za Israel daŋ ɓaŋra sunduku Dǝɓlii ne ɓǝ ŋwaa ma 'nyah suu tǝkine ul kokõorĩi.
16Ne cok sunduku Dǝɓlii mo tǝ dan gin yaŋ David, Mikal mǝlaŋ Saul ẽe cok zahtǝwoo, kwo goŋ David tǝ dǝdaa zwǝǝ ga sǝŋ ne ko pel Dǝɓlii, so syẽa ko pǝ zahzyil ahe. 17Danra ge yaŋ ne sunduku Dǝɓlii, ge kanra pǝ cok ah pǝ tal mbǝro mai David mo zyeɓ ɓo mor ahe. David tǝǝ syiŋ suŋwii tǝkine ŋgoŋ fan joŋ syiŋ ma nyi jam ne pel Dǝɓlii. 18Ne cok David mo vǝr tǝǝ syiŋ suŋwii ne joŋ syiŋ ma nyi jam ne ko, so ẽe za pǝ tǝɗii Dǝɓlii ma ne swah daŋ. 19So wom fan nyi za daŋ. Za Israel mawǝǝ ne maŋwǝǝ daŋ, zune daŋ lwaa zahtǝfah wol vaŋno vaŋno ne tǝkõm nǝǝ gŋ tǝkine tǝgǝr lee kpuu vin mayak ahe. Fahfal ah za myah o, zune daŋ kal ge fah yaŋ ahe.#1 KeeƁ 16:43
20David pii soo ge ka ẽe za yaŋ ahe. Mikal mǝlaŋ Saul pǝ̃ǝ ge ka zyaŋ tǝl ah faa: Yǝk fẽe ye mai goŋ Israel joŋ tǝ'nah ne cuu zahmorkol ah nǝn mǝǝ byak za yeɓ ah tǝgbana dǝɓ makol ah moo joŋ ko ne? 21Amma David zyii zah Mikal faa: Me dǝdaa ɓo pel Dǝɓlii mai mo nǝǝ me soɓ pa ɓo ne za yaŋ ah daŋ, ɓaŋ me kan goŋ ɓo tǝ Israel za Dǝɓlii ne ko. Me ga dǝdaa pel Dǝɓlii, 22me ga joŋ suu ɓe pǝlaŋ nǝn ɓo faɗa, amma wo mǝǝ byak mai mo tǝ faa ɓǝ ɓǝǝ me ga yea pǝyǝkki.
23Mikal mǝlaŋ Saul lwaa wel a syaŋsyaŋ, ŋhaa wǝ ne sõo.
Bible Moundang © Alliance Biblique du Tchad, 1996.