Lumbo gwe Njimbo 2
2
1Imi ndi luba le Sharoni,
ndi luba le mikuku.
2Se luba lipakati kwe mihwa,
tjibhayamoyo tjangu tjakajalo pakati kwe baanadi.
3Tjibhayamoyo tjangu tjonga nti we dziapuli,
pakati kwe miti imu ishaka,
ndoshatha kugala mu ntutshi wawo,
ne mitjelo yawo inondizipila kwazo.
4Wakandidanila ku ng'umba ye majo ne zwing'o,
naka fukidziwa ngubo ye ludo.
5Undisimise nge zhambi dzakaswabisiwa,
ube undinyatutusa nge dziapuli,
ngobe ndogwala gwe ludo.
6Ungati luboko gugwe gwe lumeshwe
gungabe gulikusi kwe nsholo wangu,
ha gwe luji gwakandigumbatila.
7Bakololokadzi be Jerusalema,
ndomutunisa nge phala ne phalapala
dze shango, musitange ludo
kuswikila igo guzwilakidza ha gushaka.
Lumbo gwe bubili
8I hwi le tjido tje moyo wangu!
Bona! Hwouje waswika,
etatha edeluka matombo ne matuthu.
9Tjibhayamoyo tjangu tjonga phala
kene phalanalume.
Bonani koga, hwouje umile
shule kwe guma,
unoshozhela mu mafesitere
akazwibhatilila nge makwasayile.
10Tjido tje moyo wangu tjolebeleka,
tjolebeleka tjoti kundili,
“Milika nthu wangu mbuya, izha kundili,
11ngobe tjibaka tje mbaba tjakapinda,
vula yakana ikapinda.
12Maluba woboneka mu shango,
tjibaka tjemba tjakotoka
ne nlidzo we njiba unohwika mu shango yedu.
13Mpaya unozwala phaya,
ne mizhambi inopululudza,
inodusa kunuhwilila kwayo kunozipa.
Milika nthu wangu mbuya,
buya ngeno kundili.”
14Iwe njiba yangu igele pa phaswa dze shongwe,
wakabgwata pakasitilika pe phaswa,
ima ndibone tjiso tjitjo,
ima ndihwe hwi lilo,
ngobe hwi lilo lozipilila,
ne buso gugo gubuya kwazo.
15Utibhatile phungubgwe, phungubgwana,
dzinotjinya minda ye mizhambi,
minda yedu ye mizhambi yopululudza wali.
16Tjibhayamoyo tjangu nge tjangu,
nami ndi watjo,
unofudza pkhwizi dzidze mu maluba matjena.
17Kuswikila zhuba li bhuda
ne mitutshi ye busiku itizha,
tendebuka, nthu wangu, unge phala
kene phalanalume pezhugwi kwe matombo.
Kalanga Bible © Bible Society of Botswana, 2008, 2018.