1 SAMUEL 2
2
Lǝŋ Anna mo ɗǝǝ
1Anna juupel faa:
Zahzyil ɓe laa pǝ'nyah ne Dǝɓlii.
Dǝɓlii ɓaŋ tǝtǝl ɓe kan ge sǝŋ ɓe.
Me tǝ syak za syiŋ ɓe syak o.
Me tǝ laa pǝ'nyahre,
Mor Masǝŋ gbah jol ɓe ɓe.#Lu 1:46-55
2Dǝɓ matǝdaŋdaŋ na Dǝɓlii kǝka,
Mor dǝɓ ma na mo kǝka.
Dǝɓ ma byak dǝɓ na Masǝŋ man kǝka.
3We faa ɓǝ ma yii suu ne pǝlli ka.
We soɓ ɓǝɓe' pǝ̃ǝ zah ɓii ka.
Mor Dǝɓlii ye Masǝŋ ma tan fan daŋ,
Ako ye ga lii yeɓ daŋ ta.
4Hah saŋ za maswah ɓe,
So bam sãh nyi za matǝtǝ̃ǝ ah ne ganda swah ɓe.
5Za makǝ̃ǝ ah a joŋra yeɓ ne suu ɓǝǝ mor ka lwaa farelle,
Amma za ma ne koŋ tǝ 'yakra o.
So masoo bem wee zahlǝŋ rǝŋ,
Amma mawin mai mo ne wee pǝlli wee ah kǝkao#2:5 Wee ah kǝkao: wala, so ciŋ masoo ɓe..
6Dǝɓlii yee in dǝɓ pǝ wulli,
Ako yee soɓ dǝɓ ne cee.
Ako yee soɓ dǝɓ ga pǝ palle,
Ako yee so ɓaŋ dǝɓ gin lalle.
7Dǝɓlii yee joŋ dǝɓ pǝsyakke,
Ako yee joŋ dǝɓ pǝkǝ̃ǝ ta.
Ako yee tǝr dǝɓɓi,
Ako yee so yii dǝɓɓi.
8A ɓaŋ pa syak gin pǝ ɓǝmmi,
A ɓaŋ dǝɓ ma bai fan gin mor halle,
Mor sǝr ne lii ah daŋ mǝ Dǝɓlii yo.
Ako ye ɓaŋ ɓyak ɓo tǝ wǝǝ dǝǝ mai mo ka laŋ ya.
Masǝŋ ɓyak sǝr ɓo tǝ ɓǝǝra.
9Dǝɓlii tǝ ga byak ɓal za 'yah ahe,
Amma za faɓe' ga muŋra pǝ cokfuu.
Mor dǝɓ ka gak kaa kacella ne swah suu ah ya.
10Dǝɓlii ga muŋ za ma syiŋra ko,
A ga pee ɓyaŋ bam daga coksǝŋ ge tǝ ɓǝǝra.
Dǝɓlii ga ŋgoŋ kiita tǝ dunia daŋ,
A ga nyi swah nyi goŋ ahe,
A ga yii swah goŋ ahe.
11So Elkana kal fah yaŋ ah Rama. Amma wel ah kaa joŋ yeɓ Dǝɓlii ne pa joŋzahsyiŋ Eli.
Wee Eli
12Amma wee Eli wee ɓear o, ka ɗuura Dǝɓlii ya. 13Zah yeɓ joŋzahsyiŋ mai moo joŋra wo zan a naiko: koo zune mo tǝ joŋ syiŋ ɓe, dǝɓ yeɓ pa joŋzahsyiŋ a gin dai ne cok mai moo kǝǝra nǝǝ. A yea ma ne tǝlaŋ ma ne jol tǝ sai mor jol ahe. 14A cur nǝǝ ne pǝ tahsah wala cii nãa laŋne, pǝ tǝkpelle wala ciiri. Fan mai tǝlaŋ moo ɓaŋ pǝ̃ǝ gin lal ne daŋ, pa joŋzahsyiŋ ɓaŋ mor suu ahe. A joŋra wo za Israel ma ginra yaŋ Silo daŋ naiko. 15Koo kǝpel moo joŋra syiŋ suŋwii ne nǝm fanne, dǝɓ yeɓ pa joŋzahsyiŋ a gin faa nyi dǝɓ ma joŋ syiŋrĩ: Mo nyi nǝǝ tǝwaa ma ga cwah ah nyi pa joŋzahsyiŋrĩ, ka tǝ ga nyiŋ makǝǝ ah jol ɓo ya, sai masyikki. 16Dǝɓ ah mo faa nyi ko: Mo soɓ mo syakra nǝm ah ɗao ka mo ẽe zah mai zahzyil ɓo mo 'yah ba ɓe, a zyii faa: Ka noo ya, sai mo nyi me zǝzǝ̃ǝko, mo ka nai ya ɓe, ka me ga bǝǝ ne swahe. 17Faɓe' wee rai joŋ pel Dǝɓlii pǝ'manne, mor a 'mwãara ɓǝ syiŋ Dǝɓlii.
