2 SAMUEL 23
23
Ɓǝ faa David ma fahfalle
1Mai ɓǝ faa David ma fahfal o.
Ɓǝ faa David we Isai,
Ɓǝ faa dǝɓ mayǝkki,
Dǝɓ mai Masǝŋ Yakuɓ mo syee nǝm tǝl ahe,
Pa gea lǝŋ 'nyah nyi Israel.
2Tǝ'yak Dǝɓlii faa ɓǝ nyi za ne zah ɓe,
Ɓǝ faa ah no tǝ tǝrĩi ɓe.
3Masǝŋ Israel faa ɓǝ,
Pa byak Israel faa nyi me:
Dǝɓ makẽne mo kaa goŋ tǝ za ne fahlii matǝ njaŋ, tǝkine ɗuu Masǝŋ ɓe,
4A tǝgbana cokfãi, zah'nan mai ka com tǝ zoo ginni,
Na zah'nan mai moo cee daŋdaŋ,
Swãh mo ka yea ya,
Tǝgbana com mai moo coo fahfal bam mo tǝ ɓe,
Moo so ciŋ fãa tǝ sǝrri.
5Oho, Masǝŋ ga ẽe morsǝ̃ǝ ɓe nai ta,
Mor gbǝ zah ma ga lii ɓo ne me,
Zyeɓ ɓo zyeɓɓe, ɓǝ ah ka fer a.
Ne cok daŋ a nyi swah nyi me ka kaa kacella,
A joŋ fan mai zahzyil ɓe moo 'yahe.
6Amma za faɓe' tǝgbana waa mai za moo ɓoo ma ga lal jol mo ka juu ya.
7Amma dǝɓ mo tǝ ga juu ɓe,
Sai ka dǝɓ ah ne vãm wala ne kpuu kǝ̃r zǝǝ jolle,
A ɓoora wii nyi pǝ cok ah sǝ.
Sooje David maswah ah ra
(1 KeeƁ 11:10-41)
8Tǝɗii za swah sal David a naiko: Yuseɓ-Basabet Hakmoniyo ako ye dǝɓlii za matǝ sai, ɓaŋ zǝǝ ah ik za ne pǝ wul zah sal ɓal vaŋno temere nama.
9Fahfal ah Eleasar we Dodo we dǝɓ Akoki, ako kǝsyil zaluu sal matǝ sai. A no ne David ne cok Filistien mo taira ka ruu sal ne za Israel, so za Israel mo ɗuura tǝgǝǝ waare. 10Amma mǝ ah uu mbaŋ, ik Filistien ŋhaa jol ah gaɓ ɓe, so mgbãa kafahe. Com moo Dǝɓlii joŋ yeɓ ǝ̃ǝ malii ahe, amma za pii soo ge lwaara Eleasar mor woo fan to o.
11Patǝ sai ɓǝǝ ye Sammi we Age Haroriyo. Filistien taira ge Leki. Pǝ cok ah 'wah ǝǝ no gŋ. Za Israel ɗuura pel Filistien. 12Amma Sammi uu kǝsyil 'wah ahe, pee gŋ mbaŋ ik Filistien. Dǝɓlii joŋ yeɓ ǝ̃ǝ malii ah naiko.
13Za sai kǝsyil zaluu matǝ jemma sai urra ne cok gwahl gera wo David pǝ yii Adullam, ka Filistien pǝ̃ǝra sal ge ɗǝrra ɓo pǝ cok tǝforoŋ Refaim. 14Ne cok ah ka David no pǝ yaŋ ma ne ɓaale, ka za ma byak cok Filistien laŋ no yaŋ Betlehem. 15David no ne fan 'yah pǝ zahzyil ahe, ge faa: Azu ye ga bee bii mai mo pǝ lak bii zahfah yaŋ Betlehem nyi me ka zwan ne? 16Za swah sal matǝ sai kŋ ŋgǝ̃ǝra kǝsyil zahjul sal Filistien ge beara bii mai mo pǝ lak bii zahfah yaŋ Betlehem ge nyira nyi David. Amma David zyii ka zwan a, ɓaŋ sǝǝ ge tǝ sǝr joŋ syiŋ ne pel Dǝɓlii. 17So faa: Dǝɓlii mo cak me ne joŋ fan maiko, me ga zwǝ syim za mai mo gera pǝ wul ne cee ɓǝǝ suu ɗǝne? Zyii zwan a mor ahe.
Za swah sal matǝ sai joŋra ɓǝ ah naiko.
18Abisai naa mah Joaɓ we Seruja ye dǝɓlii za matǝ jemma sai, swah ɓǝǝ ye ko. Ɓaŋ zǝǝ ik za ne temere sai pǝ wulli, so lwaa tǝɗii kǝsyil za matǝ jemma sai. 19A pǝyǝk kal za matǝ jemma sai manyeeki ah ɓe, ciŋ swah ɓǝǝra, amma ne daŋ laŋ ka zahki ne za ma kǝpel matǝ sai ya.
20Benaja we Jehojada we dǝɓ swah ma Kabzeel o, joŋ yeɓ maswah ah camcam, ik za swah sal Moaɓ gwa pǝ wulli. Ɗǝr ge ik ɓol pǝ lak bii gwa ne cok ah ka syaŋ tǝ ge ɓo sǝŋ. 21I dǝɓ sǝr Egiɓ pǝ wulli, dǝɓ ah pǝbǝ̃ǝre, a ne zǝǝ jolle, amma ne daŋ tǝ ge tǝl ah ne kǝndaŋne, so nyiŋ zǝǝ jol Egiɓiyo, i ko ne zǝǝ ah soo sǝŋ. 22Benaja we Jehojada joŋ naiko, lwaa tǝɗii kǝsyil za matǝ jemma sai. 23A pǝyǝk kal za matǝ jemma sai ɓe, amma dai za matǝ sai ma kǝpel a. David ɓaŋ ko kan dǝɓlii ne tǝ za mai moo byakra ko.
24Za matǝ jemma sai a naiko: Asayel naa mah Joaɓ, Elkanan we Dodo ma Betlehem, 25Samma ma Harod, Elika ma Harod, 26Helet ma Pelet, Ira we Ikkes ma Tekoa, 27Abiezar ma Anatot, Mebunai ma Huska, 28Zalmon ma Akoki, Maharai ma Netofa, 29Heleɓ we Baana ma Netofa, Ittai we Ribai ma Gibea mǝ Benyaamin, 30Benaja ma Piraton, Hiddai ma kah el Gaas, 31Abialbon ma Araba, Asmavet ma Bakurim, 32Eliaba ma Salbon, Jasen ne Yunatan, 33Sammot ma Harar, Akiam we Sakar ma Harar, 34Elifelet we Akasbai ma Maaka, Eliam we Akitofel ma Gilo, 35Hesro ma Karmel, Parai ma Araɓ, 36Igal we Natan ma Zoba, Bani Gatiyo, 37Zelek ma Ammon, Naharai ma Beerot (ako ye pa ɓaŋ paŋzǝǝ Joaɓ we Seruja), 38Ira ma Yeter, Gareɓ ma Yeter, 39Urias Hetiyo. Pãa ɓǝǝ daŋ joŋ jemma sai tǝtǝl rǝŋ.
Bible Moundang © Alliance Biblique du Tchad, 1996.