Njimbo 80
80
Ntembezelo we kubaka itjaba
1 #
Kufuluka 25:22
Teedzani, imwi nlisi we Iziraela.
Imwi munotungamila Josefa se ngubi ye pkhwizi!
Imwi mugele mu tjigalo tje bushe
pakati kwe dzikherubhu, dwililani ngopenya,
2mbeli kwa Ifureimi na Bhenjamini na Manase!
Lakidzani simba lenyu,
ngono muzhe kowotitjidza!
3Mutibake imwi Ndzimu,
penyesani buso gwenyu, kuti ndizo titjidziwe.
4Imwi Yahwe Ndzimu we mibunga,
mowogwadzilamoyo mitembezelo
ye bathu benyu kuswikila lini kene?
5Makabajisa tjiwunga nge mishodzi,
mukabapa mishodzi kuti bang'we nge buzhalo.
6Motithama tikabe madado e babakidzani naswi,
zwita zwedu zwikatiseka mahanya.
7Mutibake imwi Ndzimu we mibunga,
mutipenyesele buso gwenyu, kuti titjidziwe.
8Makazhisa nzhambi kudwa ku Egipiti,
makatata zwitjaba mu shango ngono mukaudzwala.
9Makakulila nzhambi lubazhe,
midzi yawo ikangina pasi ngono ukazhala shango.
10Matombo akafukidzwa nge ntutshi wawo,
miti ye misida ikafukidzwa nge thabi dzawo,
11ikadusila thabi dzawo ku gungwa,
thadzwana dzinothinila dzikaswika ku gwizi.
12Ini ngono makapkhwanya makuma awo,
bapindi nge zila kwabanopinda betjela zhambi dzawo?
13Hwotji ye shango inoupulula,
na zose zwinoyenda mu shango zouja.
14Tendebukilani ku tili, imwi Ndzimu we mibunga!
Lingani pasi muli kudzimu mubone,
ibeni nge hanya ngekwe nzhambi uwoyu.
15Iwo nti wakadzwagwa nge luboko gwenyu gwe luji.
16Nzhambi wenyu wakatemwa ukaligigwa pasi, wakapisiwa nge moto,
dzene bangalobesiwa nge kutjemela kwenyu makashweshwanya phazha.
17Koga tjiazha tjenyu ngatjibe pezhugwi kwa ibabo baku luboko gwenyu gwe luji,
tjaba yamakazwisimisila.
18Ndizo atingatjamufupatile kakale,
mutipe butjilo, ngono towodana zina lenyu.
19Mutibake imwi Yahwe Ndzimu Masimbawose,
penyesani buso gwenyu, kuti titjidziwe.
Kalanga Bible © Bible Society of Botswana, 2008, 2018.