Samuel yaŋ Silo
18Ne cok ah ka Samuel pǝlaŋ ba, a joŋ yeɓ pel Dǝɓlii, a ɓoo ɗaŋsikki mai zyim ah mo kaŋ ɓo ne suukirtaani. 19Syii daŋ mah ah a cuŋ mbǝro laŋ nyi ko. A ɓaŋ gin nyi ne ko ne cok moo gin ne wor ah ka joŋ syiŋ ma joŋ syii daŋ. 20Eli a ẽe Elkana ne mawin ahe, a faa nyi Elkana: Dǝɓlii mo nyi wee maki ah nyi mo ne mawin nyẽe pǝ cok we mai mo ɓaŋ nyi ɓo nyi ko. So a kalra ga fah yaŋ ɓǝǝra.
21Dǝɓlii ge ẽe Anna, lwaa ɓilli, bem wee wǝǝ sai ne wee ŋwǝǝ gŋ gwa. Amma Samuel giŋ dǝɓlii pel Masǝŋ.
Eli ne wee ahe
22Eli tam pǝlli ɓe. A laa ɓǝ fan mai wee ah moo joŋra wo za Israel daŋ ne mai moo swahra ne ŋwǝǝ ma joŋra yeɓ zah tal mbǝro ma taini. 23A faa nyi ra: We joŋ fan marai nai mor fẽene? Mor me laa ɓǝɓea ɓii zah za daŋ. 24Ka nai ya wee ɓe, ɓǝ mai me tǝ laa tǝ ɓii ka pǝsãh ya, we tǝ zyak za jol Dǝɓlii. 25Dǝɓ mo joŋ faɓe' wo dǝɓ ki ɓe, Masǝŋ ga zyeɓ ɓǝ ah mor ahe. Amma dǝɓ mo joŋ faɓe' wo Dǝɓlii ɓe, azu ga zyeɓ ɓǝ ah mor ah ne? Amma ne daŋ laŋ zyii laara zah pa ɓǝǝr a, mor Dǝɓlii 'yah ka ik ra pǝ wulli.
26Samuel giŋ ge pelle, a joŋ fan sãh pel Dǝɓlii tǝkine wo za daŋ.#Lu 2:52
Comki dǝɓ Masǝŋ ge wo Eli
27Dǝɓ Masǝŋ ge wo Eli, faa nyi ko: Dǝɓlii faa sye: Me cuu suu ɓe nyi za yaŋ pa ɓo ne cok ara mo pǝ byak sǝr Egiɓ yaŋ Farao ya ne? 28Me nǝǝ ko kǝsyil ban Israel daŋ ka mo ciŋko pa joŋzahsyiŋ ɓe, mo ŋgoŋko fan pǝ cok joŋ syiŋ ɓe, ka mo tǝǝko ɓǝrdi, ka mo ɓooko ɗaŋsikki pel ɓe. Me nyi fan mai za Israel moo joŋra syiŋ ne tǝ wii daŋ nyi za yaŋ pa ɓo.#Pǝ̃ǝ 28:1-4; Lew 7:35-36 29We dah syiŋ ɓe ne fan nyi ɓe mai me faa ɓǝ ah ka joŋ pǝ cok kal ɓe ne ɓal mor fẽene? Ŋhaa mo yii wee ɓo kal me? We tǝ ŋwaa suu ɓii ne fan ma byaŋ kǝpel mai za ɓe Israel moo nyira daŋ. 30Kǝnah me faa ɓo, za yaŋ ɓo ne morsǝ̃ǝ ɓii ga joŋra yeɓ pel ɓe ga lii, amma zǝzǝ̃ǝ ɓǝ ah i zah ɓe, mor me ga yii za mai mo tǝ yiira me, amma za mai mo tǝ syẽara me, me ga tǝr ra ga falle. 31Mo ẽe ɗǝ, zah'nan ah no ginni, me ga ik wee tǝbanna ma piicel ɓo ne ma morsǝ̃ǝ ɓo daŋ, dǝɓ tam ka joŋ yaŋ ɓo ya. 32Nahnǝn ɓo ga cwaa fan sãh daŋ mee ga joŋ wo za Israel. Dǝɓ tam ka joŋ yaŋ ɓo ya ŋhaa ga lii. 33Amma me ga ur dǝɓ ki kǝsyil za ɓo, mai mo ka woŋ ki ne cok joŋ syiŋ ɓe ya, ka nahnǝn ɓo mo cwaare, ka mo sye zahzyil ɓo. Amma za mai mo joŋra laŋ yaŋ ɓo daŋ a ga wukra ne cuuri. 34Fan mai mo ga joŋ wo wee ɓo matǝ gwa, Hofni ne Fineas, a ga yea wo ɓo tǝgbana fan ma cuu fanne, a ga wukra com vaŋno gwa daŋ.#1 Sa 4:11 35Me ga ur pa joŋzahsyiŋ masãh ahe, mai mo ga joŋ fan tǝgbana zahzyil ɓe mo 'yahni. Me ga nyi wee mai mo ga joŋra yeɓ ga lii pel goŋ mai me nǝǝ ɓo nyi ko. 36Koo zune mo ga coŋ kǝsyil za ɓo a ga syea solai wala farel jol ahe. A ga faa: Oseni mo ɓaŋ me ka me joŋ yeɓ zahsyiŋ ɓo maki ah mor ka me lwaa farel ne sa.
Bible Moundang © Alliance Biblique du Tchad, 1996.