Lumbo gwe Njimbo 8
8
1Ungati ungabe uli hazwadzi kundili,
wakamwa zhamu la mme bangu!
Ha ndakabe ndashangana nawe kuzhe,
ndobe ndakakuputa,
kwakabe kusina mmwe wakabe angandilingila pasi.
2Ndabe ndowokutungamila akuzhisa
mu ng'umba ya mme bangu,
mukati kwe ng'umba ya iye wakandidiya,
ndabendowokupa nkumbi we zhambi
wakalongwa zwipayisi kuti ung'we
ne nkumbi we dzipomegiranate.
3Ungati luboko gugwe gwe lumeshwe gungabe
guli pasi kwe nsholo wangu, gwe luji gwakandigumbatila!
4Ndomukumbila, imwi bakololokadzi be Jerusalema,
kuti musitongo shoka kene musa ludo kuswikilila gwada igo.
Lumbo gwe butathatu
5Ndiani iwouje waswika kudwa ku tjilambanyika,
akasendama mu tjido tje moyo tjitje?
Ndakakumusa ulikusi kwe nti we dziapuli.
Ipapo ndipo mmeyabo pa bakakuzibula,
ipapo iye wakakuzwala wakakuzibula.
6Undiyite se rin'gi mu moyo uwo,
se rin'gi pa luboko gugo;
ngobe ludo gwakasima se lufu,
ndandala ihwukutu se ikumbu,
Pisa kwago hwupisa kwe moto,
uli bhuba lakabangalala.
7Vula njinji aitogupkhwisa nyota ye ludo,
ne vula ye gubakube aingagunyaladze,
nenguba nthu angapa fumwa yose ye ng'umba iye
kuti awane ludo, ungadadigwa kwazo.
8Tina tjinung'una tjedu tje tjisikana,
atjina mazhamu.
Tingathamilani tjinung'una tjedu wali,
zhuba latjinowokumbigwa?
9Ha tjili guma,
towobaka pa nsholo watjo shongwe ye siliva
ngono ha tjili nkoba,
towotjikombeledza ne mapulanka e nsida.
10Ndakabe ndili guma
mazhamu akabe enga thungamakole,
ipapo ndakabe mu mesho awe ndifanana
ne nthu unozhisa kunyalala.
11Solomoni wakabe ana nnda we mizhambi ku Bhaale Hamoni,
Wakasayidza nnda iwoyo batjengeti,
eti mmwe ne mmwe wabo anlipe zwiwulu (1 000) zwe siliva,
mu mitjelo yaakatjela.
12Nnda wangu we mizhambi, iwo wangu, nde wangu,
iwe, Solomoni, ungana ukabe ne tjiwulu (1 000),
batjengeti be mitjelo mazana mabili (200).
13Iwe unogala mu minda,
bakwinya bangu bakateedza hwi lilo,
ima ndilihwe.
14Tjimbidza, tjibhayamoyo tjangu, unge phala
kene phalanalume,
pezhugwi kwe matombo e zwipayisi.
Kalanga Bible © Bible Society of Botswana, 2008, 2018.