Baroma 5

Kunyalala ne shatho

1Ndizo se takalulwamisiwa nge kugalamoyo tina kunyalala ne Ndzimu ndi Jesu Kirisiti, She wedu. 2Ngekukwe takawana zila ye kungina mu ngoni dze Ndzimu, dzatili mudzili, ngono nge kugalamoyo toshatha nge kugalabgwe kuti towobe ne gobe mu gudzo le Ndzimu! 3Tjikulu toshatha mu kudziyila kwedu, ngobe toziba kuti kudziyila kozhisa kusimisila. 4Kusimisila kozhisa mbumbiko yakasima inozhisa kugalabgwe. 5Ngono kugalabgwe akutotibhatisa shoni ngoti ludo gwe Ndzimu gwakadigwa mu mimoyo yedu nge Meya yakayengemala iyo yatakapiwa.

6Takati tisina sekwa tingazwibhatsha, Kirisiti kafila babi nge tjibaka tjakalingisana. 7Kwakasima kuti nthu afile nlulwami, nenguba pamwe kungathamika kuti mmwe afile nthu una nzhazho. 8Koga Ndzimu unolakidza ludo gwawo mutili nge kuti takati titji batjinyi Kirisiti katifila! 9Ndizo se ngwenu takalulwamisiwa nge malopa a Jesu, kukulu kwazo towotjidziwa mu bushongola gwe Ndzimu! 10Ha kuli kuti takati tili zwita zwe Ndzimu, tikagadzanyiwa ne Ndzimu nge lufu gwe Nkololo wawo, kutjidziwa kwedu ndiye kukulu. 11Kusi ikoko koga, iswi toshatha mu Ndzimu ndi She Jesu Kirisiti, iye wakatigadzanya nge Ndzimu.

Adamu na Kirisiti

12 # Kutangisa 3:6 Ndizoke, se tjibi tjakazha mu shango nge nthu nng'ompela, lufu gukazhisiwa nge tjibi, lufu gwakaandama nge bathu, ngobe bose bakathama tjibi. 13Tjibi tjakabe yapo mu shango nlayo usathu ukabigwa, koga pasina nlayo tjibi atjitobagwa. 14Koga lufu gwakabusa kudwa mu nsi wa Adamu kunoti muna wa Mushe ne muna ibabo bakabe basatjinya sa Adamu, iye wakabe ali ifano tje wakabe ewozha, iye Jesu. 15Koga tjipo tje Ndzimu atjitonga tjibi. Ha bathu banjinji bakafa nge tjibi tje nthu nng'ompela. Ngoni dze Ndzimu iwulu seni dzinodelukila banji dzinozha nge nthu nng'ompela Jesu Kirisiti. 16Tjipo tjoleyana ne tjibi tje nthu iwoyo nng'ompela: Ngobe kusumikilisiwa kwakazha nge jinyo ling'ompela, kwakazwala kubong'wa nlandu, koga tjipo tjinozha shule kwe matjinyo manji, tjozhisa kushayiwa nlandu. 17Ha ngekwe jinyo le nthu nng'ompela lufu gwakabusa nge nthu iwoyo, ibabo banoamutjila ngoni dzakawanda ne tjipo tje ndulamo, banowobusa kukulu seni mu butjilo nge nthu nng'ompela iye Jesu Kirisiti.

18Ngono se jinyo le nthu nng'ompela lakazhisa kubong'wa nlandu kwe bathu bose, kwakajalobo nshingo we ndulamo we nthu nng'ompela wakazhisila bathu bose kusabong'wa nlandu nenge kubapa bose butjilo. 19Ngobe se bathu banji bakabe batjinyi nge kusahwa kwe nthu nng'ompela, sa ikokobo, nge kuhwa kwe nthu nng'ompela, bathu bose banowolulwamisiwa.

20Nlayo wakazha kuwandisa jinyo, koga tjibi pa tjakawanda, ngoni dze Ndzimu dzakawanda kupinda. 21Ndizo se tjibi tjakabusa mu lufu, ngoni dze Ndzimu dzobusa nge ndulamo dzititungamilila ku butjilo gusingapele ndi Jesu Kirisiti She wedu.

Currently Selected:

Baroma 5: KBTP

Highlight

Compare

Copy