1 SAMUEL 3
3
Dǝɓlii ɗii Samuel
1We tǝbanna Samuel joŋ yeɓ Dǝɓlii ka a jol Eli. Ne cok ah ka Dǝɓlii ka tǝ faa ɓǝ nyi za pǝlli ya, fakwan laŋ ka pǝlli ya ta. 2Comki Eli swǝ ɓo ɓǝr yaŋ ka nahnǝn ah jok ɓe, ka gak kwan cok pǝsãh ya, 3ka Samuel laŋ swǝ ɓo ɓǝr yaŋ Dǝɓlii mai sunduku Masǝŋ mo gŋ. Ne cok ah ka pitǝrla Masǝŋ ɓah ka rum ya ba, 4Dǝɓlii ɗii Samuel. Samuel zyii: Awai. 5So ur ɗuu kal ge wo Eli, faa: Amo ye ɗii me, ame nyẽeno. Amma Eli zyii faa: Me ɗii mo ya, mo pii soo ge swǝ sǝŋ o. So kal ge swǝ sǝŋ.
6Dǝɓlii so ɗii Samuel faɗa. Samuel ur kal ge wo Eli faa: Amo ye ɗii me, ame nyẽeno. Amma Eli zyii faa: Me ɗii mo ya na ɓe, mo pii soo ge swǝ sǝŋ o. 7Ka Samuel ɓah tan Dǝɓlii ya ba, ka Dǝɓlii ɓah faa ɓǝ nyi ko taa ya ba.
8So Dǝɓlii ɗii Samuel patǝ sai ahe. Samuel ur kal ge wo Eli faa: Amo ye ɗii me, ame nyẽeno. So Eli tǝ gur o, Dǝɓlii ye tǝ ɗii we nyẽeko. 9Faa nyi Samuel: Mo ge swǝ sǝŋ o, mo ɗiiko mo kpǝ ɓe, ka mo zyii faa: Mo faa o Dǝɓlii, mor dǝɓ yeɓ ɓo tǝ laa no. Samuel kal ge swǝ sǝŋ pǝ cok swul ahe.
10Dǝɓlii ge uu ɗiɗii na ma kǝpel ra kŋ faɗa: Samuel, Samuel? Samuel zyii faa: Mo faa o Dǝɓlii, dǝɓ yeɓ ɓo tǝ laa no. 11So Dǝɓlii faa nyi Samuel: Mo ẽe ɗǝ, me ga joŋ ɓǝ vaŋno no kǝsyil za Israel. Koo zune mo ga laa daŋ, sok ah ra gwa daŋ ga gbǝ̃ǝ. 12Pǝ zah'nan mai me ga joŋ ɓǝ mai me faa ɓo tǝ yaŋ Eli daŋ. Me ga tǝŋ, me ga vǝr laŋ ta. 13Mor me faa nyi ko: Me ga ŋgoŋ kiita ma ga lii tǝ yaŋ ahe, mor tǝ ɓe, wee ah a 'mwãara Masǝŋ, so ka cak ra ya. 14Mor ah me haa zah tǝ yaŋ Eli, ɓǝɓe' yaŋ Eli ka gak rwah ne joŋ syiŋ koo ne nyi fan mor ah laŋ ya ŋhaa ga lii.
15Samuel ge swǝ sǝŋ ŋhaa zah'nan ceeni, so gbǝr zah yaŋ Dǝɓlii. Samuel ɗuu gal kee ɓǝ fakwan ah nyi Eli. 16Amma Eli ɗii Samuel faa: Samuel na ɓe. Samuel zyii: Awai. 17Eli so fii ko: Dǝɓlii faa ɓǝ fẽe nyi mo ne? Oseni mo muŋ me ne ka. Mo kal muŋ me ne ɓǝ mai mo faako nyi mo vaŋno ɓe, a ga joŋ ɓǝɓe' ah daŋ tǝ ɓo ŋhaa a kal tǝ ɓǝ mai mo faako laŋ ta. 18So Samuel kee ɓǝ ah daŋ nyi Eli, muŋ ko ne vaŋno ya. Eli zyii faa: Dǝɓlii ye ko, mo joŋko fan mai mo 'yahko.
19Samuel joŋ dǝɓlii, Dǝɓlii no ne ki, a joŋ ɓǝ mai Samuel mo faa daŋ ga cok ahe. 20Za Israel daŋ, tǝŋ daga Dan ŋhaa ge dai Beerseba, tǝra ɓe, Dǝɓlii kan profeto ɓo ne Samuel. 21Dǝɓlii tǝŋ cuu suu ah yaŋ Silo ge pelle, mor Dǝɓlii a cuu suu ah nyi Samuel ne ɓǝ faa ahe.
Bible Moundang © Alliance Biblique du Tchad, 1996.