Lumbo gwe Njimbo 7
7
1Makumbo awo akanaka ali mu khwebana
iwe nkololokadzi wa bahwosi!
Zwidzwa zwizo zwakanakilila se ndalama
yakathamiwa ne luboko gwe nyambi.
2Ikombo tjitjo lukambana
gusingatongosheta nkumbi we zhambi wakashanganyiwa.
Ntumbu uwo unonga dolo le koroni,
lakakombiwa ne maluba.
3Mazhamu awo mabili anonga phalana mbili
dzakazwagwa dzili mabili e phala.
4Ntshibha uwo unonga thungamakole yakathamwa nge nyanga dze zhowu.
Mesho awo anonga madziba e Heshibhoni,
hwunde ne nkoba we Bhatirabhimi.
Tjimilo tjitjo tjonga thungamakole ye Lebanoni
yakalingisana ne Damasiko.
5Nsholo uwo unokukudza se Dombo le Karimeli,
vudzi lilo lakalukiwa longa jila le bushaba gwakabondelela,
mambo banobhatshigwa mu vudzi lakalukiwa.
6Wakanaka kakale unoshathisa seni,
iwe tjido, mwanadi unogutsha moyo!
7Mbumbiko ye mbili uwo inonga nti we nlala
ne mazhamu awo anonga mitjelo yawo.
8Ndati, “Ndowotatha nlala
anobhata thabi dzawo.
Ungati mazhamu awo angafanana ne lutabi gwe zhambi,
ne nnhuwo we fema kuko ukanga dziapuli,
9ne kuputa kuko kukanga nkumbi we zhambi
unong'wika usodzoloka zubuyanana,
uwunga pa nlomo ne mu meno.”
10Ndi we tjido tje moyo wangu,
iye unoshaka imi.
11Buya, tjido tje moyo wangu,
ngatiyende zwedu ku shango,
tinogalazwedu ku mizi ya kanyi,
12ngatitjimbidze tayenda ku minda ye mizhambi,
tinobona kene zhambi dzakaluma,
kene maluba e zhambi akazhulika
nekuti kene dzipomegiranate dzina maluba.
Ikweno ndowokupa ludo gwangu.
13Malolo anodusa nnhuwo wawo,
pa mikoba yedu kuna mitjelo yose yakanaka,
mitshwa ne mikulukugwe,
yandakakubigila iwe tjido tje moyo wangu.
Kalanga Bible © Bible Society of Botswana, 2008, 2018.