Njimbo 92
92
Lumbo gunokudza
1Kwakanaka kutenda Yahwe,
ne kumba njimbo dzinokudza zina lenyu,
imwi mu pezhugwi zhugwi.
2Kuleba ngekwe ludo gwenyu gusingazunguzike mangwanana,
nenge kugalikabgwe kwenyu kuli busiku,
3kulidza tjilidzo tje misungo ne dende,
ne nlidzo we tjilidzo tje laya.
4Ngobe imwi Yahwe, mandishathisa nge nshingo wenyu,
ndomba nge shatho ndimbila mishingo ye maboko enyu.
5Mishingo yenyu mikulu seni, imwi Yahwe!
Njalakang'wa dzenyu dzimukatikati!
6Tjimata atjingazibe,
tjilengwe atjingahwisise woku:
7Kuti nenguba babi betutuma se dishwa
ne bashingi be mbipo benaka,
bakalingisana nge golomodzo nge kusingapele.
8Koga imwi Yahwe, mu pezhugwi nge kusingapele.
9Ngobe zwita zwenyu, imwi Yahwe,
tjoselele zwita zwenyu zowoloba,
bose bashingi be mbipo banowopaladziwa.
10Koga makamilidza lunyanga gwangu se gwe phofu.
Makandizhodza mafuta matshwa.
11Mesho angu akabona kukundiwa kwe zwita zwangu.
Zebe dzangu dzakahwa phipiti ye zwita zwangu.
12Balulwami banonaka se nlala,
kakale banokula se miti ye misida ye Lebanoni.
13Bakadzwagwa mu Ng'umba ya Yahwe,
banokula mu misha ye Ndzimu wedu.
14Mu bukwegu gwabo batjina mitjelo,
banogala bekwidzima kakale bakasima.
15Kulakidza kuti Yahwe bakatambunuka,
ndibo shongwe yangu, kakale akuna mbipo mu bali.
Kalanga Bible © Bible Society of Botswana, 2008, 2018.