Tito 3
3
Mazwiibhato e Tjikirisiti
1Ukumbuludze bathu kuhwilila balauli ne batungamili, bahwe, bagale bakalindila kushinga mishingo mimwe ne mimwe, yakalulwama. 2Kushaye wabanoleba bubi nge kukwe, bazwiduse mu lilebo, babe nge buthu nenge kuthamila bathu bose mazwiibhato. 3Nge kuti naswi dumbu takatongobe zwilengwe nge mimwe misi, tisingahwe, takatjengeleka tiyendila ntome tida zwithu zwe shango ino kwakapindilila, tipitsha mazhuba edu. Tithamila bamwe bubi mwaza ne ndandala ne kuyemula kusakalulwama, tibengwa nge bathu, naswibo tibengana. 4Koga kwakati Ndzimu, Ntjidzi wedu uzumbunula buthu ne ludo gwakanaka, 5ukatitjidza, usinga titjidze nge mishingo yakanaka yatakashinga, koga nge kwe mahwilo zogwadza awo, nge kusukiwa nge kuzwagwa kakale ne kuthamwa batshwa nge Meya yakayengemala, 6yawakalonga nge buzhalo mutili ndi Jesu Kirisiti Ntjidzi wedu, 7kuti ndizo tisibong'we nlandu nge ngoni dzawo, tibe be bagali thaka mu kugalabgwe mu butjilo gusingapele. 8Ndebo iyeyi inogalikabgwe.
Ndoshaka kuti ulebe wakasima mu zwithu izwezwi, kuti ndizo ibabo bakagalamoyo mu Ndzimu babe nge njele, bashinge mishingo mibuyanana, mishingo yakajali mibuyanana kakale inobuzila. 9Koga uzwiduse mu kukakabadzana kwe bulengwe nenge kulondolodza bukamu ne zhoba ne kukwebakwebana ngekwe nlayo. Ngobe zwithu zwakajalo azwitobuzila, kakale azwina nshingo. 10Ha makumbuludza nthu we mpaladzi kabili kose asingateedze, muthubukane naye. 11Muzibe kuti nthu wakajalo una njalakang'wa dzakakombama kakale ntjinyi. Wakazwisumikilisa kale.
Ndayo ye bupelo
12 #
Mishingo 20:4; Baefeso 6:21, 22; Bakolosa 4:7, 8; 2 Timoti 4:12 Ha ndituma Aritemasi kene Tikikasi kumuli, ugwise nge buzhalo kuzha kundili ku Nikopoli, nge kuti ndoshaka kuti ndipitshe nsi we mbaba ko. 13#Mishingo 18:24; 1 Bakorinta 16:12Ugwise kwazo kulibilidzisa Zenasi we nlebelekeli we zwe milayo na Apolosi mu gwendo gwabo. Basishete tjimwe. 14Bathu ba kanyi kwedu ngabazwidiye kushinga mishingo yakanaka, kuti ndizo babhatshe muna zwinobe zwishaka thamiwa tjinyolotjo, kuti basibe basina mitjelo.
15Bose banami banokudumilisa. Udumilise bose banotida mu kugalamoyo.
Ngoni dze Ndzimu ngadzibe namwi mose.
Kalanga Bible © Bible Society of Botswana, 2008, 2018.