Tito 2
2
Zwidiyo zwinogalikabgwe
1Koga iwe udiye tjinodumana ne zwidiyo zwe malebeswa. 2Udwe balume bahwola kuti badzikame, babe nge njalakang'wa dzakalulwama bazwibhate, babe ne bugalimoyo ne ludo ne kusimisila. 3Udwe bakadzi bahwola kuti na ibo bathame sa ikokobo, kuti babe ne mazwiibhato anoyemulika, basi banyepi kene balanda be zwing'o. Bakafanila kudiya tjakalulwama, 4kuti ndizo badiye bakadzi batjetjana kuda balume babo ne bana babo, 5kuti bazwibhate, babe babuyanana bashinge mishingo yabo ye mu nzi, babe ne buthu, kakale bazwiyise pasi mu balume babo, kuti ndizo dama le Ndzimu lisilingigwe pasi.
6Sa ikoko ukulumbidze bazhuzha kuzwibhata. 7Uthame kuti mu tjimwe ne tjimwe tjaunothama ube tjilakidzo tje mishingo yakalulwama, udiye zwidiyo zwinogalikabgwe, nge zila ina ntutshi, 8kakale udiye zwidiyo zwakatambunuka zwisingasolese, kuti ndizo banokunyanyayidza babhakhwe nge shoni, bashaye bubi gwabangaleba nge kwedu.
9Udwe balanda bazwiyise pasi muna botetshi babo ne kubashathisa nge zila dzose, basingashandudzane nabo, 10abazofanila kubakwibila, bagalikebgwe mu tjimwe ne tjimwe kuti bubuya gwe zwidiyo zwe Ndzimu Ntjidzi wedu guzwilakidze mubali.
11Nge kuti ngoni dze Ndzimu dzakazumbunukila kutjidziwa kwe mmwe ne mmwe, 12dzitidiya kuthubukana ne kushaya bugalimoyo nenge nyota ye zwithu zwe shango ino, kuti tigadzikane, titambunuke, nge kutjila butjilo gunolakidza bundzimu mu shango iyeyi, 13takalindila kugalabgwe kwaka kombolegwa ne kuzha kwe gudzo le Ndzimu wedu nkulu ne Ntjidzi wedu Jesu Kirisiti, 14#Njimbo 130:8; Kufuluka 19:5; Matama 4:20; 7:6; 14:2; 1 Pita 2:9iye wakazwipa kutidzutunula mu bubi gose ne kutizwitjenapadzila etithama tjaba iye mbuyanana ina ludo bukulu gwe kuthama mishingo mibuyanana.
15Ulebe zwithu izwezwi. Usimise gubungano kakale utjemele nge masimba. Kushaye wakulingila pasi.
Kalanga Bible © Bible Society of Botswana, 2008, 2018.