Lumbo gwe Njimbo 1
1
Lumbo gwe kutanga
1 #
1 Bomambo 4:32
Lumbo gwe Njimbo, guli gwa Solomoni.
2Ungati ungandiputa ukandiputilila ne nlomo uwo!
Ludo gugo gozipa kupinda nkumbi we zhambi,
3zwizholo zwizo zonuhwilila kunozipa seni,
zina lilo lofanana ne mafuta anofafayidziwa mu mbili,
ndizo baanadi bekuda zwingapa!
4Undikwebele kukuli, titjimbidze tatizha.
Mambo nga bandikwebele mu ng'umbana dzabo dze tjemukati.
Towopembela tikushathila kwazo,
towokudza ludo gugo kupinda nkumbi we zhambi,
ndizo kufanila kube bekuda zwingapa.
5Ndi ntematema ngono ndi mbuya,
imwi bakololokadzi be Jerusalema,
ndi ntematema se dzitante dze Kedari#1:5 Kedari: Bathu be Kedari bakabe bethama dzitante dzabo nge mahwuri e mbudzi thema.,
se zwisitilo zwa Solomoni.
6Musindilinge ngobe ndili ntematema,
nekuti zhuba landibabula.
Hazwadzi dzangu dzakandigwadzilamoyo,
dzakandiyita ntjengeti we mizhambi,
koga yangu mizhambi andizoitjengeta.
7Undibudze iwe tjido tje moyo wangu,
kuti unofudza pkhwizi ne mbudzi dzidzo ngayi,
kuti masikati unodzinyalulusa ngayi,
ini ndakafanila kunga nkadzi unodzungayila
pakati kwe ngubi dze bakwinya babo kene?
8Ha usingazibe, iwe wakanaka kupinda bakadzi bose
tobela mikwala ye pkhwizi ne mbudzi,
ufudze mbudzana dzidzo pejo ne mishasha ye balisi.
9Ndokufanidzanya iwe tjibhayamoyo tjangu,
ne mbizi hadzi ye koloyi dze ngwa dza Faro.
10Matama awo akanakisiwa nge zwinonakisa
ntshibha uwo wakanakisiwa
ne ntambo yakalunjigwa ndalama.
11Towokuthamila mang'ina e golide
akalunjiligwa siliva.
12Mambo bakati baligele batjaja,
tjizholo tjangu tjikadusa nnuhwo unozipa.
13Kundili tjibhayamoyo tjangu i hwomwana ye mira,
igele pakati kwe mazhamu angu.
14Kundili tjibhayamoyo tjangu tjonga lutabi gwe maluba e henna
mu minda ye mizhambi ye Enigedi.
15Tjidzobona koga, wakanaka tjibhayamoyo tjangu!
Tshobona, wakanaka seni!
Mesho awo anonga e njiba.
16Tjidzobona, wakanaka kusina themba tjibhayamoyo tjangu,
bulalo gwedu goguta, gubuya kwazo.
17Thungo dze ng'umba ndedze nsida
makoko ayo nde e nsipuri.
Kalanga Bible © Bible Society of Botswana, 2008, 2018.