Njimbo 88
88
Kukumbila bhatsho
1Imwi Yahwe, Ndzimu we jidzo langu,
ndolila ndili mbeli kwenyu siku ne sikati.
2Ndokumbila kuti ntembezelo wangu uzhe mbeli kwenyu,
hwililani tjililo tjangu.
3Ngobe meya yangu izhele kudziyidzika,
ne butjilo gwangu gosedzela ku gomba le lufu.
4Ndobaligwa muna ibabo banoyenda ku gomba le lufu.
Ndonga nlume usina simba,
5ndonga ibabo bakalashigwa bapakati kwe bafi,
ndonga bakabulawa balele mu zwikumbu,
ndonga ibabo basingatjaalakane,
ngobe bakathubugwa mu kuwana bhatsho yenyu.
6Makandibiga pasi pasi kwe gomba,
mukatikati kwakati zwititi.
7Bushongola gwenyu gondilemela,
kakale gondivuna mitshibha.
8Makathama kuti bakwinya bangu bandiambuke
makandithama abe tjithu tjinobatjisa.
Ndakabhatshigwa kuti ndizo ndisitongo pudzumuka.
9Mesho angu apofupadziwa nge buyendasi.
Zhuba nge zhuba ndomudana, imwi Yahwe,
ndosuka maboko anngu mbeli kwenyu.
10Apa moshingila bafi matjenamiso kene?
Apa mitutshi inomilika kumukudza kene?
11Apa ludo gwenyu gusingazunguzike
golebgwa mu bugalo gwe bafi kene?
Kene kugalikabgwe kwenyu
kolebgwa mu gomba le golomodzo kene?
12Apa makaabadzo enyu anozibgwa mu zhalima,
kene mishingo yenyu ye ndulamo inolebgwa
ngekwayo mu shango ye kukanganika kene?
13Koga imi, imwi Yahwe, ndolilila kumuli,
mangwanana ntembezelo wangu
ndowoyisa mbeli kwenyu.
14Imwi Yahwe, apa ini mundilashila kutjena kene?
Ini mundisumbikila buso gwenyu kene?
15Tjinga kudwa mu butjetjana gwangu
ndili mu busungwa kakale ndili pejo nge lufu,
ndakadziyidziwa nge kutjisa kwenyu
ngono ndatjizwitoboka.
16Bushongola gwenyu gondikulila,
kutjisa kwenyu kondikolomola.
17Zhuba lose zwakandipoteleka
se nsundila zwakandifukidza.
18Makathama kuti bazwalani bangu bandiambuke,
zhalima ndilo nzwalani wangu nkulu.
Kalanga Bible © Bible Society of Botswana, 2008, 2018.